ಪಂದ್ಯ ವೀಕ್ಷಿಸಿ ಮೋದಿ ಜೊತೆ ಸೆಲ್ಫಿ ಕ್ಲಿಕ್ಕಿಸಿಕೊಂಡ ಆಸೀಸ್​​ ಪಿಎಂ: ರನ್​ ಕಲೆಹಾಕುತ್ತಿರುವ ಕಾಂಗರೂ ಪಡೆ

ಅಹಮದಾಬಾದ್​ನಲ್ಲಿ ನಡೆಯುತ್ತಿರುವ ಕೊನೆಯ ಟೆಸ್ಟ್​ ಪಂದ್ಯದಲ್ಲಿ ಉತ್ತಮವಾಗಿ ಬ್ಯಾಟ್​ ಮಾಡುತ್ತಿರುವ ಆಸ್ಟ್ರೇಲಿಯಾ ರನ್​ ಕಲೆ ಹಾಕುತ್ತಿದೆ. ಭಾರತ ಮತ್ತು ಆಸೀಸ್​ ಪ್ರಧಾನಿಗಳು ಗ್ಯಾಲರಿಯಲ್ಲಿ ಕುಳಿತು ಪಂದ್ಯ ವೀಕ್ಷಿಸಿದರು.

ಅಹಮದಾಬಾದ್​: ಇಲ್ಲಿ ನಡೆಯುತ್ತಿರುವ 4ನೇ ಮತ್ತು ಟೆಸ್ಟ್​ ಪಂದ್ಯದಲ್ಲಿ ಆಸ್ಟ್ರೇಲಿಯಾ ಉತ್ತಮ ಬ್ಯಾಟಿಂಗ್​ ಪ್ರದರ್ಶಿಸುತ್ತಿದೆ. ಭೋಜನ ವಿರಾಮಕ್ಕೂ ಮುನ್ನ 2 ವಿಕೆಟ್​ ಕಳೆದುಕೊಂಡಿದ್ದ ತಂಡ ಬಳಿಕ ಉಸ್ಮಾನ್​ ಖವಾಜಾರ ಅರ್ಧಶತಕ ಮತ್ತು ನಾಯಕ ಸ್ಟೀವನ್​ ಸ್ಮಿತ್​ರ ಜಿಗುಟಾದ ಆಟದಿಂದ ರನ್​ ಕಲೆ ಹಾಕುತ್ತಿದೆ. ಇನ್ನೊಂದೆಡೆ ಪ್ರಧಾನಿ ನರೇಂದ್ರ ಮೋದಿ ಮತ್ತು ಆಸ್ಟ್ರೇಲಿಯಾ ಪ್ರಧಾನಿ ಆಂಥೋನಿ ಅಲ್ಬನೀಸ್ ಕ್ರೀಡಾಂಗಣದಲ್ಲಿ ಕುಳಿತು ಪಂದ್ಯ ವೀಕ್ಷಿಸಿದರು.

ಟೆಸ್ಟ್​ ಪಂದ್ಯವಾದರೂ ಆರಂಭದಲ್ಲಿ ಅಬ್ಬರದ ಬ್ಯಾಟಿಂಗ್​ ಮಾಡಿದ ಆರಂಭಿಕ ಟ್ರೇವಿಸ್​ ಹೆಡ್​ 44 ಎಸೆತಗಳಲ್ಲಿ 7 ಬೌಂಡರಿ ಸಮೇತ 32 ರನ್​ ಮಾಡಿದ್ದರು. ಈ ವೇಳೆ ದಾಳಿ ನಡೆಸಿದ ಭಾರತದ ಹಿರಿಯ ಸ್ಪಿನ್ನರ್​ ಆರ್​ ಅಶ್ವಿನ್​ ಹೆಡ್​ಗೆ ಪೆವಿಲಿಯನ್​ ದಾರಿ ತೋರಿಸಿದರು. ಲಾಂಗ್​ ಆಫ್​ನತ್ತ ಬಲವಾದ ಹೊಡೆತಕ್ಕೆ ಕೈ ಹಾಕಿದ ಟ್ರೇವಿಸ್​ ಹೆಡ್​, ರವೀಂದ್ರ ಜಡೇಜಾಗೆ ಕ್ಯಾಚ್​ ನೀಡಿದರು. ಈ ಮೂಲಕ ಭಾರತ ವಿಕೆಟ್​ ಖಾತೆ ಆರಂಭಿಸಿತು. ಇದರ ಬೆನ್ನಲ್ಲೇ ಆಸೀಸ್​ ಬ್ಯಾಟಿಂಗ್​ ಬೆನ್ನೆಲುಬಾಗಿರುವ ಮಾರ್ನಸ್​ ಲಬುಶೇನ್​ 3 ರನ್​ ಗಳಿಸಿದ್ದಾಗ ಮೊಹಮದ್​ ಶಮಿ ಎಸೆತದಲ್ಲಿ ಬೌಲ್ಡ್​ ಆದರು.

