ಪರ್ತ್(ಆಸ್ಟ್ರೇಲಿಯಾ): ಟಿ-10, ಟಿ-20 ಕ್ರಿಕೆಟ್ನಂತಹ ಹೊಡಿಬಡಿ ಮಾದರಿಗಳು ಲಗ್ಗೆ ಇಟ್ಟ ಮೇಲೆ ಅಸಲಿ ಕ್ರಿಕೆಟ್ನ ಸೊಬಗಾದ ಟೆಸ್ಟ್ ಮಾದರಿ ಮಸುಕಾಗಿದೆ. ಟೆಸ್ಟ್ನಲ್ಲಿ ಸಾಧನೆ ಮಾಡಿದವರು ಮಾತ್ರ ದಿಗ್ಗಜ ಕ್ರಿಕೆಟಿಗರಾಗಿ ಗುರುತಿಸಿಕೊಳ್ಳಲು ಸಾಧ್ಯ. ಅಂಥವರ ಸಾಲಿಗೆ ಈಗ ಆಸ್ಟ್ರೇಲಿಯಾದ ಸ್ಪಿನ್ ಬೌಲರ್ ನಾಥನ್ ಲಿಯಾನ್ ಸೇರಿದ್ದಾರೆ. ನಾಥನ್ ಟೆಸ್ಟ್ ಕ್ರಿಕೆಟ್ನಲ್ಲಿ 500 ವಿಕೆಟ್ ಕೀಳುವ ಮೂಲಕ ಮಹತ್ವದ ಮೈಲಿಗಲ್ಲು ನೆಟ್ಟರು. ಈ ಮೂಲಕ ಅವರು 500ರ ಕ್ಲಬ್ ಸೇರಿದರು.
ಆಸ್ಟ್ರೇಲಿಯಾ ಪರವಾಗಿ 123 ಟೆಸ್ಟ್ ಪಂದ್ಯಗಳನ್ನು ಆಡಿರುವ ಲಿಯಾನ್ 30.85 ಸರಾಸರಿಯಲ್ಲಿ 501 ವಿಕೆಟ್ಗಳನ್ನು ಪಡೆದಿದ್ದಾರೆ. ಪಂದ್ಯದಲ್ಲಿ 8/50 ಅತ್ಯುತ್ತಮ ಬೌಲಿಂಗ್ ಆಗಿದೆ. 23 ಬಾರಿ ಐದು ವಿಕೆಟ್ ಮತ್ತು ನಾಲ್ಕು ಬಾರಿ ಹತ್ತು ವಿಕೆಟ್ಗಳ ಗೊಂಚಲು ಪಡೆದಿದ್ದಾರೆ. ಈ ಮೂಲಕ ಟೆಸ್ಟ್ ಮಾದರಿಯಲ್ಲಿ ಅತಿ ಹೆಚ್ಚು ವಿಕೆಟ್ ಪಡೆದವರ ಸಾಲಿನಲ್ಲಿ ಎಂಟನೇ ಸ್ಥಾನ ಪಡೆದರು. ಜೊತೆಗೆ ವಿಶ್ವ ಕ್ರಿಕೆಟ್ನ ನಾಲ್ಕನೇ ಅತ್ಯಂತ ಯಶಸ್ವಿ ಸ್ಪಿನ್ನರ್ ಆಗಿಯೂ ಹೊರಹೊಮ್ಮಿದರು.
ಟೆಸ್ಟ್ ಕ್ರಿಕೆಟ್ನಲ್ಲಿ ಅತ್ಯಧಿಕ ವಿಕೆಟ್ ಪಡೆದ ಸಾಧಕರು:
ಮುತ್ತಯ್ಯ ಮುರಳೀಧರನ್: ಶ್ರೀಲಂಕಾ ತಂಡದ ದಿಗ್ಗಜ ಸ್ಪಿನ್ ಮಾಂತ್ರಿಕ ಮುತ್ತಯ್ಯ ಮುರಳೀಧರನ್ ಅತ್ಯಧಿಕ ಟೆಸ್ಟ್ ವಿಕೆಟ್ ಪಡೆದ ಮೊದಲಿಗರು. ಮುರಳೀಧರನ್ 133 ಟೆಸ್ಟ್‌ಗಳಲ್ಲಿ 22.72 ಸರಾಸರಿಯಲ್ಲಿ ಭರ್ತಿ 800 ವಿಕೆಟ್ಗಳ ಶಿಖರ ಕಟ್ಟಿದ್ದಾರೆ. 67 ಬಾರಿ ಐದು ಮತ್ತು 22 ಬಾರಿ ಹತ್ತು ವಿಕೆಟ್ಗಳ ಸಾಧನೆ ಮಾಡಿದ್ದಾರೆ. ಮುರಳಿ ಅತ್ಯಂತ ಯಶಸ್ವಿ ಟೆಸ್ಟ್ ಸ್ಪಿನ್ ಬೌಲರ್ ಕೂಡ ಹೌದು.
