ಗುವಾಹಟಿ (ಅಸ್ಸಾಂ): ಐಪಿಎಲ್ 16ನೇ ಆವೃತ್ತಿಯಲ್ಲಿ ಪಂಜಾಬ್ ಕಿಂಗ್ಸ್ ತನ್ನ ಎರಡನೇ ಗೆಲವು ದಾಖಲಿಸಿದೆ. ರಾಜಸ್ಥಾನ ರಾಯಲ್ ವಿರುದ್ಧ 5 ರನ್ಗಳಿಂದ ಜಯ ಸಾಧಿಸಿದೆ. ಗೆಲುವಿಗಾಗಿ ಕೊನೆಯವರೆಗೆ ಹೋರಾಟ ನಡೆಸಿದ ರಾಯಲ್ಸ್ ತಂಡ ಮೊದಲ ಸೋಲು ಅನುಭವಿಸಿತು.
ಇಲ್ಲಿನ ಬರ್ಸಾಪರಾ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಟಾಸ್ ಸೋತು ಬ್ಯಾಟಿಂಗ್ಗಿಳಿದ ಪಂಜಾಬ್ ಕಿಂಗ್ಸ್ 197 ರನ್ಗಳನ್ನು ಪೇರಿಸಿತ್ತು. ಈ ಗುರಿ ಬೆನ್ನಟ್ಟಿದ ರಾಜಸ್ಥಾನ ರಾಯಲ್ಸ್ ನಿರೀಕ್ಷಿತ ಆರಂಭವನ್ನು ಪಡೆಯಲಿಲ್ಲ. ಅರ್ಷದೀಪ್ ಸಿಂಗ್ ಆರಂಭದಲ್ಲೇ ಎರಡು ವಿಕೆಟ್ಗಳು ಪಡೆದು ಶಾಕ್ ನೀಡಿದರು. ಯಶಸ್ವಿ ಜೈಸ್ವಾಲ್ (11) ಮತ್ತು ರವಿಚಂದ್ರನ್ ಅಶ್ವಿನ್ ಶೂನ್ಯಕ್ಕೆ ಕ್ಯಾಚಿತ್ತು ನಿರ್ಗಮಿಸಿದರು.
ಬಳಿಕ ನಾಥನ್ ಎಲ್ಲಿಸ್ ಕೂಡ ಬಿಗಿ ಬೌಲಿಂಗ್ ಪ್ರದರ್ಶಿಸಿ, ಪ್ರಮುಖ ನಾಲ್ಕು ವಿಕೆಟ್ಗಳು ಕಬಳಿಸಿ ರಾಜಸ್ಥಾನ ತಂಡವನ್ನು ಕಟ್ಟಿ ಹಾಕಿದರು. ಜೋಸ್ ಬಟ್ಲರ್ (19), ನಾಯಕ ಸಂಜು ಸ್ಯಾಮ್ಸನ್ (42) ಮತ್ತು ದೇವದತ್ ಪಡಿಕ್ಕಲ್ (21) ಹಾಗೂ ರಿಯಾನ್ ಪರಾಗ್ (21) ತಂಡವನ್ನು ಮೇಲೆತ್ತುವ ಪ್ರಯತ್ನ ಮಾಡಿದರು.
ನಂತರ ಬಂದ ಶಿಮ್ರಾನ್ ಹೆಟ್ಮೆಯರ್ ಮತ್ತು ಧ್ರುವ ಜುರೆಲ್ ಬಿರುಸಿನ ಬ್ಯಾಟಿಂಗ್ ಬೀಸಿ ತಂಡವನ್ನು ಗೆಲುವಿನ ಅಂಚಿಗೆ ತಂದರು. ಕೊನೆಯ ಓವರ್ನಲ್ಲಿ ಗೆಲುವಿಗೆ 18 ರನ್ಗಳು ಬೇಕಾಗಿತ್ತು. ಆದರೆ,10 ರನ್ಗಳನ್ನು ಮಾತ್ರ ಕಲೆ ಹಾಕಲು ಸಾಧ್ಯವಾಯಿತು. ಮೂರನೇ ಎಸೆತದಲ್ಲಿ ಹೆಟ್ಮೆಯರ್ ರನ್ ಔಟ್ ಆಗಿದ್ದು, ರಾಯಲ್ಸ್ ಆಘಾತಕ್ಕೆ ಕಾರಣವಾಯಿತು. 18 ಎಸತೆಗಳಲ್ಲಿ ಮೂರು ಸಿಕ್ಸರ್ಗಳು, ಒಂದು ಬೌಂಡರಿ ಸಮೇತ 36 ರನ್ ಬಾರಿಸಿ ಶಿಮ್ರಾನ್ ತಂಡದ ಗೆಲುವಿಗೆ ಯತ್ನಿಸಿದರು. ಮತ್ತೊಂದೆಡೆ, 15 ಬಾಲ್ಗಳಲ್ಲಿ ಎರಡು ಸಿಕ್ಸರ್ ಮತ್ತು ಮೂರು ಬೌಂಡರಿಗಳೊಂದಿಗೆ ಧ್ರುವ 32* ರನ್ ಬಾರಿಸಿದರು. ಕೊನೆಗೆ ರಾಜಸ್ಥಾನ ತಂಡ 7 ವಿಕೆಟ್ ನಷ್ಟಕ್ಕೆ 192 ರನ್ ಮಾತ್ರ ಕಲೆ ಹಾಕುವಲ್ಲಿ ಸಾಧ್ಯವಾಯಿತು. ಇದರಿಂದ 5 ರನ್ಗಳಿಂದ ಸೋಲಿಗೆ ಶರಣಾಯಿತು.
