ದುಬೈ: ಇಂದಿನಿಂದ ಏಷ್ಯಾಕಪ್ ಟೂರ್ನಿಯ ಸೂಪರ್ ಫೋರ್ ಪಂದ್ಯಗಳು ನಡೆಯಲಿದ್ದು, ನಾಳೆ ಭಾರತ ತಂಡಕ್ಕೆ ಪಾಕಿಸ್ತಾನ ಮತ್ತೊಮ್ಮೆ ಎದುರಾಗಲಿದೆ. ಭಾರತ ತಂಡದಲ್ಲಿ ಬೌಲಿಂಗ್ ಮತ್ತು ಅಗ್ರ ಕ್ರಮಾಂಕವನ್ನು ಬಲಪಡಿಸಬೇಕಿದೆ ಎಂದು ವೇಗದ ಬೌಲರ್ ಆವೇಶ್ ಖಾನ್ ಅಭಿಪ್ರಾಯಪಟ್ಟಿದ್ದಾರೆ.
ನಾಕೌಟ್ ಪಂದ್ಯದಲ್ಲಿ ಪಾಕ್ ತಂಡವನ್ನು ಬಗ್ಗುಬಡಿದ ಭಾರತ ಎರಡನೇ ಪಂದ್ಯದಲ್ಲಿ ಕ್ರಿಕೆಟ್ ಕೂಸು ಹಾಂಕಾಂಗ್ ಸೋಲಿಸಿ ಸೂಪರ್ 4 ಹಂತ ತಲುಪಿದೆ. ಪೈನಲ್ ತಲುಪಲು ತಂಡಗಳಿಗೆ ಪ್ರತಿ ಪಂದ್ಯದಲ್ಲೂ ಗೆಲುವು ಸಾಧಿಸುವುದು ಅಗತ್ಯ. ಅಲ್ಲದೇಮ ಪಾಕ್ ವಿರುದ್ಧದ ಪಂದ್ಯ ಎಂದಿಗೂ ಯುದ್ಧದಂತೆಯೇ ಭಾಸವಾಗುತ್ತದೆ. ಭಾರತ ಗೆಲ್ಲಲೇಬೇಕು ಎಂಬುದು ಅಭಿಮಾನಿಗಳ ಆಕಾಶದೆತ್ತರದ ಆಸೆ.
ಪಾಕಿಸ್ತಾನ ವಿರುದ್ಧದ ಮೊದಲ ಪಂದ್ಯದಲ್ಲಿ ಭಾರತ ಗೆಲುವು ಸಾಧಿಸಿದರೂ, ಅಗ್ರ ಕ್ರಮಾಂಕದ ಬ್ಯಾಟಿಂಗ್ ವೈಫಲ್ಯ ಕಂಡಿತ್ತು. ಗಾಯದ ಬಳಿಕ ಚೇತರಿಸಿಕೊಂಡು ಆಡುತ್ತಿರುವ ಕೆ.ಎಲ್. ರಾಹುಲ್ ತಾವೆದುರಿಸಿದ ಮೊದಲ ಎಸೆತದಲ್ಲಿಯೇ ಔಟಾಗಿದ್ದರು. ಹಿಟ್ಮ್ಯಾನ್ ಖ್ಯಾತಿಯ ನಾಯಕ ರೋಹಿತ್ ಶರ್ಮಾ ರನ್ ಗಳಿಸಲು ಪರದಾಡಿ ಔಟಾದರು. ಲಯದ ಸಮಸ್ಯೆ ನಡುವೆ ವಿರಾಟ್ ಕೊಹ್ಲಿ 35 ರನ್ ಮಾತ್ರ ಗಳಿಸಿದರು.
