ಕರಾಚಿ( ಪಾಕಿಸ್ತಾನ): ಸ್ಥಿರ ಆಧಾರದಲ್ಲಿ ತಮ್ಮ ತಂಡಕ್ಕೆ ಕೊಡುಗೆ ನೀಡುವ ಸಲುವಾಗಿ ತಮ್ಮ ಬ್ಯಾಟಿಂಗ್ ಬಗ್ಗೆ ಹೆಚ್ಚಿನ ಆಸಕ್ತಿ ನೀಡಲಾಗಿವುದು ಎಂದು ದಕ್ಷಿಣ ಆಫ್ರಿಕಾದ ವೇಗದ ಬೌಲರ್ ಕಗಿಸೋ ರಬಾಡ ಹೇಳಿದ್ದಾರೆ.
ಪಾಕಿಸ್ತಾನ ವಿರುದ್ಧ ನಡೆಯುತ್ತಿರುವ ಟೆಸ್ಟ್ ಪಂದ್ಯದಲ್ಲಿ ಸೌತ್ ಆಫ್ರಿಕಾ ಉತ್ತಮ ಸ್ಥಿತಿಯಲ್ಲಿದೆ. ಐಡೆನ್ ಮಾರ್ಕ್ರಾಮ್ ಮತ್ತು ರಾಸ್ಸಿ ವಾನ್ ಡೆರ್ ಡುಸೆನ್ ಎರಡನೇ ಇನ್ನಿಂಗ್ಸ್ನಲ್ಲಿ ಕ್ರಮವಾಗಿ 74 ಮತ್ತು 64 ರನ್ ಗಳಿಸಿ ತಂಡಕ್ಕೆ ಭದ್ರ ಬುನಾದಿ ಹಾಕಿದ್ದಾರೆ. ಮೂರನೇ ಅಂತ್ಯಕ್ಕೆ ಸೌತ್ ಆಫ್ರಿಕಾ 187 ರನ್ಗೆ ಪ್ರಮುಖ 4 ವಿಕೆಟ್ ಕಳೆದುಕೊಂಡಿದ್ದು , 29 ರನ್ ಲೀಡ್ ಇದೆ. ಕೇಶವ್ ಮಹಾರಾಜ್ ಮತ್ತು ಕ್ವಿಂಟನ್ ಡಿ ಕಾಕ್ ಕ್ರಮವಾಗಿ 2 ಮತ್ತು 0 ರನ್ ಗಳಿಸಿ ಕ್ರಿಸ್ನಲ್ಲಿದ್ದಾರೆ.
"ಕೆಲವೊಂದು ಬಾರಿ ತಂಡ ಬ್ಯಾಟಿಂಗ್ನಲ್ಲಿ ಕುಸಿತ ಕಂಡಾಗ ಮಧ್ಯಮ ಕ್ರಮಾಂಕ ಮತ್ತು ಕೇಳ ಕ್ರಮಾಂಕದ ಆಟಗಾರರ ಮೇಲೆ ಅಧಿಕ ಒತ್ತಡ ಬೀಳುತ್ತದೆ. ಆದ್ದರಿಂದ ಆಗ ನಾನು ತಂಡಕ್ಕೆ ನನ್ನದೇ ಆದ ಕೊಡುಗೆ ನೀಡುವ ಅವಶ್ಯಕತೆ ಇರುವುದರಿಂದ ಬೌಲಿಂಗ್ ಜೊತೆ ಬ್ಯಾಟಿಂಗ್ ಕಡೆ ಹೆಚ್ಚು ಗಮನಹರಿಸುತ್ತಿದ್ದೇನೆ ಎಂದು ರಬಾಡ ಹೇಳಿದ್ದಾರೆ.
ಓದಿ : ದ.ಆಫ್ರಿಕಾ ಪರ ವೇಗವಾಗಿ 200 ವಿಕೆಟ್ ಪಡೆದ 3ನೇ ಬೌಲರ್ ಕಗಿಸೋ ರಬಾಡ
ಪಾಕಿಸ್ತಾನ ವಿರುದ್ಧದ ಮೊದಲ ಪಂದ್ಯದಲ್ಲಿ ರಬಾಡ ವೃತ್ತಿ ಜೀವನದಲ್ಲಿ 200 ವಿಕೆಟ್ ಪೂರೈಸಿದ್ದಾರೆ. ಈ ಮೂಲಕ ಈ ಸಾಧನೆ ಮಾಡಿದ ದಕ್ಷಿಣ ಆಫ್ರಿಕಾದ 8ನೇ ಹಾಗೂ ವೇಗವಾಗಿ 200 ವಿಕೆಟ್ ಪಡೆದ 3ನೇ ಬೌಲರ್ ಎಂಬ ಖ್ಯಾತಿಗೆ ಪಾತ್ರರಾಗಿದ್ದಾರೆ. ಮೊದಲ ಟೆಸ್ಟ್ ಪಂದ್ಯದ ಮೂರನೇ ದಿನ ಪಾಕಿಸ್ತಾನದ ಹಸನ್ ಅಲಿ ವಿಕೆಟ್ ಪಡೆಯುವ ಮೂಲಕ ರಬಾಡ ಈ ವಿಶೇಷ ಸಾಧನೆ ಮಾಡಿದರು.
25 ವರ್ಷದ ವೇಗಿ ರಬಾಡ ತಮ್ಮ 44ನೇ (78ನೇ ಟೆಸ್ಟ್ ಇನ್ನಿಂಗ್ಸ್) ಟೆಸ್ಟ್ ಪಂದ್ಯದಲ್ಲಿ ಈ ಸಾಧನೆ ಮಾಡಿದ್ದಾರೆ. ಈ ಮೊದಲು ಸ್ಟೈನ್ 39 ಪಂದ್ಯಗಳಲ್ಲಿ, ಡೊನಾಲ್ಡ್ 42 ಟೆಸ್ಟ್ ಪಂದ್ಯಗಳಲ್ಲಿ ಈ ಸಾಧನೆ ಮಾಡಿದ್ದರು. ಜೊತೆಗೆ ದಕ್ಷಿಣ ಆಫ್ರಿಕಾ ಪರ 200ಕ್ಕೂ ಹೆಚ್ಚು ವಿಕೆಟ್ ಪಡೆದ 8ನೇ ಬೌಲರ್ ಎನಿಸಿಕೊಂಡಿದ್ದಾರೆ.
ಮಾಜಿ ವೇಗಿ ಡೇಲ್ ಸ್ಟೈನ್ ಹರಿಣಗಳ ಪರ ಗರಿಷ್ಠ ವಿಕೆಟ್ ಪಡೆದ ಬೌಲರ್ ಆಗಿದ್ದಾರೆ. ಅವರು 93 ಪಂದ್ಯಗಳಿಂದ 439 ವಿಕೆಟ್ ಪಡೆದಿದ್ದಾರೆ. ಶಾನ್ ಪೊಲಾಕ್(421), ಮಖಾಯ ಎಂಟಿನಿ(390), ಅಲನ್ ಡೊನಾಲ್ಡ್(330), ಜಾಕ್ ಕಾಲೀಸ್(291), ವೆರ್ನಾನ್ ಫಿಲಾಂಡರ್(224) ಈ ಮೊದಲು 200+ ವಿಕೆಟ್ ಪಡೆದಿದ್ದಾರೆ. ರಬಡಾ 75 ಏಕದಿನ ಪಂದ್ಯಗಳಿಂದ 117, 26 ಟಿ-20 ಪಂದ್ಯಗಳಿಂದ 31 ವಿಕೆಟ್ ಪಡೆದಿದ್ದಾರೆ.