ಇದಕ್ಕೂ ಮುನ್ನ ಶಿಖರ್ ಧವನ್ ಮತ್ತು ಪ್ರಭಾಸಿಮ್ರಾನ್ ಸಿಂಗ್ ಅವರ ಆಕರ್ಷಕ ಆರ್ಧಶತಕದ ನೆರವಿನಿಂದ ಪಂಜಾಬ್ ಕಿಂಗ್ಸ್ ತಂಡವು 4 ವಿಕೆಟ್ ನಷ್ಟಕ್ಕೆ 197 ರನ್ ಗಳಿಸಿತ್ತು. ನಾಯಕನ ಆಟ ಪ್ರದರ್ಶಿಸಿದ ಶಿಖರ್ ಧವನ್ ಅಜೇಯ 86 ರನ್ ಗಳಿಸಿದರು. ಧವನ್ ಮತ್ತು ಪ್ರಭಾಸಿಮ್ರಾನ್ ಸಿಂಗ್ ಪ್ರಥಮ ವಿಕೆಟ್ಗೆ 90 ರನ್‌ಗಳ ಜೊತೆಯಾಟ ನೀಡಿದರು. ಯುವ ಆಟಗಾರ ಪ್ರಭಾಸಿಮ್ರಾನ್ ತಮ್ಮ ಐಪಿಎಲ್ ಜೀವನದ ಮೊದಲ ಅರ್ಧಶತಕ ದಾಖಲಿಸಿದರು. 34 ಎಸೆತಗಳನ್ನು ಎದುರಿಸಿದ ಅವರು 7 ಬೌಂಡರಿ, 3 ಸಿಕ್ಸ್ ಸಹಿತ 60 ರನ್ ಗಳಿಸಿ ಔಟಾದರು.
ನಂತರ ಕಳೆದ ಪಂದ್ಯದಲ್ಲಿ ಉತ್ತಮ ಬ್ಯಾಟಿಂಗ್ ಮಾಡಿದ್ದ ಲಂಕಾ ಬ್ಯಾಟರ್ ಭಾನುಕಾ ರಾಜಪಕ್ಸೆ ಕ್ರೀಸಿಗೆ ಬಂದರು. ಆದರೆ ಕೈಗೆ ಚೆಂಡು ತಗುಲಿ ಗಾಯವಾದ ಕಾರಣ ರಿಟೈರ್ಡ್ ಹರ್ಟ್ ಆಗಿ ಪೆವಿಲಿಯನ್ಗೆ ಮರಳಿದರು. ಬಳಿಕ ವಿಕೆಟ್ ಕೀಪರ್ ಜಿತೇಶ್ ಶರ್ಮಾ ಜೊತೆ ಸೇರಿ ಶಿಖರ್ ರನ್ ಸೇರಿಸಿದರು. ಆದರೆ 27 ರನ್ ಗಳಿಸಿ ಬಿರುಸಿನ ಆಟ ಆಡುತ್ತಿದ್ದ ಜಿತೇಶ್ ಅವರು ಚಹಾಲ್ ಬೌಲಿಂಗ್ನಲ್ಲಿ ಕ್ಯಾಚಿತ್ತು ನಿರ್ಗಮಿಸಿದರು. ಶರ್ಮಾ ಬೆನ್ನಲ್ಲೇ ಬಂದ ಸಿಕಂದರ್ ರಾಜಾ 1 ರನ್ ವಿಕೆಟ್ ಒಪ್ಪಿಸಿದರು. ಶಾರುಖ್ ಖಾನ್ ನಾಯಕನ ಜೊತೆ ಕೊನೆಗೆ 11 ರನ್ ಕೊಡುಗೆ ನೀಡಿದರು. ಕೊನೆಯ ಎರಡು ಬಾಲ್ ಆಡಲು ಸ್ಯಾಮ್ ಕುರ್ರಾನ್ ಕ್ರೀಸ್ಗೆ ಬಂದು 1* ರನ್ ಮಾಡಿದರು.
ದುಬಾರಿಯಾದ ಚಹಾಲ್: ನಾಲ್ಕು ಓವರ್ಗಳನ್ನು ಮಾಡಿದ ಚಹಾಲ್ 50 ರನ್ ಕೊಟ್ಟು ಈ ಪಂದ್ಯದಲ್ಲಿ ಅತ್ಯಂತ ದುಬಾರಿಯಾದರು. ಕೇವಲ ಒಂದೇ ವಿಕೆಟ್ ಅವರ ಬತ್ತಳಿಕೆಯ ಬೌಲಿಂಗ್ಗೆ ಉದುರಿತು. ಜೇಸನ್ ಹೋಲ್ಡರ್ ಎರಡು ಮತ್ತು ರವಿಚಂದ್ರನ್ ಅಶ್ವಿನ್ ಒಂದು ವಿಕೆಟ್ ಪಡೆದುಕೊಂಡರು.
ಇದನ್ನೂ ಓದಿ: ಗೆದ್ದವರ ಮಧ್ಯೆ ಗುದ್ದಾಟ: ಇಂದು ಗುವಾಹಟಿಯಲ್ಲಿ ರಾಜಸ್ಥಾನಕ್ಕೆ ಪಂಜಾಬ್ ಕಿಂಗ್ಸ್ ಸವಾಲು
