ಹೈದರಾಬಾದ್: ಇತ್ತೀಚೆಗಷ್ಟೇ ಮುಕ್ತಾಯಗೊಂಡ ವಿಶ್ವಕಪ್ ಆವೃತ್ತಿಗಳ ಪಿಚ್ ರೇಟಿಂಗ್ ಪಟ್ಟಿಯನ್ನು ಅಂತರರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ (ಐಸಿಸಿ) ಬಿಡುಗಡೆಗೊಳಿಸಿದೆ. ಭಾರತ ಮತ್ತು ಆಸ್ಟ್ರೇಲಿಯಾ ಮುಖಾಮುಖಿಯಾದ ಅಹಮದಾಬಾದ್ನ ನರೇಂದ್ರ ಮೋದಿ ಕ್ರೀಡಾಂಗಣದ ಪಿಚ್ಗೆ 'ಸಾಮಾನ್ಯ' ಎಂದು ರೇಟಿಂಗ್ ಕೊಟ್ಟಿದೆ.
ಫೈನಲ್ ಪಂದ್ಯ ಸ್ವಾರಸ್ಯಕರ ಆಗಿರಲಿಲ್ಲ. ಪಂದ್ಯ ಹೆಚ್ಚೂ ಕಡಿಮೆ ಆಸ್ಟ್ರೇಲಿಯಾದ ಕಡೆ ವಾಲಿತ್ತು. ಆಸೀಸ್ ಟಾಸ್ ಗೆದ್ದು ಮೊದಲು ಬೌಲಿಂಗ್ ಆಯ್ಕೆ ಮಾಡಿಕೊಂಡಾಗ ಪಿಚ್ ಬೌಲರ್ಗಳಿಗೆ ಸಹಕಾರಿಯಾಗಿ ವರ್ತಿಸಿದರೆ, ಎರಡನೇ ಇನ್ನಿಂಗ್ಸ್‌ನಲ್ಲಿ ಸಂಪೂರ್ಣ ಬ್ಯಾಟಿಂಗ್‌ಸ್ನೇಹಿ ಆಗಿ ಕಂಡು ಬಂತು. ಹೀಗಾಗಿ ಏಕಪಕ್ಷೀಯ ಪಂದ್ಯವಾಗಿತ್ತು.
ಆಸ್ಟ್ರೇಲಿಯಾ ನಿಧಾನಗತಿಯ ವಿಕೆಟ್‌ನಲ್ಲಿ ಮೊದಲು ಬೌಲಿಂಗ್ ಆಯ್ಕೆ ಮಾಡಿ ಭಾರತವನ್ನು 240 ರನ್‌ಗಳಿಗೆ ಆಲ್ಔಟ್ ಮಾಡಿತು. ಈ ಗುರಿಯನ್ನು ಆಸೀಸ್ 43 ಓವರ್‌ಗಳಲ್ಲಿ ತಲುಪಿತು. ಟ್ರಾವಿಸ್ ಹೆಡ್ ಎರಡನೇ ಇನ್ನಿಂಗ್ಸ್‌ನಲ್ಲಿ 137 ರನ್ ಗಳಿಸಿ ಪಂದ್ಯಶ್ರೇಷ್ಠ ಪ್ರದರ್ಶನ ನೀಡಿದರು. ಐಸಿಸಿ ಮ್ಯಾಚ್ ರೆಫರಿ ಮತ್ತು ಮಾಜಿ ಜಿಂಬಾಬ್ವೆ ಬ್ಯಾಟರ್ ಆ್ಯಂಡಿ ಪೈಕ್ರಾಫ್ಟ್ ಪಿಚ್ಗೆ 'ಸಾಮಾನ್ಯ' ಎಂದು ರೇಟ್ ಮಾಡಿದ್ದಾರೆ.
