ನವದೆಹಲಿ: 2019ರ ಐಪಿಎಲ್ ಆವೃತ್ತಿಯ ವೈಫಲ್ಯದ ನಂತರ ಕೆಲವು ನನಗೆ ಕ್ರಿಕೆಟ್ ಬಿಟ್ಟು ನಿಮ್ಮಪ್ಪನ ಜೊತೆ ಆಟೋ ಓಡಿಸಿಕೊಂಡಿರುವ ಎಂದು ಟೀಕಿಸಿದ್ದರು. ಇವುಗಳು ಐಪಿಎಲ್ನಲ್ಲಿ ನನ್ನ ಕೆರಿಯರ್ ಮುಗಿಯಿತೇನೋ ಎನ್ನುವ ಆಲೋಚನೆ ಮೂಡುವಂತೆ ಮಾಡಿದ್ದವು. ಆದರೆ, ಧೋನಿ ಮಾತುಗಳು ನನ್ನನ್ನು ಅಂತಹ ಕೆಟ್ಟ ಆಲೋಚನೆಗಳಿಂದ ದೂರ ಮಾಡಿ ನನ್ನಲ್ಲಿ ವಿಶ್ವಾಸ ಮೂಡಿಸಿದವು ಎಂದು ಮೊಹಮ್ಮದ್ ಸಿರಾಜ್ ಹೇಳಿದ್ದಾರೆ.
ಆ ಆವೃತ್ತಿಯಲ್ಲಿ ಮೊಹಮ್ಮದ್ ಸಿರಾಜ್ 9 ಪಂದ್ಯಗಳಿಂದ 10ಕ್ಕೂ ಹೆಚ್ಚು ಎಕಾನಮಿಯಲ್ಲಿ ಕೇವಲ 7 ವಿಕೆಟ್ ಪಡೆದುಕೊಂಡಿದ್ದರು. ಆ ಐಪಿಎಲ್ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮೊದಲ ಆರು ಪಂದ್ಯಗಳಲ್ಲಿ ಸೋಲುವ ಮೂಲಕ ಅತ್ಯಂತ ಹೀನಾಯ ಪ್ರದರ್ಶನ ತೋರಿ ಟೂರ್ನಿಯಲ್ಲಿ ಕೊನೆಯ ಸ್ಥಾನ ಪಡೆದುಕೊಂಡಿತ್ತು.
ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ಸಿರಾಜ್ ಅತ್ಯಂತ ಕೆಟ್ಟ ಪ್ರದರ್ಶನ ತೋರಿದ್ದರು. ಕೇವಲ 2.2 ಓವರ್ಗಳಲ್ಲಿ 36 ರನ್ ಬಿಟ್ಟುಕೊಟ್ಟಿದ್ದರು. 3ನೇ ಓವರ್ನಲ್ಲಿ ಎರಡು ಬೀಮರ್ ಎಸೆದಿದ್ದರಿಂದ ವಿರಾಟ್ ಕೊಹ್ಲಿ ಅನಿವಾರ್ಯವಾಗಿ ಓವರ್ ಬದಲಾಯಿಸಿದ್ದರು.
ನಾನು ಆ ಪಂದ್ಯದಲ್ಲಿ 2 ಬೀಮರ್ ಎಸೆದಾಗ ಜನರು ನನ್ನನ್ನು ಕ್ರಿಕೆಟ್ ಬಿಟ್ಟು ನಿಮ್ಮಪ್ಪನ ಜೊತೆ ಆಟೋ ಓಡಿಸಿಕೊಂಡಿರು ಎಂದು ಕಮೆಂಟ್ ಮಾಡುತ್ತಿದ್ದರು ಎಂದು ಆರ್ಸಿಬಿ ಪೋಡ್ಕಾಸ್ಟ್ನಲ್ಲಿ ಸಿರಾಜ್ ಹೇಳಿದ್ದಾರೆ.
