ಕಾನ್ಪುರ: ಭಾರತ ಮತ್ತು ನ್ಯೂಜಿಲ್ಯಾಂಡ್ ನಡುವಿನ ಮೊದಲ ಟೆಸ್ಟ್ ಪಂದ್ಯ ರೋಚಕ ಡ್ರಾನಲ್ಲಿ ಅಂತ್ಯಗೊಂಡಿದೆ. ಭಾರತೀಯ ಮೂಲದ ರಚಿನ್ ರವೀಂದ್ರ ಮತ್ತು ಅಜಾಜ್ ಪಟೇಲ್ ಕೊನೆಯ ವಿಕೆಟ್ಗೆ ಆಡಿದ ಅದ್ಭುತ ಜೊತೆಯಾಟ ಭಾರತದ ಗೆಲುವಿಗೆ ಮಗ್ಗುಲ ಮುಳ್ಳಾಗಿ ಪರಿಣಮಿಸಿತು.
ಕರ್ನಾಟಕ ಮೂಲದ ದಂಪತಿಯ ಪುತ್ರ ರಚಿನ್ ರವೀಂದ್ರ ಮತ್ತು ಮಹಾರಾಷ್ಟ್ರದಲ್ಲಿ ಜನಿಸಿ ನ್ಯೂಜಿಲ್ಯಾಂಡ್ನಲ್ಲಿ ನೆಲೆಸಿರುವ ಅಜಾಜ್ ಪಟೇಲ್ ಕೊನೆಯ ವಿಕೆಟ್ಗೆ 8.4 ಓವರ್ ಬ್ಯಾಟಿಂಗ್ ಮಾಡಿ ಅತ್ತ ನ್ಯೂಜಿಲ್ಯಾಂಡ್ ತಂಡದ ಸೋಲು ತಪ್ಪಿಸಿದರೆ ಇತ್ತ ಭಾರತದ ಗೆಲುವಿಗೆ ತಣ್ಣೀರೆರಚಿದರು.
ರಚಿನ್ ಯಾರು? ಆ ಹೆಸರು ಬಂದಿದ್ದು ಹೇಗೆ?
ರಚಿನ್ ತಂದೆ ರವಿ ಕೃಷ್ಣಮೂರ್ತಿ ಸಾಫ್ಟ್‌ವೇರ್ ಸಿಸ್ಟಮ್ ಆರ್ಕಿಟೆಕ್ಟ್ ಆಗಿದ್ದು 1990ರ ದಶಕದಲ್ಲಿ ಬೆಂಗಳೂರಿನಲ್ಲಿ ನೆಲೆಸಿದ್ದರು. ನಂತರ ನ್ಯೂಜಿಲೆಂಡ್‌ಗೆ ತೆರಳಿ ಅಲ್ಲಿಯೇ ನೆಲೆ ಕಂಡುಕೊಂಡರು. ರವಿ ಕೃಷ್ಣಮೂರ್ತಿ ಅವರು ನ್ಯೂಜಿಲ್ಯಾಂಡ್ಗೆ ತೆರಳುವ ಮುನ್ನ ಬೆಂಗಳೂರಿನಲ್ಲಿ ಭಾರತೀಯ ಮಾಜಿ ವೇಗಿ ಹಾಗೂ ಕನ್ನಡಿಗ ಜಾವಗಲ್ ಶ್ರೀನಾಥ್ ಜೊತೆ ಕ್ರಿಕೆಟ್ ಆಡಿದ್ದಾರೆ.
ರವಿ ಕೃಷ್ಣಮೂರ್ತಿ ಸ್ವತಃ ಕ್ರಿಕೆಟ್ ಪ್ರಿಯರಾಗಿದ್ದು, ಜಗತ್ತಿನ ಕ್ರಿಕೆಟ್ ದೇವರೆಂದು ಖ್ಯಾತಿಯಾಗಿರುವ ಸಚಿನ್ ತೆಂಡೂಲ್ಕರ್ ಅವರ ಅಭಿಮಾನಿ. ಭಾರತದ ಶ್ರೇಷ್ಠ ಕ್ರಿಕೆಟಿರಾಗಿರುವ ಕನ್ನಡಿಗ ರಾಹುಲ್ ದ್ರಾವಿಡ್ ಮತ್ತು ಸಚಿನ್ ತೆಂಡೂಲ್ಕರ್ ಅವರ ಹೆಸರು ಬಳಸಿ ತಮ್ಮ ಮಗನಿಗೆ 'ರಚಿನ್' ಎಂದು ನಾಮಕರಣ ಮಾಡಿದ್ದಾರೆ. ರಾಹುಲ್ದಿಂದ 'ರ' ಅಕ್ಷರನ್ನು ಸಚಿನ್ 'ಚಿನ್' ಅಕ್ಷರಗಳನ್ನು ಸೇರಿಸಿಕೊಂಡಿದ್ದಾರೆ.