ಮೋದಿ ಜೊತೆ ಪಂದ್ಯ ವೀಕ್ಷಿಸಿದ ಆಸೀಸ್​​ ಪಿಎಂ

ಇದರಿಂದ ಆಸೀಸ್​ ಬೇಗನೇ 2 ವಿಕೆಟ್​ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕುವ ಸಾಧ್ಯತೆ ಇತ್ತು. ಆದರೆ, ಇದಕ್ಕೆ ಅವಕಾಶ ಮಾಡಿಕೊಡದ ಉಸ್ಮಾನ್​ ಖವಾಜಾ ಮತ್ತು ನಾಯಕ ಸ್ಟೀವನ್​ ಸ್ಮಿತ್​ ಉತ್ತಮ ಜೊತೆಯಾಟವಾಡುತ್ತಿದ್ದಾರೆ. ಉಸ್ಮಾನ್​ ಖವಾಜಾ 22 ನೇ ಅರ್ಧಶತಕ ಪೂರೈಸಿದರು.

ನಡೆಯದ ಸ್ಪಿನ್​ ಮೋಡಿ: ಕಳೆದ ಮೂರು ಪಂದ್ಯಗಳಲ್ಲಿ ಸ್ಪಿನ್​ ಮೋಡಿ ಮಾಡಿದ್ದ ರವಿಚಂದ್ರನ್​ ಅಶ್ವಿನ್​ ಮತ್ತು ರವೀಂದ್ರ ಜಡೇಜಾ ಕಮಾಲ್​ ಕಾಣುತ್ತಿಲ್ಲ. 18 ಓವರ್​ ಎಸೆದಿರುವ ಅಶ್ವಿನ್​ 32 ರನ್​ ನೀಡಿದ್ದು 1 ವಿಕೆಟ್​ ಪಡೆದಿದ್ದಾರೆ. 10 ಓವರ್​​ಗಳಲ್ಲಿ ಜಡೇಜಾ 23 ರನ್​ ನೀಡಿದ್ದು ವಿಕೆಟ್​ ಸಿಕ್ಕಿಲ್ಲ.

ಪಂದ್ಯ ವೀಕ್ಷಿಸಿದ ಪ್ರಧಾನಿಗಳು: ಬಾರ್ಡರ್​ ಗವಾಸ್ಕರ್​ ಟ್ರೋಫಿಯ ಟೆಸ್ಟ್​ ಸರಣಿಯ ಕೊನೆಯ ಪಂದ್ಯಕ್ಕೆ ಚಾಲನೆ ನೀಡಿದ ಪ್ರಧಾನಿ ನರೇಂದ್ರ ಮೋದಿ ಮತ್ತು ಆಸೀಸ್​ ಪಿಎಂ ಆಂಥೋನಿ ಅಲ್ಬನೀಸ್ ಅವರು ಗ್ಯಾಲರಿಯಲ್ಲಿ ಕುಳಿತು ಪಂದ್ಯ ವೀಕ್ಷಿಸಿದರು.

#BorderGavaskarTrophy2023 ರ ಅಂತಿಮ ಟೆಸ್ಟ್ ಪಂದ್ಯದ ಮೊದಲ ದಿನವಾದ ಇಂದು ಗುಜರಾತ್‌ನ ಅಹಮದಾಬಾದ್‌ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಪ್ರಧಾನಿ ನರೇಂದ್ರ ಮೋದಿ ಮತ್ತು ಆಸ್ಟ್ರೇಲಿಯಾದ ಪ್ರಧಾನಿ ಆಂಥೋನಿ ಅಲ್ಬನೀಸ್ ಆಟವನ್ನು ವೀಕ್ಷಿಸಿದರು. ಮೊಟೇರಾ ಕ್ರೀಡಾಂಗಣದಲ್ಲಿ ಮೀಸಲಿಟ್ಟಿದ್ದ ಆಸನಗಳಲ್ಲಿ ಪ್ರಧಾನಿಗಳು ಆಸೀನರಾಗಿ ಆಟಗಾರರನ್ನು ಹುರಿದುಂಬಿಸಿದರು.

ಆಸೀಸ್​ ಪ್ರಧಾನಿ ಆಂಥೋನಿ ಅಲ್ಬನೀಸ್, ಮೋದಿ ಅವರ ಜೊತೆ ಸೆಲ್ಫಿ ಕ್ಲಿಕ್ಕಿಸಿಕೊಂಡಿದ್ದು ವಿಶೇಷವಾಗಿತ್ತು. ಇದಕ್ಕೂ ಮೊದಲು ಉಭಯ ಗಣ್ಯರು ಪಂದ್ಯಕ್ಕೆ ಚಾಲನೆ ನೀಡಿದ್ದಲ್ಲದೇ ಮೈದಾನಲ್ಲೆ ತೆರಳಿ ಆಟಗಾರರಿಗೆ ಕೈಕುಲುಕಿ ಶುಭ ಕೋರಿದ್ದರು. ರಾಷ್ಟ್ರಗೀತೆಯಲ್ಲಿಯೂ ಭಾಗಿಯಾಗಿದ್ದರು. ವಿಶೇಷ ವಾಹನದಲ್ಲಿ ತೆರಳಿ ಇಡೀ ಮೈದಾನವನ್ನು ರೌಂಡ್​ ಹಾಕಿ ಅಭಿಮಾನಿಗಳತ್ತ ಕೈಬೀಸಿದ್ದರು.

ಓದಿ: 4ನೇ ಟೆಸ್ಟ್‌: ಟಾಸ್​ ಗೆದ್ದ ಸ್ಮಿತ್‌ ಪಡೆ ಬ್ಯಾಟಿಂಗ್​; ಭಾರತ-ಆಸೀಸ್​ ಪ್ರಧಾನಿಗಳ 'ಕ್ರಿಕೆಟ್​ ದೋಸ್ತಿ'