ಮೆಲ್ಬೋರ್ನ್(ಆಸ್ಟ್ರೇಲಿಯಾ): ಟಿ20 ವಿಶ್ವಕಪ್ನಲ್ಲಿ ಮನಮೋಹಕ ಪ್ರದರ್ಶನ ನೀಡುತ್ತಿರುವ ಸೂರ್ಯಕುಮಾರ್ ಯಾದವ್ ಬ್ಯಾಟಿಂಗ್ಗೆ ನಾಯಕ ರೋಹಿತ್ ಶರ್ಮಾ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. "ಸೂರ್ಯ ಮೈದಾನದಲ್ಲಿ ಬ್ಯಾಟಿಂಗ್ ಮಾಡುತ್ತಿದ್ದರೆ, ತಂಡ ನಿರಾಳವಾಗಿರುತ್ತದೆ" ಎಂದು ಹೇಳಿದ್ದಾರೆ.
ಜಿಂಬಾಬ್ವೆ ವಿರುದ್ಧ 71 ರನ್ಗಳ ಗೆಲುವು ಸಾಧಿಸಿದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ರೋಹಿತ್ ಶರ್ಮಾ, ಸೂರ್ಯಕುಮಾರ್ ಯಾದವ್ ನಂ.1 ಬ್ಯಾಟರ್ ಖ್ಯಾತಿಯಂತೆ ಆಟವಾಡುತ್ತಿದ್ದಾರೆ. ಆತ ಮೈದಾನದಲ್ಲಿ ಬ್ಯಾಟ್ ಬೀಸುವವರೆಗೂ ಪೆವಿಲಿಯನ್ನಲ್ಲಿರುವ ತಂಡಕ್ಕೆ ತಲೆನೋವೇ ಇರುವುದಿಲ್ಲ. ರನ್ಗಳು ಖಾತೆ ಸೇರುತ್ತಿರುತ್ತವೆ ಎಂದು ಹೇಳಿದರು.
ಸೂರ್ಯಕುಮಾರ್ ಮೈದಾನಕ್ಕಿಳಿದ ತಕ್ಷಣವೇ ಆಕ್ರಮಣಕಾರಿ ಆಟವಾಡಲು ಶುರು ಮಾಡುತ್ತಾರೆ. ಇದರಿಂದ ಇನ್ನೊಬ್ಬ ಬ್ಯಾಟರ್ಗೆ ಒತ್ತಡ ಕಡಿಮೆಯಾಗುತ್ತದೆ. ಇದು ತಂಡಕ್ಕೂ ಲಾಭವಾಗಲಿದೆ. ಒತ್ತಡವನ್ನು ನಿಭಾಯಿಸುವ ಶಕ್ತಿ ಸೂರ್ಯಕುಮಾರ್ಗೆ ಇದೆ. ಆತನ ಸಾಮರ್ಥ್ಯ ತಂಡಕ್ಕೆ ಗೊತ್ತಿದೆ ಎಂದು ರೋಹಿತ್ ಹೇಳಿದರು.
ರವಿಚಂದ್ರನ್ ಅಶ್ವಿನ್ 3 ವಿಕೆಟ್ ಪಡೆಯುವ ಮೂಲಕ ಜಿಂಬಾಬ್ವೆಗೆ ಮಾರಕವಾದರು. ಅಶ್ವಿನ್ ಹಿರಿಯ ಆಲ್ರೌಂಡರ್ ಆಟಕ್ಕೆ ತಕ್ಕಂತೆ ಪ್ರದರ್ಶನ ನೀಡಿದರು. ಬೌಲರ್ಗಳು ಕೂಡ ಕರಾರುವಾಕ್ ದಾಳಿ ನಡೆಸಿದ್ದರಿಂದ ಜಿಂಬಾಬ್ವೆ ಆಲೌಟ್ ಆಯಿತು. ಇದರಿಂದ ಸೆಮಿಫೈನಲ್ ತಲುಪಲು ನೆರವಾಯಿತು ಎಂದು ಹೇಳಿದರು.
ಇಂಗ್ಲೆಂಡ್ ಎದುರು ಕಠಿಣ ಸವಾಲು: ಅಡಿಲೇಡ್ ಓವಲ್‌ನಲ್ಲಿ ಇಂಗ್ಲೆಂಡ್ ತಂಡ ಸೆಮಿಫೈನಲ್‌ನಲ್ಲಿ ಎದುರಾಗಲಿದೆ. ಬಲಿಷ್ಠ ತಂಡವನ್ನು ಕಟ್ಟಿಹಾಕುವಾಗ ಪರಿಸ್ಥಿತಿಗೆ ತಕ್ಕಂತೆ ಆಟವಾಡಬೇಕು. ತ್ವರಿತವಾಗಿ ಆಟಕ್ಕೆ ಹೊಂದಿಕೊಳ್ಳಬೇಕು. ಸೆಮೀಸ್ ಗೆದ್ದರೆ ಫೈನಲ್ಗೆ ಅರ್ಹತೆ ಗಿಟ್ಟಿಸಿಕೊಳ್ಳಲಿದ್ದೇವೆ. ತಂಡದ ಪ್ರದರ್ಶನದ ಬಗ್ಗೆ ಗರ್ವವಿದೆ. ಇದು ಮುಂದಿನ ಪಂದ್ಯಗಳಲ್ಲೂ ಮುಂದುವರೆಯಲಿದೆ ಎಂದು ಆಶಾಭಾವ ವ್ಯಕ್ತಪಡಿಸಿದರು.
ಓದಿ: ವಿರಾಟ್ ಕೊಹ್ಲಿಯೂ ಸಾಧಿಸದ ದಾಖಲೆ ಬರೆದ ಸೂರ್ಯಕುಮಾರ್.. ಏನದು?
