ದುಬೈ: ಭಾರತ-ಪಾಕಿಸ್ತಾನ ನಡುವಣ ಪಂದ್ಯವೇ ಹಾಗೇ. ಅದರ ಬಿಸಿ ಅಷ್ಟಿಷ್ಟಲ್ಲ. ಉಭಯ ತಂಡಗಳ ನಡುವಿನ ಸೆಣಸಾಟವನ್ನು ಬರೀ ಎರಡು ದೇಶವಲ್ಲ, ವಿಶ್ವದ ಗಮನ ಸೆಳೆಯುತ್ತದೆ. ಇಂದು ರಾತ್ರಿ ನಡೆಯುವ "ಕ್ರಿಕೆಟ್ ಮಹಾಯುದ್ಧ"ಕ್ಕೆ ದುಬೈ ಭೂಮಿಕೆ ಸಿದ್ಧಪಡಿಸಿದೆ. ವರ್ಷಗಳ ಬಳಿಕ ನಡೆಯುತ್ತಿರುವ ಸಾಂಪ್ರದಾಯಿಕ ಎದುರಾಳಿಗಳ ಪಂದ್ಯದ ಮೇಲೆ ಎಲ್ಲರ ಚಿತ್ತವೂ ನೆಟ್ಟಿದೆ.
ದುಬೈನಲ್ಲಿ ಬೀಡುಬಿಟ್ಟಿರುವ ಉಭಯ ತಂಡಗಳ ಸದಸ್ಯರು ಬಿಡುವಿನ ವೇಳೆ ಪರಸ್ಪರ ಭೇಟಿ ಕೂಡ ಮಾಡಿದ್ದಾರೆ. ಮೊನ್ನೆಯಷ್ಟೇ ಭಾರತದ ವಿರಾಟ್ ಕೊಹ್ಲಿ ಪಾಕಿಸ್ತಾನದ ನಾಯಕ ಬಾಬರ್ ಅಜಮ್ರನ್ನು ಅಭ್ಯಾಸದ ಅವಧಿಯಲ್ಲಿ ಭೇಟಿ ಮಾಡಿ ಕೈ ಕುಲುದ್ದರು. ನಿನ್ನೆ ನಾಯಕ ರೋಹಿತ್ ಶರ್ಮಾ-ಬಾಬರ್ ಅಜಂ ಸಂಧಿಸಿದ್ದರು.
ಈ ಬಗ್ಗೆ ಮಾಧ್ಯಮಗೋಷ್ಠಿಯಲ್ಲಿ ರೋಹಿತ್ ಶರ್ಮಾರಿಗೆ ಪ್ರಶ್ನೆಯೊಂದು ಎದುರಾದಾಗ, ಪಾಕಿಸ್ತಾನ ಮತ್ತು ಭಾರತದ ನಡುವಿನ ಪಂದ್ಯ ಮೈದಾನದ ಹೊರಗೆ ಭಾರಿ ಸದ್ದು ಮಾಡುತ್ತಿರುತ್ತದೆ. ಆದರೆ, ಮೈದಾನದಲ್ಲಿ ಎಲ್ಲವೂ ಸಹಜವಾಗಿರುತ್ತದೆ. ಆಟಗಾರರು ಪರಸ್ಪರ ಭೇಟಿ ಮಾಡಿ ಮಾತನಾಡುವುದರಲ್ಲಿ ವಿಶೇಷವೇನಿಲ್ಲ ಎಂದಿದ್ದರು.
ಪಾಕಿಸ್ತಾನ ತಂಡದ ನಾಯಕ ಬಾಬರ್ ಅಜಂಗೆ ವಾತಾವರಣ ಬಿಸಿಯಾಗಿದೆಯಾ ಎಂದು ಪ್ರಶ್ನೆ ಕೇಳಲಾಗಿತ್ತು. ತಕ್ಷಣವೇ ಬಾಬರ್ ಹೌದು, ದುಬೈ ವಾತಾವರಣ ಸ್ಪಲ್ಪ ಬಿಸಿ ಎಂದರು. ಬಳಿಕ ಪ್ರಶ್ನೆಯ ಆಳ ಅರಿತು, ನಾವು ಬಿಸಿಯನ್ನು ಹೆಚ್ಚಾಗಿ ಪರಿಗಣಿಸುವುದಿಲ್ಲ. ಭಾರತ ನಮ್ಮ ನಡುವಿನ ಪಂದ್ಯ ಸಹಜವಾಗಿರುತ್ತದೆ ಎಂದು ನಸುನಕ್ಕರು.