ಶೇನ್ ವಾರ್ನ್: ಆಸ್ಟ್ರೇಲಿಯಾದ ಸ್ಪಿನ್ ದಂತಕಥೆ ಶೇನ್ ವಾರ್ನ್ 145 ಟೆಸ್ಟ್ ಪಂದ್ಯಗಳಲ್ಲಿ 708 ವಿಕೆಟ್ ಕಿತ್ತು ಎರಡನೇ ಸ್ಥಾನದಲ್ಲಿದ್ದಾರೆ. ಸ್ಪಿನ್ ಮಾಂತ್ರಿಕ ಶೇನ್ ವಾರ್ನ್, ಆಸೀಸ್ ತಂಡದ ಯಶಸ್ವಿ ಬೌಲರ್. ಅವರು ಇನಿಂಗ್ಸ್ನಲ್ಲಿ 37 ಬಾರಿ ಐದು ವಿಕೆಟ್ ಮತ್ತು 10 ಸಲ ಹತ್ತು ವಿಕೆಟ್ ಪಡೆದಿದ್ದಾರೆ.
ಜೇಮ್ಸ್ ಆ್ಯಂಡರ್ಸನ್: ಇಂಗ್ಲೆಂಡ್ನ ಹಿರಿಯ ವೇಗಿ ಜೇಮ್ಸ್ ಆ್ಯಂಡರ್ಸನ್ 183 ಟೆಸ್ಟ್ ಪಂದ್ಯಗಳಲ್ಲಿ 690 ವಿಕೆಟ್ಗಳನ್ನು ಪಡೆದು ಮೂರನೇ ಸ್ಥಾನದಲ್ಲಿದ್ದಾರೆ. ಅವರು ಟೆಸ್ಟ್ನಲ್ಲಿ 32 ಬಾರಿ ಐದು, ಮೂರು ಬಾರಿ 10 ವಿಕೆಟ್ಗಳ ಸಾಧನೆ ಮಾಡಿದ್ದಾರೆ. ವಿಶೇಷವೆಂದರೆ, ಜೇಮ್ಸ್ ಸಕ್ರಿಯ ಕ್ರಿಕೆಟಿಗರಾಗಿದ್ದಾರೆ. ತಂಡದ ಪರ ಟೆಸ್ಟ್ ಪಂದ್ಯಗಳಲ್ಲಿ ಆಡುತ್ತಿದ್ದಾರೆ. 41 ವರ್ಷದ ಜೇಮ್ಸ್ ವಿಶ್ವ ಕ್ರಿಕೆಟ್ನ ಅತ್ಯಂತ ಯಶಸ್ವಿ ವೇಗದ ಬೌಲರ್ ಆಗಿದ್ದಾರೆ.
ಅನಿಲ್ ಕುಂಬ್ಳೆ: 'ಜಂಬೋ' ಖ್ಯಾತಿಯ ಭಾರತದ ಅನಿಲ್ ಕುಂಬ್ಳೆ 132 ಪಂದ್ಯಗಳಲ್ಲಿ 619 ವಿಕೆಟ್‌ಗಳೊಂದಿಗೆ ನಾಲ್ಕನೇ ಸ್ಥಾನದಲ್ಲಿದ್ದಾರೆ. ಒಂದೇ ಟೆಸ್ಟ್ ಇನ್ನಿಂಗ್ಸ್‌ನಲ್ಲಿ 10 ವಿಕೆಟ್ ಪಡೆದ ಮೊದಲ ಭಾರತೀಯ. 35 ಬಾರಿ ಐದು ವಿಕೆಟ್‌ಗಳು, ಎಂಟು ಸಲ ಹತ್ತು ವಿಕೆಟ್ಗಳನ್ನು ಪಡೆದ ದಾಖಲೆ ಕುಂಬ್ಳೆ ಹೆಸರಲ್ಲಿದೆ.
