ನವದೆಹಲಿ: ಪದೇ ಪದೆ ಕೋಚ್ ಮತ್ತು ನಾಯಕನನ್ನು ಬದಲಾಯಿಸುವ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡ ಈಗಾಗಲೇ ಸಾಕಷ್ಟು ಹೊಡೆತ ತಿಂದಿದೆ. ಹಾಗಾಗಿ ಪ್ರಸ್ತುತ ಕನ್ನಡಿಗರಾದ ಅನಿಲ್ ಕುಂಬ್ಳೆ ಮತ್ತು ಕೆ.ಎಲ್.ರಾಹುಲ್ ಜೊತೆ ಮೂರು ವರ್ಷಗಳ ಯೋಜನೆ ಹೊಂದಿದ್ದು, ಅವರೊಂದಿಗೆ ಮುಂದುವರಿಯಲಿದ್ದೇವೆ ಎಂದು ಪಂಜಾಬ್ ತಂಡದ ಸಹ ಮಾಲೀಕ ನೆಸ್ ವಾಡಿಯಾ ತಿಳಿಸಿದ್ದಾರೆ.
13ನೇ ಆವೃತ್ತಿಯ ಐಪಿಎಲ್ನಲ್ಲಿ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ಪಯಣ ಏಳುಬೀಳಿನಿಂದ ಕೂಡಿತ್ತು. ಮೊದಲ 7 ಪಂದ್ಯಗಳಲ್ಲಿ 6 ಪಂದ್ಯಗಳಲ್ಲಿ ಸೋಲು ಕಂಡಿದ್ದ ರಾಹುಲ್ ಪಡೆ ನಂತರ ಸತತ 5 ಪಂದ್ಯಗಳಲ್ಲಿ ಅದ್ಭುತ ಜಯ ಸಾಧಿಸಿತ್ತು. ಪ್ಲೇ ಆಫ್ ಸನಿಹ ಬಂದಿತ್ತು. ಆದರೆ ನಿರ್ಣಾಯಕವಾಗಿದ್ದ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲಿ ಸೋಲುವ ಮೂಲಕ 6ನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿತ್ತು.
ವಾಡಿಯಾ ಪ್ರಕಾರ ಮೊದಲ ಪಂದ್ಯದಲ್ಲಿ ಡೆಲ್ಲಿ ವಿರುದ್ಧ ಅಂಪೈರ್ರಿಂದಾದ ಶಾರ್ಟ್ ರನ್ ಪ್ರಮಾದ ಅವರ ಪ್ಲೇ ಆಫ್ ಕನಸನ್ನು ನುಚ್ಚುನೂರು ಮಾಡಿತು ಎಂದಿದ್ದಾರೆ. ಆದರೂ ರಾಹುಲ್ ನಾಯಕತ್ವ ಮತ್ತು ಕುಂಬ್ಳೆ ಅವರಂತಹ ತರಬೇತುದಾರರ ಸಂಯೋಜನೆಯಡಿಯಲ್ಲಿ ಮೊದಲ ವರ್ಷದಲ್ಲಿ ಅಗತ್ಯವಾದ ಸ್ಥಿರತೆಯನ್ನು ತೋರಿಸಲಿಲ್ಲ ಎನ್ನುವುದನ್ನು ಒಪ್ಪಿಕೊಂಡಿದ್ದಾರೆ.
ಹೊಸ ನಾಯಕ, ಹೊಸ ತಂಡ ಹಾಗೂ ಸಾಕಷ್ಟು ಹೊಸ ಮುಖಗಳು ಈ ಬಾರಿ ತಂಡದಲ್ಲಿದ್ದರು. ಆದರೆ ಇದು ಒಮ್ಮೊಮ್ಮೆ ಇದು ಕ್ಲಿಕ್ ಆಗುತ್ತದೆ. ಕೆಲವೊಮ್ಮೆ ಆಗುವುದಿಲ್ಲ. ಮುಂದಿನ ಐಪಿಎಲ್ಗೂ ಮುನ್ನ ಹರಾಜು ನಡೆಯಲಿದ್ದು, ಈ ಬಾರಿ ಮಧ್ಯಮ ಕ್ರಮಾಂಕ ಹಾಗೂ ಬೌಲಿಂಗ್ ವಿಭಾಗದ ಲೋಪದೋಷಗಳನ್ನು ಸರಿಪಡಿಸಿಕೊಳ್ಳಲಿದ್ದೇವೆ ಎಂದು ವಾಡಿಯಾ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಕುಂಬ್ಳೆ-ರಾಹುಲ್ ನಾಯಕತ್ವದ ಭವಿಷ್ಯದ ಬಗ್ಗೆ ಮಾತನಾಡಿರುವ ಅವರು, ನಾವು ಕುಂಬ್ಳೆ ಜೊತೆಗೆ ಮೂರು ವರ್ಷದ ಯೋಜನೆಯನ್ನು ಹೊಂದಿದ್ದೇವೆ. ನಾವು ಈ ಸೀಸನ್ನಲ್ಲಿ ಕೇವಲ ಒಂದು ಪಂದ್ಯದಲ್ಲಿ ಸೋಲಿನಿಂದ ಪ್ಲೇ ಆಫ್ ತಪ್ಪಿಸಿಕೊಂಡಿರುವುದ್ದೇವೆ. ಅವರಿಬ್ಬರು ತಂಡದಲ್ಲಿ ಮುಂದುವರೆಯಲಿದ್ದಾರೆ ಎಂದರು.
ಇನ್ನು ರಾಹುಲ್, ಗೇಲ್, ಪೂರನ್, ಶಮಿ, ಅಗರ್ವಾಲ್ ಈ ಬಾರಿ ಉತ್ತಮ ಪ್ರದರ್ಶನ ತೋರಿರುವುದು ತಂಡಕ್ಕೆ ಬಹುದೊಡ್ಡ ಯಶಸ್ಸಾಗಿದೆ. ಹಾಗಾಗಿ ಮಧ್ಯಮ ಕ್ರಮಾಂಕ ಮತ್ತು ಡೆತ್ ಬೌಲಿಂಗ್ ಬಲಿಷ್ಠ ಮಾಡಿಕೊಳ್ಳುವ ಅಗತ್ಯವಿದೆ ಎಂದು ಅವರು ತಿಳಿಸಿದ್ದಾರೆ.
ಗ್ಲೆನ್ ಮ್ಯಾಕ್ಸ್ವೆಲ್ ಮತ್ತು ಕಾಟ್ರೆಲ್ರನ್ನು ಗುರಿಯಾಗಿಸಿ, ಈ ಬಾರಿ ಹೆಚ್ಚು ಹಣ ಪಡೆದಿದ್ದ ಅಂತಾರಾಷ್ಟ್ರೀಯ ಕ್ರಿಕೆಟಿಗರು ಉತ್ತಮ ಪ್ರದರ್ಶನ ನೀಡದಿರವುದು ಕೂಡ ತಂಡದ ಹಿನ್ನಡೆಗೆ ಕಾರಣ ಎಂದಿದ್ದಾರೆ. ಜೊತೆಗೆ ಕ್ರಿಸ್ ಗೇಲ್ರನ್ನು ಮೊದಲಾರ್ಧದಲ್ಲಿ ಆಡಿಸದಿರುವುದು ಕೂಡ ಆಶ್ಚರ್ಯಕ್ಕೀಡಾಗಿದೆ ಎಂದು ತಿಳಿಸಿದ್ದಾರೆ.
