ನವದೆಹಲಿ: ಚೊಚ್ಚಲ ಆವೃತ್ತಿಯ ಮಹಿಳಾ ಪ್ರೀಮಿಯರ್ ಲೀಗ್ 2023 ಅಂತಿಮ ಹಂತಕ್ಕೆ ಬಂದಿದೆ. ಚೊಚ್ಚಲ ಚಾಂಪಿಯನ್ ಯಾರು ಎಂದು ತಿಳಿಯಲು ಎರಡು ಹೆಜ್ಜೆ ಮಾತ್ರ ಬಾಕಿ ಇದೆ. ನಿನ್ನೆ ಯುಪಿ ವಾರಿಯರ್ಸ್ ಎದುರು ಪಂದ್ಯವನ್ನು ಗೆದ್ದ ಡೆಲ್ಲಿ ಕ್ಯಾಪಿಟಲ್ಸ್ ನೇರ ಫೈನಲ್ ಪ್ರವೇಶ ಪಡೆದುಕೊಂಡರೆ, ಮುಂಬೈ ಮತ್ತು ಯುಪಿ ಮಾರ್ಚ್ 24ರಂದು ನಡೆಯುವ ಎಲಿಮಿನೇಟರ್ ಆಡಬೇಕಿದೆ. ಇದರಲ್ಲಿ ಗೆದ್ದ ತಂಡ ಫೈನಲ್ನಲ್ಲಿ ಡಿಸಿಯೊಟ್ಟಿಗೆ ಮುಖಾಮುಖಿಯಾಗಲಿದೆ.
ಈ ಆವೃತ್ತಿಯ ಎಲಿಮಿನೇಟರ್ ಪಂದ್ಯವು ಮಾರ್ಚ್ 24 ರಂದು ಶುಕ್ರವಾರ ಡಿವೈ ಪಾಟೀಲ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಸಂಜೆ 7.30ಕ್ಕೆ ಆರಂಭವಾಗಲಿದೆ. ಫೈನಲ್‌ಗೆ ತಲುಪಲು ಮುಂಬೈ ಮತ್ತು ಯುಪಿ ಮಹಿಳಾ ತಂಡಗಳ ನಡುವೆ ಕಠಿಣ ಪೈಪೋಟಿ ನಡೆಯಲಿದೆ. ಲೀಗ್ ಹಂತದಲ್ಲಿ 20 ಪಂದ್ಯಗಳು ನಡೆದಿದ್ದು, ಡಬಲ್ ರೌಂಡ್ ರಾಬಿನ್ ಸುತ್ತಿನಂತೆ ಡೆಲ್ಲಿ, ಮುಂಬೈ ಮತ್ತು ಯುಪಿ ವಾರಿಯರ್ಸ್ ಅಂಕ ಪಟ್ಟಿಯ ಅಗ್ರ ಮೂರು ಸ್ಥಾನ ಪಡೆದಿದ್ದು ಕ್ವಾಲಿಫೈ ಆಗಿವೆ. ಕೊನೆಯ ಎರಡರಲ್ಲಿ ಉಳಿದ ಆರ್ಸಿಬಿ ಮತ್ತು ಗುಜರಾತ್ ಲೀಗ್ ಹಂತದಿಂದ ಹೊರಬಿದ್ದಿವೆ.
ವುಮೆನ್ಸ್ ಪ್ರೀಮಿಯರ್ ಲೀಗ್ ಮಾರ್ಚ್ 4 ರಂದು ಆರಂಭವಾಯಿತು. ಮಂಗಳವಾರ ಡೆಲ್ಲಿ-ಯುಪಿ ಮ್ಯಾಚ್ ಕೊನೆಯದ್ದಾಗಿತ್ತು. ಈ ಲೀಗ್ ಸುತ್ತಿನಲ್ಲಿ 5 ತಂಡಗಳು ಡಬಲ್ ರಾಬಿನ್ ರೌಂಡ್ ಸುತ್ತಿನಂತೆ ತಲಾ 8 ಪಂದ್ಯಗಳನ್ನು ಆಡಲಾಗಿದೆ. ಇದರಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ಮುಂಬೈ ಇಂಡಿಯನ್ಸ್ 6 ಪಂದ್ಯಗಳಲ್ಲಿ ಗೆಲುವು ಸಾಧಿಸಿವೆ. ರನ್ ರೇಟ್ ಆಧಾರದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ನೇರ ಫೈನಲ್ ಪ್ರವೇಶ ಪಡೆದುಕೊಂಡಿದೆ. ಯುಪಿ ವಾರಿಯರ್ಸ್ 4 ಪಂದ್ಯದಲ್ಲಿ ಗೆದ್ದು, ಮೂರನೇ ಸ್ಥಾನದಲ್ಲಿದೆ.