ಸ್ಟುವರ್ಟ್ ಬ್ರಾಡ್: ಇಂಗ್ಲೆಂಡ್ನ ಮತ್ತೋರ್ವ ಹಿರಿಯ ವೇಗಿ ಸ್ಟುವರ್ಟ್ ಬ್ರಾಡ್. ಜೇಮ್ಸ್ ಆ್ಯಂಡರ್ಸನ್ ಬಳಿಕ ಅತ್ಯಧಿಕ ಟೆಸ್ಟ್ ಆಡಿದ ಕ್ರಿಕೆಟಿಗ. ಅವರು 167 ಪಂದ್ಯಗಳಲ್ಲಿ 604 ವಿಕೆಟ್ಗಳನ್ನು ಪಡೆದಿದ್ದಾರೆ. 20 ಬಾರಿ ಐದು, ಮೂರು ಸಲ ಹತ್ತು ವಿಕೆಟ್ಗಳನ್ನು ಪಡೆದಿದ್ದಾರೆ.
ಗ್ಲೆನ್ ಮೆಕ್ಗ್ರಾತ್: ಅಭಿಮಾನಿಗಳಿಗೆ ಪಾಲಿನ 'ಪಿಡ್ಜನ್' ಎಂದೇ ಹೆಸರಾದ ಗ್ಲೆನ್ ಮೆಕ್ಗ್ರಾತ್ ಆಸ್ಟ್ರೇಲಿಯಾದ ಅತ್ಯಂತ ಯಶಸ್ವಿ ವೇಗಿ. ಶೇನ್ ವಾರ್ನ್ ಸಮಕಾಲೀನರಾದ ಮೆಕ್ಗ್ರಾತ್ 124 ಪಂದ್ಯಗಳಲ್ಲಿ 563 ವಿಕೆಟ್ಗಳನ್ನು ಕಿತ್ತಿದ್ದಾರೆ. 29 ಬಾರಿ ಐದು, ಮೂರು ಬಾರಿ ಹತ್ತು ವಿಕೆಟ್ ಗೊಂಚಲನ್ನು ಪಡೆದಿದ್ದಾರೆ. ಹಲವು ವರ್ಷಗಳ ಕಾಲ ವಿಶ್ವದ ಎಲ್ಲ ಬ್ಯಾಟರ್ಗಳಿಗೆ ಮೆಕ್ಗ್ರಾತ್ ತಮ್ಮ ವೇಗದಿಂದಲೇ ನಿದ್ದೆಗೆಡಿಸಿದ್ದರು.
ಕೋರ್ಟ್ನಿ ವಾಲ್ಷ್: ವೆಸ್ಟ್ ಇಂಡೀಸ್ ವೇಗಿಯಾದ ಕೋರ್ಟ್ನಿ ವಾಲ್ಷ್ 500 ಟೆಸ್ಟ್ ವಿಕೆಟ್ಗಳನ್ನು ಪಡೆದ ವಿಶ್ವದ ಮೊದಲ ಸಾಧಕ. ಅವರು 132 ಟೆಸ್ಟ್‌ಗಳಲ್ಲಿ 519 ವಿಕೆಟ್ಗಳನ್ನು ಪಡೆದ ವೇಗದ ಬೌಲರ್ ಆಗಿದ್ದಾರೆ. 22 ಬಾರಿ ಐದು, ಮೂರು ಬಾರಿ ಹತ್ತು ವಿಕೆಟ್ಗಳ ಗೊಂಚಲು ಪಡೆದಿದ್ದಾರೆ.
ಇದನ್ನೂ ಓದಿ: ದಕ್ಷಿಣ ಆಫ್ರಿಕಾ ಟೆಸ್ಟ್ ಸರಣಿ: ಕಿಶನ್ ಬದಲು ಭರತ್ಗೆ ಅವಕಾಶ
