ಮುಂಬೈ: ಭಾರತ ತಂಡದ ಮಾಜಿ ಆಲ್ರೌಂಡರ್ ಸುರೇಶ್ ರೈನಾ 2020ರ ಐಪಿಎಲ್ ಆರಂಭಕ್ಕೂ ಮುನ್ನವೇ ಸಿಎಸ್ಕೆ ಬಿಟ್ಟು ಹೊರ ಬಂದಿದ್ದಕ್ಕೆ ಕಾರಣ ಬಹಿರಂಗಪಡಿಸಿದ್ದಾರೆ. ರೈನಾ ಐಪಿಎಲ್ನಿಂದ ಹೊರಬರುತ್ತಿದ್ದಂತೆ ಕೆಲವು ವಿವಾದ ಕೂಡ ಅವರ ಹೆಗಲೇರಿತ್ತು. ಧೋನಿಗೆ ಟೀಂ ಮ್ಯಾನೇಜ್ಮೆಂಟ್ ಬಾಲ್ಕನಿ ಸೌಲಭ್ಯವಿರುವ ಕೊಠಡಿ ನೀಡದಿದ್ದಕ್ಕೆ ಬೇಸರಪಟ್ಟು ಈ ನಿರ್ಧಾರ ತೆಗೆದುಕೊಂಡಿದ್ದಾರೆ ಎಂಬ ಅನಧಿಕೃತ ಸುದ್ದಿ ಕೂಡ ಕೇಳಿ ಬಂದಿತ್ತು. ಅಲ್ಲದೆ ಸಿಎಸ್ಕೆ ಮಾಲೀಕ ಶ್ರೀನಿವಾಸನ್ ಕೂಡ ರೈನಾ ವಿರುದ್ಧ ಬಹಿರಂಗ ಹೇಳಿಕೆ ನೀಡಿ ತಮ್ಮ ಅಸಮಾಧಾನ ವ್ಯಕ್ತಪಡಿಸಿದ್ದರು.
ಇದೀಗ ಸ್ವತಃ ರೈನಾ ಟೈಮ್ಸ್‌ ಆಫ್ ಇಂಡಿಯಾಗೆ ನೀಡಿದ ಸಂದರ್ಶನದಲ್ಲಿ ತಾನು ಟೂರ್ನಿಯಿಂದ ಹೊರ ಬಂದಿದ್ದಕ್ಕೆ ಕಾರಣ ಬಹಿರಂಗಪಡಿಸಿದ್ದಾರೆ. ಪಠಾಣ್ ಕೋಟ್ನಲ್ಲಿ ತಮ್ಮ ಮಾವ ಮತ್ತು ಸೋದರ ಸಂಬಂಧಿಗಳನ್ನು ಕೊಲೆ ಮಾಡಲಾಗಿತ್ತು. ಹಾಗಾಗಿ ತಾವು ಕುಟುಂಬದ ಜೊತೆ ಇರಬೇಕೆಂದು ತವರಿಗೆ ಮರಳಿದ್ದಾಗಿ ರೈನಾ ತಿಳಿಸಿದ್ದಾರೆ. ಅಲ್ಲದೆ ತಮ್ಮ ನಿರ್ಧಾರದಿಂದ ಯಾವುದೇ ವಿಷಾದ ಕೂಡ ಇಲ್ಲ ಎಂದು ಅವರು ಹೇಳಿದ್ದಾರೆ.
"ಪಂಜಾಬ್‌ನಲ್ಲಿನ ನನ್ನ ಕುಟುಂಬದಲ್ಲಿ ದುರ್ಘಟನೆಯೊಂದು ನಡೆದಿತ್ತು. ಆ ಸಂದರ್ಭದಲ್ಲಿ ಮಾವ ಕೊಲೆಯಾದ. ನಾನು ನಿಜವಾಗಿಯೂ ನನ್ನ ಕುಟುಂಬಕ್ಕೆ ನೆರವಾಗಬೇಕೆಂದು ಬಯಸಿದೆ. ಅವರಿಗೆ ನನ್ನ ಅಗತ್ಯವೂ ಇತ್ತು. ಅಲ್ಲದೆ ಸಾಂಕ್ರಾಮಿಕ ಸಮಯದಲ್ಲಿ ನನ್ನ ಹೆಂಡತಿ ಮತ್ತು ಮಕ್ಕಳಿಗಾಗಿ ನಾನು ಇಲ್ಲಿರಬೇಕಾಗಿತ್ತು. ನಾನು 20 ವರ್ಷಗಳಿಂದ ಕ್ರಿಕೆಟ್ ಆಡುತ್ತಿದ್ದೇನೆ.
ಮುಂದೆಯೂ ಆಡುತ್ತೇನೆ ಎಂದು ನನಗೆ ತಿಳಿದಿದೆ. ಆದರೆ, ಕುಟುಂಬಕ್ಕೆ ಅಗತ್ಯವಿದ್ದಾಗ, ನೀವು ಅಲ್ಲಿರಬೇಕು. ಅದು ಬುದ್ಧಿವಂತರ ಕೆಲಸ ಎಂದು ನಾನು ಭಾವಿಸಿದ್ದೇನೆ" ಎಂದು ಸುರೇಶ್ ರೈನಾ ಹೇಳಿದ್ದಾರೆ. ಸುರೇಶ್ ರೈನಾ ಐಪಿಎಲ್ನಲ್ಲಿ 33.28ರ ಸರಾಸರಿಯಲ್ಲಿ 4527 ರನ್ ಸಿಡಿಸಿದ್ದಾರೆ. ಅವರು ಸಿಎಸ್ಕೆ ಪರ ಗರಿಷ್ಠ ರನ್ಗಳಿಸಿದ ಬ್ಯಾಟ್ಸ್ಮನ್ ಆಗಿದ್ದಾರೆ. ಮುಂದಿನ ಐಪಿಎಲ್ನಲ್ಲಿ ಸುರೇಶ್ ರೈನಾ ಸಿಎಸ್ಕೆ ಪರ ಆಡಲಿದ್ದಾರೆ ಎಂಬ ಸುಳಿವು ನೀಡಿದ್ದಾರೆ ರೈನಾ.
ಇದನ್ನು ಓದಿ:ರೆಸ್ಟೋರೆಂಟ್ನಲ್ಲಿ ಊಟ ಸೇವನೆ : ಆಟಗಾರರ ಮೇಲೆ ತನಿಖೆ ಕೈಗೊಂಡ ಬಿಸಿಸಿಐ, ಸಿಎ
