ಬರ್ಮಿಂಗ್ಹ್ಯಾಮ್ : ಭುಜದ ನೋವಿನ ಕಾರಣ ಇಂಗ್ಲೆಂಡ್ ವಿರುದ್ಧ ನಡೆಯಲಿರುವ 2ನೇ ಟೆಸ್ಟ್ ಪಂದ್ಯದಲ್ಲಿ ನ್ಯೂಜಿಲ್ಯಾಂಡ್ ನಾಯಕ ಕೇನ್ ವಿಲಿಯಮ್ಸನ್ ವಿಶ್ರಾಂತಿ ತೆಗೆದುಕೊಳ್ಳಲಿದ್ದಾರೆ. ಭಾರತದ ವಿರುದ್ಧ ಜೂನ್ 18ರಿಂದ ನಡೆಯಲಿರುವ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ಗೆ ಮತ್ತೆ ತಂಡಕ್ಕೆ ಹಿಂತಿರುಗಲಿದ್ದಾರೆ ಎಂದು ತಿಳಿದು ಬಂದಿದೆ.
ಕೇನ್ ವಿಲಿಯಮ್ಸನ್ ಅನುಪಸ್ಥಿತಿಯಲ್ಲಿ ಎಡಗೈ ಬ್ಯಾಟ್ಸ್ಮನ್ ಟಾಮ್ ಲ್ಯಾಥಮ್ ಬರ್ಮಿಂಗ್ಹ್ಯಾಮ್ನಲ್ಲಿ ನಡೆಯಲಿರುವ ಇಂಗ್ಲೆಂಡ್ ವಿರುದ್ಧದ 2ನೇ ಟೆಸ್ಟ್ ಪಂದ್ಯದಲ್ಲಿ ನಾಯಕತ್ವಹಿಸಿಕೊಳ್ಳಲಿದ್ದಾರೆ. ಕೇನ್ ವಿಲಿಯಮ್ಸನ್ ಕಳೆದ ಮಾರ್ಚ್ನಿಂದಲೂ ಭುಜದ ನೋವಿನ ಸಮಸ್ಯೆಯಿಂದ ಬಳಲುತ್ತಿದ್ದಾರೆ ಎಂದು ನ್ಯೂಜಿಲ್ಯಾಂಡ್ ಕ್ರಿಕೆಟ್ ಪ್ರಕಟಣೆಯಲ್ಲಿ ತಿಳಿಸಿದೆ.
ಲ್ಯಾಥಮ್ ಕಿವೀಸ್ ತಂಡವನ್ನು ವೃತ್ತಿ ಜೀವನದಲ್ಲಿ 3ನೇ ಬಾರಿಗೆ ಮುನ್ನಡೆಸುತ್ತಿದ್ದಾರೆ. ವಿಲಿಯಮ್ಸನ್ ಬದಲಿಗೆ ವಿಲ್ ಯಂಗ್ ತಂಡ ಸೇರಿಕೊಂಡಿದ್ದಾರೆ. ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ಗೂ ಮೊದಲು ಕೇನ್ ವಿಲಿಯಮ್ಸನ್ಗೆ ವಿಶ್ರಾಂತಿ ಅನಿವಾರ್ಯವಾಗಿದೆ. ಅವರಿಲ್ಲದೆ ಟೆಸ್ಟ್ ಪಂದ್ಯವನ್ನಾಡುವುದು ಊಹಿಸಿಕೊಳ್ಳಲು ಅಸಾಧ್ಯ. ಆದರೆ, ನಮಗೆ WTC ಫೈನಲ್ ಮುಖ್ಯವಾಗಿದ್ದು, ಅವರಿಗೆ ಗಾಯದ ಸಮಸ್ಯೆ ಉಲ್ಬಣವಾಗದ ರೀತಿಯಲ್ಲಿ ಕಾರ್ಯ ನಿರ್ವಹಿಸಬೇಕಾಗಿದೆ. ಹಾಗಾಗಿ, ಈ ಬಿಡುವು ಅವರಿಗೆ ಸಂಪೂರ್ಣ ಫಿಟ್ ಆಗಲು ಉತ್ತಮ ಅವಕಾಶವಾಗಲಿದೆ ಎಂದು ಟಾಮ್ ಲ್ಯಾಥಮ್ ಹೇಳಿದ್ದಾರೆ.
ಇದನ್ನು ಓದಿ:'ಪಂತ್ ತಮ್ಮಿಷ್ಟಂತೆ ಬ್ಯಾಟಿಂಗ್ ಮಾಡಲು ಅವರಲ್ಲಿರುವ ಆತ್ಮವಿಶ್ವಾಸವೇ ಕಾರಣ'
