ಮುಂಬೈ: ವಿಶ್ವಕಪ್ ಎದುರಿಸುವ ಮೊದಲು ಸಾಧ್ಯವಾದಷ್ಟು ಏಕದಿನ ಪಂದ್ಯಗಳನ್ನು ಆಡುವುದು ಉತ್ತಮ. ಏಷ್ಯಾಕಪ್ ನಮ್ಮ ಮುಂದಿದೆ. ಇದು ಭಾರತ ಹಾಗೂ ಏಷ್ಯಾ ರಾಷ್ಟ್ರಗಳ ಇತರ ತಂಡಗಳಿಗೆ ಸಹಕಾರಿಯಾಗಲಿದೆ. ಏಕದಿನ ವಿಶ್ವಕಪ್ ಹಿನ್ನೆಲೆಯಲ್ಲಿ ಭಾರತಕ್ಕೆ ಈ ಪಂದ್ಯಗಳು ಇನ್ನಷ್ಟು ಬೆಂಬಲ ನೀಡಲಿವೆ. ಏಕೆಂದರೆ ಪಂದ್ಯ ನಡೆಯುತ್ತಿರುವ ಸ್ಥಳ ಮತ್ತು ಎದುರಾಳಿ ತಂಡಗಳೇ ಇದಕ್ಕೆ ಕಾರಣವಾಗಿರುವ ಅಂಶಗಳು ಎಂದು ನ್ಯೂಜಿಲೆಂಡ್ ವೇಗದ ಬೌಲರ್ ಟಿಮ್ ಸೌಥಿ ಹೇಳಿದ್ದಾರೆ.
ಇದೇ ತಿಂಗಳು 30ರಿಂದ ಆರಂಭವಾಗಲಿರುವ ಏಷ್ಯಾಕಪ್ಗೆ 18 ಸದಸ್ಯರನ್ನು ಒಳಗೊಂಡ ಭಾರತ ತಂಡವನ್ನು ನಿನ್ನೆ (ಸೋಮವಾರ) ಬಿಸಿಸಿಐ ಪ್ರಕಟಿಸಿದೆ. ಉದಯೋನ್ಮುಖ ಕ್ರಿಕೆಟಿಗ ತಿಲಕ್ ವರ್ಮಾಗೆ ತಂಡದಲ್ಲಿ ಸ್ಥಾನ ಸಿಕ್ಕಿದೆ. ಸಂಜು ಸ್ಯಾಮ್ಸನ್ ಅವರನ್ನು ಸ್ಟ್ಯಾಂಡ್-ಬೈ ಆಟಗಾರನನ್ನಾಗಿ ಆಯ್ಕೆ ಮಾಡಲಾಗಿದೆ. ಉಳಿದಂತೆ, ಗಾಯದಿಂದ ಚೇತರಿಸಿಕೊಂಡ ಕೆ.ಎಲ್.ರಾಹುಲ್ ಮತ್ತು ಶ್ರೇಯಸ್ ಅಯ್ಯರ್ ಮರಳಿದ್ದಾರೆ.
"ಭಾರತಕ್ಕೆ ಎಡಗೈ ಬೌಲಿಂಗ್ ಎದುರಿಸುವ ಸಮಸ್ಯೆ ಇದೆ ಎಂದು ನಾನು ಭಾವಿಸುವುದಿಲ್ಲ. ಭಾರತ ತಂಡದಲ್ಲಿರುವ ವಿಶ್ವ ದರ್ಜೆಯ ಆಟಗಾರರು ಯಾವುದೇ ಬೌಲರ್ಗಾದರೂ ತಮ್ಮದೇ ರೀತಿಯ ಯೋಜನೆ ಸಿದ್ಧಪಡಿಸಿರುತ್ತಾರೆ" ಎಂದು ತಿಳಿಸಿದರು.
"ಕೇನ್ ವಿಲಿಯಮ್ಸನ್ ವಿಶ್ವಕಪ್ ವೇಳೆಗೆ ತಂಡ ಸೇರಿಕೊಳ್ಳಲು ಎಲ್ಲಾ ರೀತಿಯ ಪ್ರಯತ್ನಗಳನ್ನು ಮಾಡುತ್ತಿದ್ದಾರೆ. ಅವರು ತಂಡದ ಭಾಗವಾಗಿರಬೇಕು ಎಂಬುದು ನಮ್ಮ ಅಪೇಕ್ಷೆ. ಒಂದು ವೇಳೆ ಸಾಧ್ಯವಾಗದೇ ಇದ್ದಲ್ಲಿ ಹೊಸಬರಿಗೆ ಅವಕಾಶ ನೀಡಬೇಕಾಗುತ್ತದೆ" ಎಂದರು.
ಐಪಿಎಲ್ನಿಂದಾಗಿ ಪಿಚ್ ಬಗ್ಗೆ ಅರಿವು: ಐಪಿಎಲ್ನಲ್ಲಿ ವಿವಿಧ ದೇಶಗಳ ಆಟಗಾರರು ಪ್ರತಿನಿಧಿಸುವುದರಿಂದ ಭಾರತದ ಪಿಚ್ಗಳ ಬಗ್ಗೆ ಅರಿವಿರುತ್ತದೆ. ಈ ವರ್ಷದ ಐಪಿಎಲ್ನಲ್ಲಿ ನ್ಯೂಜಿಲೆಂಡ್ನ ಕೆಲ ಆಟಗಾರರು ಭಾಗವಹಿಸಿದ್ದರು. ಅವರಿಗೆ ಮೈದಾನಗಳ ಬಗ್ಗೆ ಗೊತ್ತಿದೆ. ಇದು ತಂಡಕ್ಕೆ ಸಹಕಾರಿಯಾಗಲಿದೆ ಎಂದು ಸೌಥಿ ಅಭಿಪ್ರಾಯ ವ್ಯಕ್ತಪಡಿಸಿದರು.
ಇದನ್ನೂ ಓದಿ: ತಿಲಕ್ ವರ್ಮಾ ಭಾರತದ ಭರವಸೆಯ ಕ್ರಿಕೆಟ್‌ ಪ್ರತಿಭೆ; ಏಷ್ಯಾಕಪ್ ಅವರಿಗೆ ದೊಡ್ಡ ಅವಕಾಶ: ಅಜಿತ್ ಅಗರ್ಕರ್