"ಆ ವೇಳೆ ಸಾಕಷ್ಟು ನಿಂದಿಸುವ ಕಮೆಂಟ್ಗಳು ಬರುತ್ತಿದ್ದವು. ಆದರೆ, ಆ ಜನರಿಗೆ ಇದರ ಹಿಂದಿರುವ ಹೋರಾಟವನ್ನು ನೋಡುವುದಿಲ್ಲ. ನಾನು ಭಾರತ ತಂಡಕ್ಕೆ ಮೊದಲು ಆಯ್ಕೆಯಾದಾಗ 'ನಿನ್ನ ಬಗ್ಗೆ ಜನರು ಮಾತನಾಡುವ ಪ್ರತಿಯೊಂದನ್ನು ಕೇಳಲು ಹೋಗಬೇಡ' ಎಂದು ಮಹಿ ಭಾಯ್( ಎಂಎಸ್ ಧೋನಿ) ಹೇಳಿದ್ದನ್ನು ನಾನು ಇಂದಿಗೂ ನೆನಪಿನಲ್ಲಿಟ್ಟುಕೊಂಡಿದ್ದೇನೆ. 'ನೀನು ಇಂದು ಚೆನ್ನಾಗಿ ಬೌಲಿಂಗ್ ಮಾಡಿದರೆ, ಅವರು ನಿನ್ನನ್ನು ಪ್ರಶಂಸಿಸುತ್ತಾರೆ, ಚೆನ್ನಾಗಿ ಮಾಡಲಿಲ್ಲ ಎಂದರೆ ಅವರು ನಿಂದಿಸುತ್ತಾರೆ, ಹಾಗಾಗಿ ಕಮೆಂಟ್ಗಳನ್ನು ನೀನು ಗಂಭೀರವಾಗಿ ತೆಗೆದುಕೊಳ್ಳಬೇಡ" ಎಂದು ಅವರು ಕಿವಿಮಾತು ಹೇಳಿದ್ದರು.
" ಹೌದು, ಅದು ನಿಜ, ಅಂದು ನನ್ನನ್ನು ನಿರಂತರವಾಗಿ ಟ್ರೋಲ್ ಮಾಡಿದವರೇ ಮತ್ತೊಂದು ದಿನ ನೀನೊಬ್ಬ ಬೆಸ್ಟ್ ಬೌಲರ್ ಭಾಯ್ ಎಂದರು. ಆದ್ದರಿಂದ ನನಗೆ ಯಾರ ಅಭಿಪ್ರಾಯವೂ ಬೇಡ, ನಾನು ಅಂದು ಇದ್ದ ಅದೇ ಸಿರಾಜ್" ಎಂದು 27 ವರ್ಷದ ಹೈದರಾಬಾದ್ ವೇಗಿ ಹೇಳಿಕೊಂಡಿದ್ದಾರೆ.
2019ರ ವೈಫಲ್ಯದ ಹೊರತಾಗಿಯೂ 2020ರಲ್ಲಿ ಆರ್ಸಿಬಿ ಸಿರಾಜ್ರನ್ನು ತಂಡದಿಂದ ಕೈಬಿಡಲಿಲ್ಲ. ಆ ವರ್ಷ ಸಿರಾಜ್ ಉತ್ತಮ ಪ್ರದರ್ಶನ ತೋರಿ ಆಸ್ಟ್ರೇಲಿಯಾ ಪ್ರವಾಸಕ್ಕೆ ಭಾರತ ತಂಡಕ್ಕೂ ಆಯ್ಕೆಯಾದರು. ಆಸ್ಟ್ರೇಲಿಯಾ ವಿರುದ್ಧದ ಗಬ್ಬಾ ಟೆಸ್ಟ್ ಪಂದ್ಯದಲ್ಲಿ 5 ವಿಕೆಟ್ ಪಡೆದು ಭಾರತಕ್ಕೆ ಐತಿಹಾಸಿಕ ಸರಣಿ ಜಯದಲ್ಲಿ ಪ್ರಮುಖ ಪಾತ್ರವಹಿಸಿದ್ದರು. ಅಲ್ಲಿಂದ ಇಲ್ಲಿಯವರೆಗೇ ಆರ್ಸಿಬಿ ಮತ್ತು ಭಾರತ ಎರಡೂ ತಂಡದ ಪರ ಸ್ಥಿರ ಪ್ರದರ್ಶನ ತೋರುತ್ತಿದ್ದಾರೆ.
2022ರ ಮೆಗಾ ಹರಾಜಿಗೂ ಮುನ್ನ ಆರ್ಸಿಬಿ 7 ಕೋಟಿ ನೀಡಿ ಸಿರಾಜ್ರನ್ನು ಕೊಹ್ಲಿ(15 ಕೋಟಿ) ಮತ್ತು ಮ್ಯಾಕ್ಸ್ವೆಲ್(11 ಕೋಟಿ) ಜೊತೆಗೆ ರಿಟೈನ್ ಮಾಡಿಕೊಂಡಿದೆ.
ಇದನ್ನೂ ಓದಿ:IPL ಮೆಗಾ ಹರಾಜಿನ ಮೇಲೆ ಕಣ್ಣು: ಭರ್ಜರಿ ಶತಕ ಸಿಡಿಸಿ ಸಾಮರ್ಥ್ಯ ಸಾಭೀತುಪಡಿಸಿದ ರಾಯ್
