ದುಬೈ: ಐಪಿಎಲ್ ಉಳಿದ ಪಂದ್ಯಗಳಿಗಾಗಿ ಆರ್ಸಿಬಿ ತಂಡದಲ್ಲಿ ಬ್ಯಾಟ ಬೀಸಲು ಎಬಿ ಡಿ ವಿಲಿಯರ್ಸ್ ಈಗಾಗಲೇ ದುಬೈ ತಲುಪಿದ್ದಾರೆ. ನಿನ್ನೆ ನಡೆದ ಇಂಗ್ಲೆಂಡ್ ವಿರುದ್ಧ ಟೆಸ್ಟ್ ಪಂದ್ಯದಲ್ಲಿ ಜಯಗಳಿಸಿದ ಭಾರತ ತಂಡವನ್ನ ಎಬಿಡಿ ಅಭಿನಂದಿಸಿದ್ದಾರೆ. ಜೊತೆಗೆ ಟೀಂ ಇಂಡಿಯಾ ಸೆಲೆಕ್ಷನ್ ಕುರಿತಂತೆ ಕೇಳಿ ಬಂದ ಅಪಸ್ವರಕ್ಕೂ ಉತ್ತರಿಸಿದ್ದಾರೆ.
ಈ ಕುರಿತು ಟ್ವೀಟ್ ಮಾಡಿರುವ ಎಬಿಡಿ, ಭಾರತ ತಂಡ ಉತ್ತಮ ಪ್ರದರ್ಶನ ನೀಡಿದೆ. ನಾಯಕ ವಿರಾಟ್ ಕೊಹ್ಲಿ ಮತ್ತು ಹಲವರು ಅದ್ಭುತ ಕೌಶಲ್ಯ, ಧೈರ್ಯದ ಆಟ ಪ್ರದರ್ಶಿಸಿದ್ದಾರೆ. ಇಂಗ್ಲೆಂಡ್ನ ಜೋ ರೂಟ್ ಸಹ ಒಳ್ಳೆಯ ಆಟ ಆಡಿದ್ದಾರೆ. ಫೈನಲ್ ಪಂದ್ಯಕ್ಕಾಗಿ ನಾನು ಉತ್ಸುಕನಾಗಿದ್ದೇನೆ ಎಂದಿದ್ದಾರೆ.
ಅಲ್ಲದೇ ಟೀಂ ಇಂಡಿಯಾ ಆಡುವ 11ರಲ್ಲಿ ಅಶ್ವಿನ್ ಬದಲಿಗೆ ಸ್ಪಿನ್ನರ್ ಜಡೇಜಾ ಕಣಕ್ಕಿಳಿಸಿರುವುದು ಎಷ್ಟು ಸರಿ ಎಂಬ ಟೀಕೆ ಕೇಳಿ ಬಂದಿದೆ. ಇದಕ್ಕೆ ಉತ್ತರಿಸಿದ ಎಬಿಡಿ, ಒಬ್ಬ ಟೆಸ್ಟ್ ಕ್ರಿಕೆಟ್ನ ಪ್ರೇಕ್ಷಕನಾಗಿ ಹೇಳುತ್ತಿದ್ದೇನೆ. ತಂಡದ ಆಯ್ಕೆ ಮತ್ತು ಇತರ ಅಸಂಬದ್ಧ ವಿಚಾರಗಳ ಯೋಚಿಸುವುನ್ನ ಬಿಟ್ಟು ಬಿಡಿ. ನಿಮ್ಮ ಕಣ್ಣ ಮುಂದೆ ಸ್ಪರ್ಧೆ, ಉತ್ಸಾಹ, ಕೌಶಲ್ಯ ಹಾಗೂ ದೇಶ ಪ್ರೇಮ ಮೆಚ್ಚಿಕೊಳ್ಳಲು ಆರಂಭಿಸಿ. ಇಲ್ಲದಿದ್ದರೆ ನೀವು ಉತ್ತಮ ಆಟ ಕಳೆದುಕೊಳ್ಳುತ್ತೀರಿ ಎಂದಿದ್ದಾರೆ.
5 ಟೆಸ್ಟ್ ಪಂದ್ಯಗಳ ಸರಣಿಯಲ್ಲಿ ಭಾರತ 2-1ರ ಮುನ್ನಡೆ ಸಾಧಿಸಿದೆ. ಸೆ.10ರಿಂದ ಕೊನೆ ಟೆಸ್ಟ್ ಆರಂಭವಾಗಲಿದ್ದು, ಕುತೂಹಲ ಮೂಡಿಸಿದೆ. ಇತ್ತ ಸೆ.19ರಿಂದ ಉಳಿದ ಐಪಿಎಲ್ ಪಂದ್ಯಗಳು ಆರಂಭವಾಗುತ್ತಿದ್ದು, ಎಬಿಡಿ ವಿಲಿಯರ್ಸ್ ಆರ್ಸಿಬಿ ತಂಡ ಸೇರಿಕೊಂಡಿದ್ದಾರೆ. ಸೆ.20 ರಂದು ಕೋಲ್ಕತ್ತಾ ವಿರುದ್ಧ ಆರ್ಸಿಬಿ 2ನೇ ಅವಧಿಯ ಮೊದಲ ಪಂದ್ಯವಾಡಲಿದೆ.
ಈಗಾಗಲೇ ಉತ್ತಮ ಪ್ರದರ್ಶನ ತೋರಿರುವ ಆರ್ಸಿಬಿ ಈ ಬಾರಿಯ ಪ್ರಶಸ್ತಿ ಗೆಲ್ಲುವ ಫೇವರಿಟ್ ತಂಡ ಎನಿಸಿಕೊಂಡಿದೆ.
