ಟೀಸರ್ ಹಾಗು ಚಿತ್ರದ ವಿಶೇಷವಾದ ಶೀರ್ಷಿಕೆಯಿಂದ '777 ಚಾರ್ಲಿ' ಸಿನಿಮಾ ಸದ್ದು ಮಾಡುತ್ತಿದೆ. ಅವನೇ ಶ್ರೀಮನ್ನಾರಾಯಣ ನಂತರ ನಟ ರಕ್ಷಿತ್ ಶೆಟ್ಟಿ ಅಭಿನಯದ ಹೊಸ ಸಿನಿಮಾ ಇದಾಗಿದೆ.
ಗೌರಿಗಣೇಶ ಹಬ್ಬದ ಪ್ರಯುಕ್ತ ಸಿನಿಮಾದ ಮೊದಲ ಹಾಡು ಬಿಡುಗಡೆ ಆಗಿದೆ. ನಾಯಕ ನಟ ಮತ್ತು ಚಾರ್ಲಿ ಎಂಬ ಶ್ವಾನದ ನಡುವಿನ ಹಾಡು ಇದಾಗಿದೆ. ಟಾರ್ಚರ್ ಸಾಂಗ್ ಎಂದೇ ಹೇಳಲಾಗುತ್ತಿದ್ದು ಶ್ವಾನವನ್ನು ಇಷ್ಟ ಪಡುವ ಜನರಿಗೆ ಈ ಹಾಡು ಇಷ್ಟವಾಗಬಲ್ಲದು.
ಈ ಹಾಡಿನಲ್ಲಿ ಧರ್ಮನ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ರಕ್ಷಿತ್ ಶೆಟ್ಟಿ ಹಾಗೂ ಶ್ವಾನ ಚಾರ್ಲಿ ನಡುವಿನ ಜಗಳವೇ ಹೈಲೆಟ್ ಆಗಿದೆ. ಶ್ವಾನ ಚಾರ್ಲಿ ಕೊಡುವ ಕಾಟಕ್ಕೆ ರಕ್ಷಿತ್ ಶೆಟ್ಟಿ ಸುಸ್ತಾಗಿ ಹೋಗುತ್ತಾರೆ. ಈ ಚಿತ್ರಕ್ಕೆ ಕಿರಣ್ರಾಜ್ ನಿರ್ದೇಶನವಿದೆ. ನೋಬಿನ್ ಪೌಲ್ ಸಂಗೀತ ನಿರ್ದೇಶನ ಮಾಡಿದ್ದಾರೆ.
ಕನ್ನಡ ಮಾತ್ರವಲ್ಲದೆ ತೆಲುಗು, ಮಲಯಾಳಂ, ಹಿಂದಿ ಮತ್ತು ತಮಿಳಿನಲ್ಲೂ 777 ಚಾರ್ಲಿ ಹಾಡು ಬಿಡುಗಡೆ ಆಗಿದೆ. ಕನ್ನಡ ಅವತರಣಿಕೆಗೆ ವಿಜಯ್ ಪ್ರಕಾಶ್ ಧ್ವನಿ ನೀಡಿದ್ದಾರೆ. ನಾಗಾರ್ಜುನ್ ಶರ್ಮಾ ಸಾಹಿತ್ಯವಿದೆ.
ಸಿನಿಮಾ ರಿಲೀಸ್ ಡೇಟ್:
ರಕ್ಷಿತ್ ಶೆಟ್ಟಿ ಅವರಿಗೆ ಲಕ್ಕಿ ತಿಂಗಳಾಗಿರುವ ಡಿಸೆಂಬರ್ 31ರಂದು ಸಿನಿಮಾ ಬಿಡುಗಡೆ ಮಾಡಲು ನಿರ್ಧರಿಸಲಾಗಿದೆ. ಈ ಹಿಂದೆ ಕಿರಿಕ್ ಪಾರ್ಟಿ ಹಾಗು ಅವನೇ ಶ್ರೀಮನ್ನಾರಾಯಣ ಸಿನಿಮಾಗಳು ಡಿಸೆಂಬರ್ ತಿಂಗಳಲ್ಲಿಯೇ ಬಿಡುಗಡೆ ಆಗಿ ಯಶಸ್ಸು ಕಂಡಿದ್ದವು. ಈ ಸೆಂಟಿಮೆಂಟ್ನಿಂದಲೇ ಮುಂದಿನ ಈ ಸಿನಿಮಾವನ್ನು ಡಿಸೆಂಬರ್ 31ಕ್ಕೆ ಬಿಡುಗಡೆ ಮಾಡಲು ತೀರ್ಮಾನಿಸಲಾಗಿದೆ ಎಂದು ಚಿತ್ರತಂಡ ಹೇಳಿದೆ.
ರಕ್ಷಿತ್ ಶೆಟ್ಟಿಗೆ ಸಂಗೀತ ಶೃಂಗೇರಿ ನಾಯಕಿಯಾಗಿ ಅಭಿನಯಿಸಿದ್ದಾರೆ. ರಾಜ್ ಬಿ.ಶೆಟ್ಟಿ, ಡ್ಯಾನಿಶ್ ಸೇಠ್ ಸೇರಿದಂತೆ ಸಾಕಷ್ಟು ಕಲಾವಿದರ ದಂಡು ಚಿತ್ರದಲ್ಲಿದೆ.