1. ಕೊಹ್ಲಿ ಬೆಂಬಲಿಸಿದ್ದ ಬಾಬರ್: ವಿರಾಟ್ ಕೊಹ್ಲಿ ಅವರ ಬ್ಯಾಟಿಂಗ್ ವೈಫಲ್ಯದ ಬಗ್ಗೆ ನಿರಂತರ ಟೀಕೆ ವ್ಯಕ್ತವಾದಾಗ ಈ ಬಗ್ಗೆ ಟ್ವೀಟ್ ಮಾಡಿದ್ದ ಪಾಕ್ ನಾಯಕ ಬಾಬರ್ ಅಜಂ, "ಈ ದಿನಗಳು ಕಳೆದು ಹೋಗಲಿವೆ. ದೃಢವಾಗಿರಿ" ಎಂದು ಧೈರ್ಯ ತುಂಬುವ ಮಾತನ್ನಾಡಿದ್ದರು. ಇದಕ್ಕೆ ಕೊಹ್ಲಿ ಕೂಡ ಟ್ವೀಟ್‌ನಲ್ಲೇ ಧನ್ಯವಾದ ಹೇಳಿದ್ದರು.
2. ಬಾಬರ್ ಹೊಗಳಿದ ಕೊಹ್ಲಿ: ನಿನ್ನೆಯಷ್ಟೇ ವಿರಾಟ್ ಕೊಹ್ಲಿ, ಬಾಬರ್ ಅಜಂ ವಿಶ್ವ ಕ್ರಿಕೆಟ್ನ ಅಗ್ರ ಬ್ಯಾಟರ್ ಎಂದು ಗುಣಗಾನ ಮಾಡಿದ್ದರು. ಅವರ ಜೊತೆಗಿನ ಮಾತುಕತೆ ವೇಳೆ ಸಾಕಷ್ಟು ಗೌರವಯುತವಾಗಿ ನಡೆದುಕೊಳ್ಳುತ್ತಾರೆ. ಬಾಬರ್ ಕ್ರಿಕೆಟ್ ಬುನಾದಿ ಗಟ್ಟಿಯಾಗಿದೆ. ಮೂರೂ ಫಾರ್ಮೆಟ್ಗಳಲ್ಲಿ ಅವರ ಸ್ಥಿರ ಪ್ರದರ್ಶನವೇ ಅವರನ್ನು ಉನ್ನತ ಹಂತಕ್ಕೆ ಕರೆತಂದಿದೆ ಎಂದು ಹೊಗಳಿದ್ದರು.
3. ಕೊಹ್ಲಿಗೆ ಶಾಹೀನ್ ಆಲ್ ದ ಬೆಸ್ಟ್: ಇಷ್ಟಲ್ಲದೇ, ಗಾಯದ ಕಾರಣ ಟೂರ್ನಿಯಿಂದ ಹೊರಬಿದ್ದಿರುವ ಪಾಕ್ ವೇಗಿ ಶಾಹೀನ್ ಆಫ್ರಿದಿ ಕೂಡ ಕೊಹ್ಲಿಗೆ ಆಲ್ ದಿ ಬೆಸ್ಟ್ ಹೇಳಿದ್ದಾರೆ. "ನೀವು ಮತ್ತೆ ಹಳೆಯ ಲಯಕ್ಕೆ ಮರಳಿ ಬನ್ನಿ. ಇದಕ್ಕಾಗಿ ನಾನು ಪ್ರಾರ್ಥಿಸುತ್ತೇನೆ. ನೀವು ಮತ್ತೆ ಅಬ್ಬರಿಸುವುದನ್ನು ನೋಡಲು ನಾನು ಬಯಸುತ್ತೇನೆ" ಎಂದು ಟ್ವೀಟಿಸಿದ್ದರು.
4. ಕೊಹ್ಲಿ ಲಯದ ಕತೆ ಏನು?: ಮೂರು ವರ್ಷಗಳಿಂದ ಲಯದ ಸಮಸ್ಯೆ ಎದುರಿಸುತ್ತಿರುವ ವಿರಾಟ್ ಕೊಹ್ಲಿ, ಈಚೆಗಷ್ಟೇ ತಾವು ಮಾನಸಿಕವಾಗಿ ಕುಗ್ಗಿರುವ ಬಗ್ಗೆ ಹೇಳಿಕೊಂಡಿದ್ದರು. ಫಾರ್ಮ್ಗೆ ಮರಳಲು ತಾವು ಪಡುತ್ತಿರುವ ಕಷ್ಟ ಮತ್ತು ಅದರಿಂದಾಗುತ್ತಿರುವ ಮಾನಸಿಕ ವೇದನೆ ಬಗ್ಗೆ ಹೇಳಿಕೊಂಡಿದ್ದರು.
