ಏಷ್ಯಾಕಪ್​ನಲ್ಲಿ ಮಿಂಚುತ್ತಿರುವ ಪಾಕ್​ ಬೌಲರ್ಸ್​​​: ಆಡಿರುವ ಮೂರು ಪಂದ್ಯಗಳಲ್ಲಿ 23 ವಿಕೆಟ್​ ಉರುಳಿಸಿರುವ ವೇಗಿಗಳು

ಏಷ್ಯಾಕಪ್​ ಸರಣಿಯಲ್ಲಿ ಪಾಕಿಸ್ತಾನದ ವೇಗಿಗಳು​ ಈ ವರೆಗೂ ಆಡಿರುವ ಮೂರು ಪಂದ್ಯಗಳಲ್ಲಿ 23 ವಿಕೆಟ್​ಗಳನ್ನು ಉರುಳಿಸಿದ್ದಾರೆ.

ಪಾಕಿಸ್ತಾನದ ವೇಗಿಗಳು ಏಷ್ಯಾಕಪ್​ನಲ್ಲಿ ತಮ್ಮ ಮಾರಕ ದಾಳಿಯ ಮೂಲಕ ವಿಶ್ವಕಪ್​ಗೂ ಮುನ್ನ ತಮ್ಮ ತಂಡದ ಬಗ್ಗೆ ಎಚ್ಚರಿಕೆ ಸಂದೇಶವನ್ನು ರವಾನಿಸಿದ್ದಾರೆ. ಏಷ್ಯಾಕಪ್​ನಲ್ಲಿ ಪಾಕಿಸ್ತಾನ ಆಡಿರುವ ಮೂರು ಪಂದ್ಯದಲ್ಲಿ ತಂಡದ ಮೂವರ ವೇಗಿಗಳು ಗರಿಷ್ಠ ವಿಕೆಟ್​ಗಳನ್ನು ಕಬಳಿಸಿದ್ದಾರೆ. ಜತೆಗೆ 145 ಕಿ.ಮೀ ವೇಗದಲ್ಲಿ ಬೌಲಿಂಗ್​ ಮಾಡುತ್ತಿರುವ ಶಾಹೀನ್ ಅಫ್ರಿದಿ, ನಸೀಮ್ ಶಾ, ಹ್ಯಾರಿಸ್ ರೌಫ್ ಎದುರಾಳಿಗಳನ್ನು ಕಾಡುತ್ತಿದ್ದಾರೆ.

ಸದ್ಯ ಪಾಕಿಸ್ತಾನ ತಂಡ ಏಷ್ಯಾಕಪ್​ನಲ್ಲಿ ಆಡಿದ ಮೂರು ಪಂದ್ಯದಲ್ಲಿ ಎದುರಳಿ ತಂಡವನ್ನು ಆಲ್​ಔಟ್ ಮಾಡಿರುವುದು ವಿಶೇಷ. ಯಾವುದೇ ತಂಡಕ್ಕೂ ಸಂಪೂರ್ಣ 50 ಓವರ್ ಆಡಲು ಅವಕಾಶ ಮಾಡಿಕೊಟ್ಟಿಲ್ಲ. ನೇಪಾಳದ ವಿರುದ್ಧದ ಮೊದಲ ಪಂದ್ಯದಲ್ಲಿ ಕ್ರಿಕೆಟ್​ ಶಿಶುಗಳನ್ನು 23.4 ಓವರ್​ಗೆ 104 ರನ್​ಗೆ ಆಲ್​ಔಟ್​ ಮಾಡಿತ್ತು. ​ಭಾರತ ವಿರುದ್ಧದ ಪಂದ್ಯದಲ್ಲಿ 48.5 ಓವರ್​ಗೆ 266 ರನ್​ಗೆ 10 ವಿಕೆಟ್​ ಉರುಳಿಸಿತ್ತು. ಈ ಪಂದ್ಯದಲ್ಲಿ ಎಲ್ಲ 10 ವಿಕೆಟ್​ಗಳನ್ನು ವೇಗಿಗಳೇ ಪಡೆದಿದ್ದರು. ಇನ್ನು ನಿನ್ನೆಯ ಬಾಂಗ್ಲಾ ವಿರುದ್ಧದ ಸೂಪರ್​ ಫೋರ್​ ಮೊದಲ ಪಂದ್ಯದದಲ್ಲೂ 38.4 ಓವರ್​ಗಳಲ್ಲಿ 193 ರನ್​ಗೆ ಬಾಂಗ್ಲಾವನ್ನು ಸರ್ವಪತನಗೊಳಿಸುವಲ್ಲಿ ಪಾಕಿಸ್ತಾನ ಯಶಸ್ವಿಯಾಗಿದೆ.​ ಈ ಪಂದ್ಯದಲ್ಲೂ ಪಾಕಿಸ್ತಾನದ ವೇಗಿಗಳು 8 ವಿಕೆಟ್​ಗಳ ಪಡೆದು ಮಿಂಚಿದ್ದರು.

