ಶಾರ್ಜಾ: ಕೋಲ್ಕತ್ತಾ ನೈಟ್ ರೈಡರ್ಸ್ ಬೌಲಿಂಗ್ ದಾಳಿಗೆ ರಾಜಸ್ಥಾನ ರಾಯಲ್ ತತ್ತರಿಸಿ, 16.1 ಓವರ್ಗಳಲ್ಲಿ 85 ರನ್ಗಳಿಗೆ ಆಲೌಟ್ ಆಗುವ ಮೂಲಕ ಸೋಲೊಪ್ಪಿಕೊಂಡಿದೆ. ಈ ಗೆಲುವಿನ ಮೂಲಕ ಮೋರ್ಗನ್ ಪಡೆ ಪ್ಲೇ ಆಫ್ನತ್ತ ಮುನ್ನುಗ್ಗಿದ್ದು, ಮುಂಬೈಗೆ ಅಂತಿಮ ಲೀಗ್ ಪಂದ್ಯದಲ್ಲಿ ಹೈದರಾಬಾದ್ ವಿರುದ್ಧ ಭರ್ಜರಿ ಗೆಲುವು ಅನಿವಾರ್ಯವಾಗಿದೆ.
ಟಾಸ್ ಸೋತು ಮೊದಲ ಬ್ಯಾಟಿಂಗ್ ಅವಕಾಶ ಪಡೆದ ಕೆಕೆಆರ್ 172 ರನ್ಗಳ ಬೃಹತ್ ಮೊತ್ತ ಪೇರಿಸಿತು. ಆರಂಭಿಕರಾಗಿ ಕಣಕ್ಕಿಳಿದಿದ್ದ ಶುಬ್ಮನ್ ಗಿಲ್ 44 ಎಸೆತಗಳಲ್ಲಿ 5 ಬೌಂಡರಿ ಮತ್ತು 2 ಸಿಕ್ಸರ್ಗಳ ಸಹಿತ 56 ರನ್ಗಳಿಸಿದರೆ, ಇವರ ಜೊತೆಗಾರ ವೆಂಕಟೇಶ್ ಅಯ್ಯರ್ 35 ಎಸೆತಗಳಲ್ಲಿ 3 ಬೌಂಡರಿ ಮತ್ತು 2 ಸಿಕ್ಸರ್ಗಳ ನೆರವಿನಿಂದ 38 ರನ್ಗಳಿಸಿದರು.
ನಿತೀಶ್ ರಾಣಾ 12, ರಾಹುಲ್ ತ್ರಿಪಾಠಿ 14 ಎಸೆತಗಳಲ್ಲಿ 21, ದಿನೇಶ್ ಕಾರ್ತಿಕ್ ಅಜೇಯ 14 ಮತ್ತು ಇಯಾನ್ ಮಾರ್ಗನ್ ಅಜೇಯ 13 ರನ್ಗಳಿಸಿ 172 ರನ್ಗಳ ಗುರಿ ನೀಡಿದರು. ಇದು ಶಾರ್ಜಾದಲ್ಲಿ ಈ ಆವೃತ್ತಿಯಲ್ಲಿ ದಾಖಲಾದ ಗರಿಷ್ಠ ರನ್ ಗಳಿಕೆಯಾಗಿದೆ.
ರಾಜಸ್ಥಾನ್ ರಾಯಲ್ಸ್ ಪರ ಚೇತನ್ ಸಕಾರಿಯಾ 23ರನ್ ನೀಡಿ 1 ವಿಕೆಟ್ ಪಡೆದರೆ, ಮೋರಿಸ್ 28ಕ್ಕೆ1, ತೆವಾಟಿಯಾ 11ಕ್ಕೆ1, ಗ್ಲೇನ್ ಫಿಲಿಫ್ಸ್ 17ಕ್ಕೆ1 ವಿಕೆಟ್ ಪಡೆದರು.
ಇನ್ನು 172 ರನ್ಗಳ ಬೃಹತ್ತ ಮೊತ್ತ ಬೆನ್ನತ್ತಿದ ರಾಜಸ್ಥಾನ ರಾಯಲ್ಸ್ ಕೇವಲ 85 ರನ್ಗಳಿಗೆ ಆಲೌಟ್ ಆಯಿತು. ಶಿವಮ್ ದುಬೆ (18), ರಾಹುಲ್ ತೆವಾಟಿ (44) ರನ್ ಗಳಿಸಿದ್ದ ಬಿಟ್ಟು ಇನ್ನುಳಿದ ಯಾವುದೇ ಬ್ಯಾಟ್ಸಮನ್ ಎರಡಂಕಿ ದಾಟಲಿಲ್ಲ. ನಾಲ್ವರ ಬ್ಯಾಟ್ಸಮನ್ಗಳ ಸೊನ್ನೆ ಸುತ್ತಿದರೆ, ಇಬ್ಬರು ಕೇವಲ 1 ರನ್ ಗಳಿಸಿ ಔಟಾದರು.
ಕೆಕೆಆರ್ ಪರ ಮಾರಕ ಬೌಲಿಂಗ್ ಮಾಡಿದ ಶಿವಂ ಮಾವಿ 4 ವಿಕೆಟ್, ಲೋಕೈ ಫರ್ಗುಸನ್ 3 ವಿಕೆಟ್ ಕಿತ್ತರು. ಶಕೀಬ್ ಅಲ್ ಹಸನ್ ಹಾಗೂ ವರುಣ್ ಚಕ್ರವರ್ತಿ ತಲಾ1 ವಿಕೆಟ್ ಕಬಳಿಸಿದರು. ಶಿವಂ ಮಾವಿ ಪಂದ್ಯ ಶ್ರೇಷ್ಠ ಪುರಸ್ಕಾರ ಪಡೆದರು.
ಮುಂಬೈ ಹಾದಿ ಕಠಿಣ:
ಪ್ಲೇ ಆಫ್ ಸ್ಥಾನ ನಿರ್ಧರಿಸುವ ಈ ಪಂದ್ಯದಲ್ಲಿ ಕೋಲ್ಕತ್ತಾ ಭರ್ಜರಿ ಗೆಲುವಿನ ಮೂಲಕ ಅಂಕಪಟ್ಟಿ ಹಾಗೂ ರನ್ರೇಟ್ ಉತ್ತಮಪಡಿಸಿಕೊಂಡಿದ್ದು, ಇನ್ನೊಂದೆಡೆ ಮುಂಬೈಗೆ ಮಾರಕವಾಗಿ ಪರಿಣಮಿಸಿದೆ. ಮುಂಬೈ ಮುಂದಿನ ಪಂದ್ಯದಲ್ಲಿ ಹೈದರಾಬಾದ್ ವಿರುದ್ಧ ಮೊದಲು ಬ್ಯಾಟಿಂಗ್ ನಡೆಸಿ, 171 ರನ್ಗಳ ಅಂತರದ ಭರ್ಜರಿ ಗೆಲುವು ಸಾಧಿಸಬೇಕಿದೆ. ಹೀಗಾದರೆ ಮಾತ್ರ ರೋಹಿತ್ ಪಡೆ ಅಂಕಪಟ್ಟಿಯಲ್ಲಿ ನಾಲ್ಕನೇ ಸ್ಥಾನ ಪಡೆಯಲು ಸಾಧ್ಯವಿದೆ. ಒಂದು ವೇಳೆ ಹೈದರಾಬಾದ್ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದರೆ ಮುಂಬೈ ಪ್ಲೇ ಆಫ್ ಕನಸು ಕಮರಲಿದೆ.