5. 'ನಾನು ಒಂದು ತಿಂಗಳು ಬ್ಯಾಟ್ ಮುಟ್ಟಿರಲಿಲ್ಲ': 10 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ನಾನು ಒಂದು ತಿಂಗಳು ಬ್ಯಾಟ್ ಮುಟ್ಟಿರಲಿಲ್ಲ. ಇತ್ತೀಚೆಗೆ ನಾನು ದೃಢವಾಗಿದ್ದೇನೆ ಎಂಬುದನ್ನು ತೋರಿಕೆ ರೀತಿಯಲ್ಲಿ ನಡೆದುಕೊಳ್ಳುತ್ತಿದ್ದೆ. ಅದು ಎಷ್ಟು ಕಷ್ಟ ಎಂಬುದು ನನಗೆ ಮಾತ್ರ ಗೊತ್ತು ಎಂದು ಕೊಹ್ಲಿ ಹೇಳಿದ್ದರು. ಇದರಿಂದಾಗಿ ಅವರು ಏಷ್ಯಾ ಕಪ್ ಟೂರ್ನಿಯಲ್ಲಾದರೂ ಲಯ ಕಂಡುಕೊಂಡು ಹಳೆಯ ಖದರ್ ತೋರುತ್ತಾರಾ ಎಂಬ ಬಗ್ಗೆಯೂ ಅಭಿಮಾನಿಗಳ ಕಣ್ಣಿದೆ.
6. ಎಲ್ಲ ಟಿಕೆಟ್ಗಳು ಬಿಕರಿ: ಭಾರತ- ಪಾಕಿಸ್ತಾನ ನಡುವಣ ಪಂದ್ಯದ ಟಿಕೆಟ್ಗಳು ಎಂದಿಗೂ ಖಾಲಿ ಬಿದ್ದಿದ್ದಿಲ್ಲ. ಪಂದ್ಯ ಎಲ್ಲೇ ನಡೆದರೂ ಇನ್ನಿಲ್ಲದ ಬೇಡಿಕೆ ಇರುತ್ತದೆ. ಇಂದಿನ ಪಂದ್ಯದ ಎಲ್ಲಾ ಟಿಕೆಟ್ಗಳು ಬಿಕರಿಯಾಗಿವೆ. ಅಭಿಮಾನಿಗಳು ಪಂದ್ಯವನ್ನು ಚಿಯರ್ ಮಾಡಲು ತುದಿಗಾಲಲ್ಲಿ ನಿಂತಿದ್ದಾರೆ. ಟಿಕೆಟ್ ಸಿಗದವರಿಗೆ ಅನುಕೂಲವಾಗಲು ರೆಸ್ಟೋರೆಂಟ್‌ಗಳು ಮತ್ತು ಶಾಪಿಂಗ್ ಮಾಲ್‌ಗಳ ಮುಂದೆ ದೊಡ್ಡ ಪರದೆಯ ಮೇಲೆ ಪಂದ್ಯದ ನೇರಪ್ರಸಾರಕ್ಕೆ ಏರ್ಪಾಟು ಮಾಡಲಾಗಿದೆ.
7. ತಂಡಗಳ ಮುಖಾಮುಖಿ: ಭಾರತ ಪಾಕ್ ಈವರೆಗೂ 9 ಬಾರಿ ಮುಖಾಮುಖಿಯಾಗಿವೆ. ಇದರಲ್ಲಿ ಭಾರತ ಪಾರಮ್ಯ ಮೆರೆದು 7 ಬಾರಿ ಗೆಲುವು ಸಾಧಿಸಿದ್ದರೆ, ಪಾಕಿಸ್ತಾನ 2 ಬಾರಿ ಮಾತ್ರ ಜಯಿಸಿದೆ. ಕಳೆದ ಟಿ-20 ವಿಶ್ವಕಪ್ನಲ್ಲಿ ಪಾಕಿಸ್ತಾನ, ಭಾರತದ ವಿರುದ್ಧ 10 ವಿಕೆಟ್ ಗೆಲುವು ಸಾಧಿಸಿತ್ತು. ಇದಕ್ಕೆ ಉತ್ತರವಾಗಿ ಭಾರತ ಈ ಪಂದ್ಯದಲ್ಲಿ ಗೆದ್ದು ಮುಯ್ಯಿ ತೀರಿಸಿಕೊಳ್ಳಲು ಕಣಕ್ಕಿಳಿಯಲಿದೆ.
ಇದನ್ನೂ ಓದಿ: ಬಾಬರ್ ಆಜಂ ವಿಶ್ವದ ಅತ್ಯುತ್ತಮ ಬ್ಯಾಟರ್: ವಿರಾಟ್ ಕೊಹ್ಲಿ