ಎಲಿಮಿನೇಟರ್ ಮುಖಾಮುಖಿ: ಲೀಗ್ ಆರಂಭದಿಂದ ಸತತ ಐದು ಪಂದ್ಯದಲ್ಲಿ ಗೆಲುವು ಸಾಧಿಸಿ ಅಗ್ರಸ್ಥಾನದಲ್ಲಿದ್ದ ಮುಂಬೈ ಇಂಡಿಯನ್ಸ್ 6 ಮತ್ತು 7 ನೇ ಪಂದ್ಯದಲ್ಲಿ ಸೋಲು ಕಂಡಿತು. ಕೊನೆಯ ಪಂದಗ್ಯದಲ್ಲಿ ಆರ್ಸಿಬಿ ಮೇಲೆ ಉತ್ತಮ ನಿಯಂತ್ರಣ ಸಾಧಿಸಿ ಗೆದ್ದುಕೊಂಡಿತಾದರೂ, ಕಳೆದ ಮೂರು ಪಂದ್ಯದಲ್ಲಿ ಬ್ಯಾಟಿಂಗ್ ವೈಫಲ್ಯ ಕಂಡಿದೆ. ಮೊದಲ ಐದು ಪಂದ್ಯದ ಬ್ಯಾಟಿಂಗ್ ಲಯಕ್ಕೆ ಮತ್ತೆ ಮುಂಬೈ ಮರಳಿದರೆ ಫೈನಲ್ ಪ್ರವೇಶ ದೊರೆಯಲಿದೆ.
ಯುಪಿ ವಾರಿಯರ್ಸ್ ಕಮ್ಬ್ಯಾಕ್: ಲೀಗ್ನ ಮೊದಲ ಪಂದ್ಯದಲ್ಲಿ ಗುಜರಾತ್ ಮಣಿಸಿದ ನಂತರ ಯುಪಿ ವಾರಿಯರ್ಸ್ ತಂಡ ಸೋಲು ಗೆಲುವುಗಳ ಏರಿಳಿತ ಕಂಡಿತು. ಆದರೆ ಕೊನೆಯ ಮೂರು ಪಂದ್ಯದಲ್ಲಿ ಉತ್ತಮ ಕಮ್ಬ್ಯಾಕ್ ಮಾಡಿ ಕ್ವಾಲಿಫೈ ಆಗಿದೆ. ಯುಪಿ ವಾರಿಯರ್ಸ್ ಉತ್ತಮ ಪ್ರದರ್ಶನದಿಂದ ಗುಜರಾತ್ ಮತ್ತು ಆರ್ಸಿಬಿ ಹೊರ ಬಿದ್ದಿತು.
ಲೀಗ್ನ ಮುಖಾಮುಖಿ: ಮುಂಬೈ ಮತ್ತು ಯುಪಿ ಲೀಗ್ನಲ್ಲಿ ಎರಡು ಬಾರಿ ಮುಖಾಮುಖಿಯಾಗಿದ್ದು, ಮೊದಲ ಪಂದ್ಯದಲ್ಲಿ ಮುಂಬೈ ಗೆದ್ದರೆ, ಎರಡನೇ ಪಂದ್ಯದಲ್ಲಿ ಯುಪಿ ಸೇಡು ತೀರಿಸಿಕೊಂಡಿದೆ. ಈಗ ಮತ್ತೆ ಎಲಿಮಿನೇಟರ್ನಲ್ಲಿ ಮುಖಾಮುಖಿಯಾಗುತ್ತಿದ್ದು ಯಾರು ಗೆಲುವು ಸಾಧಿಸುತ್ತಾರೆ ಎಂಬುದು ಫೈನಲ್ ಪ್ರವೇಶ ನಿಗದಿಯಾಗಲಿದೆ.
ಇದನ್ನೂ ಓದಿ: ಮಹಿಳಾ ಪ್ರೀಮಿಯರ್ ಲೀಗ್: ಯುಪಿ ಸೋಲಿಸಿ ಫೈನಲ್‌ಗೆ ನೇರ ಪ್ರವೇಶ ಪಡೆದ ಡೆಲ್ಲಿ
