ಲಿಂಕಾನ್: ನ್ಯೂಜಿಲ್ಯಾಂಡ್ ಎ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಭಾರತ ಎ ತಂಡ 5 ವಿಕೆಟ್ಗಳ ಭರ್ಜರಿ ಜಯಗಳಿಸಿದ್ದು, ಸರಣಿಯನ್ನು 1-0ಯಲ್ಲಿ ಮುನ್ನಡೆ ಸಾಧಿಸಿದೆ.
ಕಿವೀಸ್ ಪರ ರಚಿನ್ ರವೀಂದ್ರ 49, ಟಾಮ್ ಬ್ರಸ್ 47 ಹಾಗೂ ಕೋಲ್ ಮೆಕಾಂಚಿ 34 ರನ್ಗಳಿಸಿ ತಂಡದ ಮೊತ್ತವನ್ನು 200 ಗಡಿದಾಟಿಸಿದರು. ಭಾರತದ ಪರ ಮೊಹಮ್ಮದ್ ಸಿರಾಜ್ 3, ಖಲೀಲ್ ಅಹ್ಮದ್ 2, ಅಕ್ಷರ್ ಪಟೇಲ್ 2, ವಿಜಯ್ ಶಂಕರ್ ಹಾಗೂ ರಾಹುಲ್ ಚಹಾರ್ ತಲಾ ಒಂದೊಂದು ವಿಕೆಟ್ ಪಡೆದರು.
231 ರನ್ಗಳ ಸುಲಭ ಗುರಿ ಪಡೆದ ಭಾರತ ತಂಡಕ್ಕೆ ಆರಂಭಿಕರಾದ ಪೃಥ್ವಿ ಶಾ 35 ಎಸೆತಗಳಲ್ಲಿ 5 ಬೌಂಡರಿ ಹಾಗೂ 3 ಸಿಕ್ಸರ್, ಹಾಗೂ ಮಯಾಂಕ್(29) ಮೊದಲ ವಿಕೆಟ್ಗೆ 79 ರನ್ ಸೇರಿಸಿ ಉತ್ತಮ ಆರಂಭ ನೀಡಿದರು.
ಇವರಿಬ್ಬರೂ ಜಮ್ಮಿ ನೀಶಮ್ಗೆ ವಿಕೆಟ್ ಒಪ್ಪಿಸಿದರು. ನಂತರ ಬಂದ ನಾಯಕ ಶುಬ್ಮನ್ ಗಿಲ್(30) ಹಾಗೂ ಸಂಜು ಸಾಮ್ಸನ್ ಕೂಡ ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ ನೀಡಿದರು. ಗಿಲ್ 36 ಎಸೆತಗಳಲ್ಲಿ 30 ರನ್ಗಳಿಸಿದರೆ, ಕೀವೀಸ್ ವಿರುದ್ಧ ಸೀನಿಯರ್ ಟಿ20 ತಂಡಕ್ಕೆ ಆಯ್ಕೆಯಾಗಿರುವ ಸ್ಯಾಮ್ಸನ್ ಕೇವಲ 21 ಎಸೆತಗಳಲ್ಲಿ 2 ಸಿಕ್ಸರ್ ಹಾಗೂ 3 ಬೌಂಡರಿ ನೆರವಿನಿಂದ 39 ರನ್ಗಳಿಸಿದರು. ನಂತರ ಬಂದ ಸೂರ್ಯಕುಮಾರ್ ಯಾದವ್ ಕೇವಲ 18 ಎಸೆತಗಳಲ್ಲಿ 6 ಬೌಂಡರಿ ಹಾಗೂ ಒಂದು ಸಿಕ್ಸರ್ ಸಹಿತ 35 ರನ್ಗಳಿಸಿ ಔಟಾದರು.
ವಿಜಯ್ ಶಂಕರ್ ಔಟಾಗದೆ 20, ಕೃನಾಲ್ ಪಾಂಡ್ಯ ಔಟಾಗದೆ 13 ರನ್ಗಳಿಸಿ ತಂಡವನ್ನು ಗೆಲುವಿನ ಗಡಿ ದಾಟಿಸಿದರು.
