ಚೆನ್ನೈ (ತಮಿಳುನಾಡು) : ಚೆಪಾಕ್ ಮೈದಾನದಲ್ಲಿ ಬುಧವಾರ ನಡೆದ ರಾಜಸ್ಥಾನ ರಾಯಲ್ಸ್ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ನಡುವಿನ ಐಪಿಎಲ್ ಪಂದ್ಯವು ಕೊನೇಯ ಎಸೆತದವರೆಗೂ ರೋಚಕತೆಯಿಂದ ಕೂಡಿತ್ತು. ನಾಯಕನಾಗಿ 200ನೇ ಪಂದ್ಯವಾಡಿದ್ದ ಮಹೇಂದ್ರ ಸಿಂಗ್ ಧೋನಿ ತಮ್ಮ ಹೆಸರಿನಲ್ಲಿ ಮತ್ತೊಂದು ದಾಖಲೆ ಬರೆಯಲು ಹೊರಟಿದ್ದು, ಕೂದಲೆಳೆ ಅಂತರದಲ್ಲಿ ದಾಖಲೆಯೊಂದಿಗೆ ಪಂದ್ಯವೂ ಕೈಜಾರಿತ್ತು. ಧೋನಿ ಪಂದ್ಯದ ಅಂತಿಮ ಎಸೆತದಲ್ಲಿ ಸಿಕ್ಸರ್ ಬಾರಿಸಿದ್ದರೆ ಪಂದ್ಯವನ್ನು ಚೆನ್ನೈ ಗೆಲ್ಲುತ್ತಿತ್ತು. ಆದರೆ ವಿಶ್ವದ ಬೆಸ್ಟ್ ಫಿನಿಷರ್‌ ಕೈಯಿಂದ ಹಾಗು ಮತ್ತೊಂದು ತುದಿಯಲ್ಲಿ ಕ್ರೀಸ್‌ನಲ್ಲಿದ್ದ ಸ್ಟಾರ್ ಆಲ್‌ರೌಂಡರ್ ರವೀಂದ್ರ ಜಡೇಜಾರಿಂದ ಅದು ಸಾಧ್ಯವಾಗಲೇ ಇಲ್ಲ.
ಪಂದ್ಯಕ್ಕೂ ಮುನ್ನ ಮಾತನಾಡಿದ್ದ ಜಡೇಜಾ, ಎಂ.ಎಸ್.ಧೋನಿ ಭಾರತೀಯ ಕ್ರಿಕೆಟ್ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ಎರಡೂ ತಂಡಕ್ಕೂ ದಂತಕಥೆ. ತಂಡದ ನಾಯಕನಾಗಿ ಅವರಿಂದು 200ನೇ ಪಂದ್ಯ ಆಡುತ್ತಿದ್ದಾರೆ. ರಾಜಸ್ಥಾನ್ ತಂಡವನ್ನು ಸೋಲಿಸಿ ಧೋನಿಯನ್ನು ಗೌರವಿಸಲು ನಮಗಿದು ಉತ್ತಮ ವೇದಿಕೆ ಎಂದಿದ್ದರು.
ರೋಚಕ ಪಂದ್ಯ: ಉಭಯ ತಂಡಗಳ ಕಾದಾಟದ ಪಂದ್ಯ ಕೊನೆಯ ಹಂತ ತಲುಪಿತ್ತು. ಗೆಲುವು ಯಾರ ಪಾಲಾಗುತ್ತದೆ ಎಂದು ಕ್ರಿಕೆಟ್ ಅಭಿಮಾನಿಗಳು ಎವೆಯಿಕ್ಕದೆ ನೋಡುತ್ತಿದ್ದರು. ಕೊನೆಯ ಓವರ್‌ನಲ್ಲಿ ಜಡೇಜಾ ಮತ್ತು ಧೋನಿ ಕ್ರೀಸ್‌ನಲ್ಲಿದ್ದರು. ಅಂತಿಮ 12 ಎಸೆತಗಳಲ್ಲಿ ತಂಡದ ಗೆಲುವಿಗೆ 40 ರನ್‌ಗಳ ಅಗತ್ಯವಿತ್ತು. ಜೇಸನ್ ಹೋಲ್ಡರ್ ಎಸೆದ 19ನೇ ಓವರ್‌ನಲ್ಲಿ ಇಬ್ಬರೂ 19 ರನ್ ಪೇರಿಸಿ ಪಂದ್ಯವನ್ನು ಇನ್ನೂ ಜೀವಂತವಿರುವಂತೆ ಮಾಡಿದರು. ಆದರೆ ಅಂತಿಮ ಓವರ್‌ ಮಾಡಲು ಬಂದ ಸಂದೀಪ್ ಶರ್ಮಾ ಅವರ ಬೌಲಿಂಗ್ನಲ್ಲಿ ಧೋನಿ 2ನೇ ಮತ್ತು 3ನೇ ಎಸೆತದಲ್ಲಿ ಎರಡು ಸಿಕ್ಸರ್ ಹೊಡೆದರು. ಈ ವೇಳೆ ಮ್ಯಾಚ್ ರಾಯಲ್ಸ್ ಕೈ ತಪ್ಪಿ ಹೋಯಿತು ಎಂದೇ ಎಲ್ಲರೂ ಭಾವಿಸಿದ್ದರು. ಆದರೆ ಕೊನೆಯ 3 ಎಸೆತಗಳಲ್ಲಿ 3 ರನ್ ಕೊಟ್ಟು ಪಂದ್ಯವನ್ನು ಶರ್ಮಾ ಅವರು ರಾಯಲ್ಸ್ ಕಡೆಗೆ ತಿರುಗಿಸಿದರು. ಇದರಿಂದಾಗಿ ಧೋನಿ ತಮ್ಮ 200ನೇ ಪಂದ್ಯವನ್ನು ಸ್ಮರಣೀಯವಾಗಿಸಲು ಸಾಧ್ಯವಾಗಲಿಲ್ಲ.
ಇದನ್ನೂ ಓದಿ: ಜಡೇಜಾ, ಧೋನಿಗೆ ಖೆಡ್ಡಾ ತೋಡಿದ್ದು ಸಂದೀಪ್ ಶರ್ಮಾ ಅಲ್ಲ.. ಕೋಚ್ ನೀಡಿದ ಸಲಹೆಗೆ ಒಲಿದ ಜಯ!