ಏಷ್ಯಾಕಪ್​ನಲ್ಲಿ ಪಾಕ್​ 30 ವಿಕೆಟ್​ಗಳು ಉರುಳಿಸಿದೆ​. ಇದರಲ್ಲಿ ಬಹು ಪಾಲು ವಿಕೆಟ್​ಗಳನ್ನು ಶಾಹೀನ್ ಅಫ್ರಿದಿ, ನಸೀಮ್ ಶಾ ಮತ್ತು ಹ್ಯಾರಿಸ್ ರೌಫ್ ಪಡೆದಿದ್ದು, ಈ ಮೂರು ಜೋಡಿ ಸರಣಿಯಲ್ಲಿ 23 ವಿಕೆಟ್​ಗಳನ್ನು ಉರುಳಿಸಿವೆ. ನಿನ್ನೆಯ ಪಂದ್ಯದಲ್ಲಿ ಫಹೀಮ್ ಅಶ್ರಫ್ 1 ವಿಕೆಟ್​ ಪಡೆದಿದ್ದಾರೆ. ಫಹೀಮ್ ಅಶ್ರಫ್ ಪಾಕ್​ನ ಮಧ್ಯಮ ವೇಗದ ಬೌಲರ್ ಆಗಿದ್ದಾರೆ. ಉಳಿದಂತೆ ನೇಪಾಳದ ವಿರುದ್ಧದ ಪಂದ್ಯದಲ್ಲಿ ಸ್ಪಿನ್ನರ್​ ಶಾದಾಬ್ ಖಾನ್ 4 ವಿಕೆಟ್​ ಪಡೆದು ಕಮಾಲ್​ ಮಾಡಿದ್ದರು.

ಒಟ್ಟಾರೆ ನೋಡುವುದಾದರೆ ಶಾಹೀನ್​ ಅಫ್ರಿದಿ 41 ಏಕದಿನ ಪಂದ್ಯದಲ್ಲಿ 40 ಇನ್ನಿಂಗ್ಸ್​ಗಳನ್ನು ಆಡಿದ್ದು, 1,836 ರನ್​ ನೀಡಿ 82 ವಿಕೆಟ್​ ಪಡೆದುಕೊಂಡಿದ್ದಾರೆ. 5.37 ಅವರ ಎಕಾನಮಿ ಆಗಿದೆ. 35 ರನ್​ ಕೊಟ್ಟು 6 ವಿಕೆಟ್​ ಪಡೆದಿರುವುದು ಆಗಿದೆ.​ ಯುವ ಆಟಗಾರ ನಸೀಮ್​ ಶಾ 12 ಏಕದಿನ ಪಂದ್ಯದಲ್ಲಿ 456 ರನ್​ ಕೊಟ್ಟು 29 ವಿಕೆಟ್​ ಕಬಳಿಸಿದ್ದಾರೆ

ಕಡಿಮೆ ಇನ್ನಿಂಗ್ಸ್​ನಲ್ಲಿ 50 ವಿಕೆಟ್​ ಪಡೆದ ಬೌಲರ್​: ಪಾಕಿಸ್ತಾನದ ಹ್ಯಾರಿಸ್​ ರೌಫ್ ಏಕದಿನ ಪಂದ್ಯದಲ್ಲಿ ವೇಗವಾಗಿ 50 ವಿಕೆಟ್​ ಪಡೆದ ಪಾಕಿಸ್ತಾನದ 4ನೇ ಬೌಲರ್​ ಆದರು. ರೌಫ್​ 27 ಇನ್ನಿಂಗ್ಸ್​ನಿಂದ 50 ವಿಕೆಟ್​ ಪಡೆದಿದ್ದಾರೆ. ಹಸನ್​ ಅಲಿ 24, ಶಹೀನ್​ ಅಫ್ರಿದಿ 25 ಮತ್ತು ವಕಾರ್ ಯೂನಿಸ್ 27 ಪಂದ್ಯದಿಂದ 50 ವಿಕೆಟ್​ ಸಾಧನೆ ಮಾಡಿದ ಅಗ್ರ ಮೂವರಾಗಿದ್ದಾರೆ.

ಏಷ್ಯಾಕಪ್​ನಲ್ಲಿ ಹೆಚ್ಚಿನ ವಿಕೆಟ್ ಪಡೆದ ಬೌಲರ್​

• ಹ್ಯಾರಿಸ್​ ರೌಫ್ 3 ಪಂದ್ಯಗಳಲ್ಲಿ 20 ಓವರ್​ ಬೌಲಿಂಗ್​ ಮಾಡಿ 9 ವಿಕೆಟ್​ಗಳನ್ನು ಪಡೆದಿದ್ದಾರೆ.
• ನಸೀಮ್​ ಶಾ 3 ಪಂದ್ಯ, 19.1 ಓವರ್​, 7 ವಿಕೆಟ್​
• ಶಾಹೀನ್​ ಶಾ ಆಫ್ರಿದಿ, 22 ಓವರ್​, 7 ವಿಕೆಟ್​ ​ ​
• ಬಾಂಗ್ಲಾದ ಟಸ್ಕಿನ್​ ಅಹ್ಮದ್ 3 ಪಂದ್ಯ, 15.3 ಓವರ್​, 5 ವಿಕೆಟ್​
• ಶ್ರೀಲಂಕಾದ ಮತೀಶ್​ ಪಥಿರಾಣ 2 ಪಂದ್ಯ, 17.4 ಓವರ್​, 5 ವಿಕೆಟ್​

​ ಇದನ್ನೂ ಓದಿ: 'ಗಬ್ಬರ್​​ಸಿಂಗ್​' ಶಿಖರ್​ ಧವನ್​ ಭಾವನಾತ್ಮಕ ಸಂದೇಶ: ವಿಶ್ವಕಪ್​ ಗೆದ್ದು ಬನ್ನಿ ಎಂದು ತಂಡಕ್ಕೆ ಶುಭ ಹಾರೈಕೆ