ಕೃಷ್ಣಮೂರ್ತಿ ಅವರು ನ್ಯೂಜಿಲೆಂಡ್‌ನಲ್ಲಿ 'ಹಟ್ ಹಾಕ್ಸ್ ಕ್ಲಬ್' ಎಂಬ ಕ್ರಿಕೆಟ್ ಕ್ಲಬ್ ಸ್ಥಾಪಿಸಿದ್ದು, ಈ ಕ್ಲಬ್ ಪ್ರತಿ ಬೇಸಿಗೆಯಲ್ಲಿ ನ್ಯೂಜಿಲೆಂಡ್‌ನ ಆಟಗಾರರನ್ನು ಭಾರತಕ್ಕೆ ಕರೆತಂದು ಇಲ್ಲಿ ಕೆಲವು ಪಂದ್ಯಗಳನ್ನಾಡಿಸುತ್ತದೆ. ಈ ತಂಡದೊಂದಿಗೆ 2011ರಿಂದಲೂ ರಚಿನ್ ರವೀಂದ್ರ ಭಾರತಕ್ಕೆ ಬರುತ್ತಿದ್ದು ಅನಂತಪುರ, ಹೈದರಾಬಾದ್, ಬೆಂಗಳೂರು ಮತ್ತು ಚೆನ್ನೈನಲ್ಲಿ ಕ್ರಿಕೆಟ್ ಆಡಿದ್ದಾರೆ.
ಅಜಾಜ್ ಪಟೇಲ್ ತಮ್ಮ 8ನೇ ವಯಸ್ಸಿನಲ್ಲಿ ಕುಟುಂಬದೊಂದಿಗೆ ನ್ಯೂಜಿಲ್ಯಾಂಡ್ಗೆ ಸ್ಥಳಾಂತರಗೊಂಡಿದ್ದರು. ಅಲ್ಲಿ ಸೆಂಟ್ರೆಲ್ ಡಿಸ್ಟ್ರಿಕ್ಟ್ ತಂಡದ ಪರ ದೇಶಿ ಕ್ರಿಕೆಟ್ ಆಡಿರುವ 33 ವರ್ಷದ ಸ್ಪಿನ್ನರ್ ಇಂದು ನ್ಯೂಜಿಲ್ಯಾಂಡ್ ತಂಡವನ್ನು ಸೋಲಿನಿಂದ ಪಾರು ಮಾಡಿದ ಕೀರ್ತಿಗೆ ಭಾಜನರಾಗಿದ್ದಾರೆ.
ಅಶ್ವಿನ್, ಜಡೇಜಾ ದಾಳಿಗೆ ದಿಢೀರ್ ಕುಸಿದಿದ್ದ ನ್ಯೂಜಿಲ್ಯಾಂಡ್ ತಂಡ ಸೋಲಿನ ಸುಳಿಗೆ ಸಿಲುಕಿತ್ತು. ಆದರೆ ರವೀಂದ್ರ 91 ಎಸೆತಗಳಲ್ಲಿ ಅಜೇಯ 18 ರನ್ ಹಾಗೂ ಅಜಾಜ್ ಪಟೇಲ್ 23 ಎಸೆತಗಳಲ್ಲಿ ಅಜೇಯ 2 ರನ್ಗಳಿಸಿ ಪಂದ್ಯವನ್ನು ಡ್ರಾ ಸಾಧಿಸಲು ನೆರವಾದರು.
ಇದಕ್ಕೂ ಮುನ್ನ, ನೈಟ್ ವಾಚ್ಮನ್ ಆಗಿದ್ದ ಮತ್ತೊಬ್ಬ ಬೌಲರ್ ವಿಲ್ ಸಮರ್ವಿಲ್ 110 ಎಸೆತಗಳಲ್ಲಿ 36 ರನ್ಗಳಿಸಿ ಭಾರತೀಯ ಬೌಲರ್ಗಳನ್ನು ಕಾಡಿದ್ದರು. ಆದರೆ ಜಡೇಜಾ 40ಕ್ಕೆ4 ಮತ್ತು ಅಶ್ವಿನ್ 35ಕ್ಕೆ 3 ವಿಕೆಟ್ ಪಡೆದು ಪಂದ್ಯದ ಗತಿಯನ್ನೇ ಬದಲಿಸಿದ್ದರು. ಆದರೂ ಒಂದು ಕಡೆ ಮಂದ ಬೆಳಕು ಮತ್ತೊಂದು ಕಡೆ ರವೀಂದ್ರ-ಪಟೇಲ್ ಆಟ ರಹಾನೆ ಪಡೆಯ ಗೆಲುವಿಗೆ ಅಡ್ಡಿಯಾಯಿತು.
ಕಿವೀಸ್ನ 19 ವಿಕೆಟ್ಗಳಲ್ಲಿ 17 ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾಗಿದ್ದ ಭಾರತೀಯ ಬೌಲರ್ಗಳು ಈ ಬಾಲಂಗೋಚಿಗಳ ವಿಕೆಟ್ ಪಡೆಯುವಲ್ಲಿ ವಿಫಲರಾದರು.
ಇದನ್ನೂ ಓದಿ: ಭಾರತದ ಗೆಲುವಿಗೆ ಮಂದಬೆಳಕು ಅಡ್ಡಿ: ರೋಚಕ ಡ್ರಾನಲ್ಲಿ ಮೊದಲ ಟೆಸ್ಟ್ ಅಂತ್ಯ
