ವಿಶಾಖಪಟ್ಟಣ: ಭಾರತ ತಂಡದ ನಾಯಕ ವಿರಾಟ್ ಕೊಹ್ಲಿ ಸರಣಿ ಉಳಿಸಿಕೊಳ್ಳಲು ಮಾಡು ಇಲ್ಲವೇ ಮಡಿ ಎಂತಾಗಿರುವ ನಾಳಿನ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಮಹತ್ವದ ಮೈಲುಗಲ್ಲನ್ನು ಸ್ಥಾಪಿಸಲಿದ್ದಾರೆ.
ಆಗಸ್ಟ್ 18 2008ರಲ್ಲಿ ಭಾರತ ತಂಡದ ಪರ ಅಂತಾರಾಷ್ಟ್ರೀಯ ಕ್ರಿಕೆಟ್ ಪದಾರ್ಪಣೆ ಮಾಡಿದ ವಿರಾಟ್ ಇದುವರೆಗೆ 399 ಅಂತಾರಾಷ್ಟ್ರೀಯ ಪಂದ್ಯಗಳನ್ನಾಡಿದ್ದಾರೆ. ವಿಶಾಖ ಪಟ್ಟಣದಲ್ಲಿ ನಡೆಯುವ ಎರಡನೇ ಏಕದಿನ ಪಂದ್ಯ ಕೊಹ್ಲಿಗೆ 400ನೇ ಅಂತಾರಾಷ್ಟ್ರೀಯ ಪಂದ್ಯವಾಗಲಿದೆ.
ವಿರಾಟ್ ಕೊಹ್ಲಿ 240 ಏಕದಿನ, 75 ಟಿ20 ಹಾಗೂ 84 ಟೆಸ್ಟ್ ಪಂದ್ಯಗಳನ್ನಾಡಿದ್ದಾರೆ. ಏಕದಿನ ಪಂದ್ಯಗಳಲ್ಲಿ 11524 ರನ್, ಟೆಸ್ಟ್ನಲ್ಲಿ 7202 ರನ್ ಹಾಗೂ ಟಿ 20 ಯಲ್ಲಿ 2633 ರನ್ ಪೇರಿಸಿದ್ದಾರೆ. ಟೆಸ್ಟ್ ಕ್ರಿಕೆಟ್ನಲ್ಲಿ 27 ಹಾಗೂ ಏಕದಿನ ಕ್ರಿಕೆಟ್ನಲ್ಲಿ 43 ಶತಕ ದಾಖಲಿಸಿದ್ದಾರೆ.
ಕೊಹ್ಲಿಗೆ ರೋಹಿತ್- ಹೋಪ್ ಪೈಪೋಟಿ
ಕಳೆದ ಎರಡು ವರ್ಷಗಳಲ್ಲಿ ಏಕದಿನ ಕ್ರಿಕೆಟ್ನಲ್ಲಿ ವರ್ಷದಲ್ಲಿ ಗರಿಷ್ಠ ರನ್ ಪೇರಿಸಿದ ದಾಖಲೆ ಉಳಿಸಿಕೊಂಡು ಬಂದಿರುವ ವಿರಾಟ್ ಕೊಹ್ಲಿ ಸತತ ಮೂರನೇ ಬಾರಿಯೂ ತಮ್ಮ ದಾಖಲೆ ಮುಂದುವರಿಸಲು ನಾಳಿನ ಪಂದ್ಯ ನಿರ್ಣಾಯಕವಾಗಿದೆ. ಈಗಾಗಲೆ ಮೊದಲ ಸ್ಥಾನದಲ್ಲಿರುವ ಕೊಹ್ಲಿ 2019ರಲ್ಲಿ 1292 ರನ್ ಬಾರಿಸಿದ್ದಾರೆ. ಇವರಿಗೆ ಪೈಪೋಟಿ ನೀಡುತ್ತಿರುವ ರೋಹಿತ್ 1268 ಗಳಿಸಿದ್ದರೆ ಹೋಪ್ 1225 ರನ್ಗಳಿಸಿ ತೀವ್ರ ಪೈಪೋಟಿ ನೀಡುತ್ತಿದ್ದಾರೆ.