ಸೆಮೀಸ್ ಪಿಚ್: ಕೋಲ್ಕತ್ತಾದ ಈಡನ್ ಗಾರ್ಡನ್ಸ್‌ನಲ್ಲಿ ನಡೆದ ಆಸ್ಟ್ರೇಲಿಯಾ ಮತ್ತು ದಕ್ಷಿಣ ಆಫ್ರಿಕಾ ನಡುವಿನ ಎರಡನೇ ಸೆಮಿಫೈನಲ್ ಪಂದ್ಯದ ಪಿಚ್ಗೂ ಸಾಮಾನ್ಯ ಎಂಬ ರೇಟಿಂಗ್ ನೀಡಲಾಗಿದೆ. ಈ ಪಂದ್ಯ ಹೆಚ್ಚು ಸ್ವಾರಸ್ಯಕರವಾಗಿತ್ತು. ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ಗಿಳಿದ ಹರಿಣಗಳ ಮೇಲಿನ ಕ್ರಮಾಂಕ ಬೇಗ ಕುಸಿತ ಅನುಭವಿಸಿತ್ತು. ಆದರೆ ಮಧ್ಯಮ ಕ್ರಮಾಂಕದಲ್ಲಿ ಮಿಲ್ಲರ್ ಶತಕ ದಾಖಲಿಸಿದ್ದರಿಂದ 212 ರನ್ಗಳ ಸಾಧಾರಣ ಗುರಿಯನ್ನು ಆಸೀಸ್ ಎದುರಿಸಿತು. ದಕ್ಷಿಣ ಆಫ್ರಿಕಾ ಬಿಗಿಯಾದ ಬೌಲಿಂಗ್ ಹೋರಾಟ ನಡೆಸಿತಾದರೂ 2.4 ಓವರ್ ಮತ್ತು 3 ವಿಕೆಟ್ ಉಳಿಸಿಕೊಂಡು ಆಸ್ಟ್ರೇಲಿಯಾ ಪಂದ್ಯ ಗೆದ್ದು ಫೈನಲ್ ಪ್ರವೇಶಿಸಿತ್ತು. ಇಷ್ಟು ರೋಚಕ ಪಂದ್ಯ ನಡೆದ ಪಿಚ್ಗೆ ಭಾರತದ ಮಾಜಿ ವೇಗಿ ಜಾವಗಲ್ ಶ್ರೀನಾಥ್ 'ಸಾಮಾನ್ಯ' ಎಂಬ ರೇಟಿಂಗ್ ಕೊಟ್ಟಿದ್ದಾರೆ.
ವಾಂಖೆಡೆಗೆ ಉತ್ತಮ ರೇಟಿಂಗ್: ಭಾರತ ಮತ್ತು ನ್ಯೂಜಿಲೆಂಡ್ ನಡುವೆ ನಡೆದ ಮೊದಲ ಸೆಮೀಸ್ ಪಂದ್ಯಕ್ಕೆ 'ಉತ್ತಮ' ಎಂಬ ರೇಟಿಂಗ್ ನೀಡಲಾಗಿದೆ. ಈ ಪಂದ್ಯ ಬೃಹತ್ ಸ್ಕೋರ್ ಕಂಡಿತ್ತು ಮತ್ತು ಭಾರತ 70 ರನ್ನಿಂದ ಗೆದ್ದು ಫೈನಲ್ಗೆ ಸ್ಥಾನ ಮಾಡಿಕೊಂಡಿತ್ತು. ವಾಂಖೆಡೆ ಮೈದಾನದಲ್ಲಿ ಮೊದಲು ಬ್ಯಾಟ್ ಮಾಡಿದ ಭಾರತ ವಿರಾಟ್ ಕೊಹ್ಲಿ, ಶ್ರೇಯಸ್ ಅಯ್ಯರ್ ಶತಕದ ನೆರವಿನಿಂದ 398 ರನ್ಗಳ ಗುರಿ ನೀಡಿದರೆ, ಡೇರಿಯಲ್ ಮಿಚೆಲ್ ಶತಕದ ಹೊರತಾಗಿಯೂ 327 ಸರ್ವಪತನ ಕಂಡ ಕಿವೀಸ್ 70 ರನ್ಗಳಿಂದ ಸೋಲನುಭವಿಸಿತ್ತು.
2023ರ ಭಾರತ ಆಡಿದ 11 ಪಂದ್ಯಗಳಲ್ಲಿ ಹೆಚ್ಚಿನ ಪಿಚ್ಗಳು ಸಾಮಾನ್ಯ ಎಂಬ ರೇಟಿಂಗ್ ಪಡೆದುಕೊಂಡಿದೆ. ಕೋಲ್ಕತ್ತಾದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ, ಲಕ್ನೋದಲ್ಲಿ ಇಂಗ್ಲೆಂಡ್ ವಿರುದ್ಧ, ಅಹಮದಾಬಾದ್‌ನಲ್ಲಿ ಪಾಕಿಸ್ತಾನದ ವಿರುದ್ಧ ಮತ್ತು ಚೆನ್ನೈನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಪಂದ್ಯಗಳು ಸಾಮಾನ್ಯ ಎಂಬ ರೇಟಿಂಗ್ ಗಳಿಸಿದ ಪಿಚ್ಗಳು.
ಇದನ್ನೂ ಓದಿ: 'ಮೈದಾನದಲ್ಲಿ ನನ್ನನ್ನು ಫಿಕ್ಸರ್ ಎಂದು ಕರೆದರು': ಗಂಭೀರ್ ಜೊತೆಗಿನ ವಾಗ್ವಾದದ ಬಗ್ಗೆ ಶ್ರೀಶಾಂತ್ ದೂರು