ಟಾಪ್ ಬ್ಯಾಟ್ಸ್ಮನ್ಗಳ ವೈಫಲ್ಯ ತಂಡಕ್ಕೆ ಮುಳುವಾಗಲಿದೆ. ಪಾಕ್ ವಿರುದ್ಧ ಸಿಡಿದಿದ್ದ ಆಲ್ರೌಂಡರ್ ರವೀಂದ್ರ ಜಡೇಜಾ ಗಾಯಗೊಂಡು ಟೂರ್ನಿಯಿಂದ ಹೊರಬಿದ್ದಿದ್ದಾರೆ. ಬ್ಯಾಟಿಂಗ್ ಪವರ್ಪ್ಲೇ ಅನ್ನು ಬಳಸಿಕೊಳ್ಳಲು ತಂಡ ಸೋತಿದೆ. ಇದು ಮುಂದಿನ ಪಂದ್ಯಗಳಲ್ಲಿ ಮರುಕಳಿಸಬಾರದು ಎಂದು ಆವೇಶ್ಖಾನ್ ಅಭಿಪ್ರಾಯಪಟ್ಟಿದ್ದಾರೆ.
ಮತ್ತೆ ಪ್ರಯೋಗ ನಡೆಸ್ತಾರಾ ರಾಹುಲ್: ಪಾಕ್ ವಿರುದ್ಧದ ಪಂದ್ಯದಲ್ಲಿ ಎಡ- ಬಲ ಆಟವನ್ನು ಪ್ರಯೋಗ ಮಾಡಲು ಮುಖ್ಯ ಕೋಚ್ ರಾಹುಲ್ ದ್ರಾವಿಡ್ ಅವರು ರವೀಂದ್ರ ಜಡೇಜಾರನ್ನು 4ನೇ ಕ್ರಮಾಂಕದಲ್ಲಿ ಆಡಿಸಿದ್ದರು. ಇದು ವರ್ಕ್ ಕೂಡ ಆಗಿತ್ತು. ಸಿಡಿದ ಜಡೇಜಾ 35 ರನ್ ಚಚ್ಚಿದ್ದರು. ಆದರೆ, ಗಾಯಗೊಂಡ ಅವರು ಟೂರ್ನಿಯಿಂದ ಹೊರಬಿದ್ದಿದ್ದು, ವಿಕೆಟ್ ಕೀಪರ್ ರಿಷಬ್ ಪಂತ್ಗೆ ಈ ಜವಾಬ್ದಾರಿ ವಹಿಸುತ್ತಾರೆಯೇ ಎಂದು ನಾಳಿನ ಪಂದ್ಯದಲ್ಲಿ ಗೊತ್ತಾಗಲಿದೆ.
ರೋಹಿತ್, ರಾಹುಲ್, ಕೊಹ್ಲಿಗೆ ಏನಾಯ್ತು: ಬ್ಯಾಟಿಂಗ್ ಪವರ್ಪ್ಲೇ ವೇಳೆ ತಂಡ ವೇಗವಾಗಿ ರನ್ ಮಾಡಲು ಸೋತಿದೆ. ಇದು ಮಧ್ಯಮ ಕ್ರಮಾಂಕದ ಮೇಲೆ ಹೊರೆ ಹೆಚ್ಚಿಸಲಿದ್ದು, ಈ ಕಾರಣಕ್ಕಾಗಿ ರಾಹುಲ್, ರೋಹಿತ್ ಸಿಡಿಯಲೇಬೇಕಿದೆ. ಇದು ಎದುರಾಳಿ ತಂಡವನ್ನು ಕಟ್ಟಿಹಾಕಲು ಸಾಧ್ಯವಾಗುತ್ತದೆ.
ಹಾಂಕಾಂಗ್ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ 6 ತಿಂಗಳ ಬಳಿಕ ಅರ್ಧಶತಕ ಸಿಡಿಸಿದರು. ಸಿಕ್ಸ್ ಬಾರಿಸಿ ಆತ್ಮವಿಶ್ವಾಸ ಗಳಿಸಿರುವ ಕೊಹ್ಲಿ ನಾಳಿನ ಪಾಕ್ ವಿರುದ್ಧದ ಪಂದ್ಯದಲ್ಲಿ ಇದೇ ಪ್ರದರ್ಶನ ನೀಡಬೇಕಿದೆ.
ಓದಿ: ಏಷ್ಯಾಕಪ್ನಲ್ಲಿ ಹಾಂಗ್ಕಾಂಗ್ ವಿರುದ್ಧ ಗೆದ್ದ ಪಾಕ್: ನಾಳೆ ಮತ್ತೊಮ್ಮೆ ಭಾರತ-ಪಾಕ್ ಹೈವೋಲ್ಟೇಜ್ ಪಂದ್ಯ
