ವಾಷಿಂಗ್ಟನ್: ಜಗತ್ತಿನಾದ್ಯಂತ ಇರುವ ತ್ಯಾಜ್ಯ ಸಂಗ್ರಹಣಾ ಪ್ರದೇಶಗಳು ಹೊರಸೂಸುವ ಮೀಥೇನ್ ಅನ್ನು ಪತ್ತೆಹಚ್ಚಲು ನಾಸಾ ಸಂವೇದಕಗಳು ಶೀಘ್ರದಲ್ಲೇ ವಿಜ್ಞಾನಿಗಳಿಗೆ ಸಹಾಯ ಮಾಡಲಿವೆ ಎಂದು ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ಹೇಳಿದೆ. ಕಾರ್ಬನ್ ಮ್ಯಾಪರ್ ಎಂಬ ಲಾಭದ ಉದ್ದೇಶವಿಲ್ಲದ ಗುಂಪಿನ ಹೊಸ ಯೋಜನೆಯು ನಾಸಾ ಉಪಕರಣಗಳು ಮತ್ತು ಡೇಟಾವನ್ನು ಜಗತ್ತಿನಾದ್ಯಂತ ತ್ಯಾಜ್ಯ ಸಂಗ್ರಹಣಾ ಪ್ರದೇಶಗಳಂಥ ಘನ ತ್ಯಾಜ್ಯ ಸ್ಥಳಗಳಿಂದ ಮಿಥೇನ್ ಹೊರಸೂಸುವಿಕೆ ಅಳೆಯಲು ಬಳಸಲಿದೆ.
ಪ್ರಸ್ತುತ ಜಾಗತಿಕ ತ್ಯಾಜ್ಯ ವಲಯದಿಂದ ಮೀಥೇನ್ ಹೊರಸೂಸುವಿಕೆಯ ಬಗ್ಗೆ ಇರುವ ಮಾಹಿತಿ ಬಹಳ ಸೀಮಿತವಾಗಿದೆ. ತ್ಯಾಜ್ಯ ತಾಣಗಳಿಂದ ಹೆಚ್ಚಿನ ಮಿಥೇನ್ ಹೊರಸೂಸುವಿಕೆ ಬಿಂದುಗಳ ಮೂಲಗಳ ಸಮಗ್ರ ತಿಳಿವಳಿಕೆಯಿಂದ ಅಂಥ ಹೊರಸೂಸುವಿಕೆ ತಗ್ಗಿಸಲು ನಿರ್ಣಾಯಕ ಹಂತವಾಗಿದೆ ಎಂದು ಕಾರ್ಬನ್ ಮ್ಯಾಪರ್ ಸಿಇಒ ರಿಲೆ ಡ್ಯುರೆನ್ ಹೇಳಿದರು.
ಹೊಸ ತಾಂತ್ರಿಕ ಸಾಮರ್ಥ್ಯಗಳು ಈ ಹೊರಸೂಸುವಿಕೆಯು ಸ್ಪಷ್ಟವಾಗಿ ಗೋಚರವಾಗುವಂತೆ ಮಾಡಲಿವೆ. ಹೀಗಾಗಿ ಈ ಒಂದು ಯೋಜನೆಯು ಕಾರ್ಯಸಾಧ್ಯವಾಗಿದ್ದು, ಈ ವಲಯದ ಸಂಪೂರ್ಣ ಚಿತ್ರಣವನ್ನೇ ಬದಲಾಯಿಸುವ ಸಾಮರ್ಥ್ಯ ಹೊಂದಿವೆ. ಇದರಿಂದ ಸಾಮಾನ್ಯವಾಗಿ ಕಡೆಗಣಿಸಲ್ಪಟ್ಟಿರುವ ವಲಯದಲ್ಲಿ ಅಲ್ಪಾವಧಿಯ ಅವಕಾಶಗಳ ಬಗ್ಗೆ ನಮ್ಮ ಸಾಮೂಹಿಕ ತಿಳಿವಳಿಕೆ ಹೆಚ್ಚಿಸುತ್ತದೆ ಎಂದು ಡ್ಯುರೆನ್ ತಿಳಿಸಿದರು.
ಇವು ಪಾಯಿಂಟ್-ಸೋರ್ಸ್ ಸಮೀಕ್ಷೆಯ ಭಾಗ: ಅರ್ತ್ ಸರ್ಫೇಸ್ ಮಿನರಲ್ ಡಸ್ಟ್ ಸೋರ್ಸ್ ಇನ್ವೆಸ್ಟಿಗೇಷನ್ (EMIT) ಮತ್ತು ಇತರ NASA ವಿಜ್ಞಾನ ಉಪಕರಣಗಳ ಅವಲೋಕನಗಳು ಜಾಗತಿಕ ತ್ಯಾಜ್ಯ ಸಂಗ್ರಹಣಾ ಪ್ರದೇಶಗಳ ಮೀಥೇನ್ ಹೊರಸೂಸುವಿಕೆಯ ಪಾಯಿಂಟ್-ಸೋರ್ಸ್ ಸಮೀಕ್ಷೆಯ ಭಾಗವಾಗಿವೆ. ಮಿಥೇನ್ ಪ್ರಬಲವಾದ ಹಸಿರುಮನೆ ಅನಿಲವಾಗಿದ್ದು, ಮಾನವರಿಂದ ಉಂಟಾಗುವ ಜಾಗತಿಕ ತಾಪಮಾನಕ್ಕೆ ಸರಿಸುಮಾರು ಕಾಲು ಭಾಗದಿಂದ ಮೂರನೇ ಒಂದು ಭಾಗ ಇದರಿಂದಲೇ ಆಗುತ್ತಿದೆ.
ಹೆಚ್ಚಿನ ಪ್ರಮಾಣದಲ್ಲಿ ಮಿಥೇನ್ ಹೊರಸೂಸುವ ಜಾಗತಿಕ ತ್ಯಾಜ್ಯ ತಾಣಗಳ ಬೇಸ್‌ಲೈನ್ ಮೌಲ್ಯಮಾಪನವನ್ನು ಸ್ಥಾಪಿಸುವುದು ಹೊಸ ಉಪಕ್ರಮದ ಗುರಿಯಾಗಿದೆ. ವಾತಾವರಣದಲ್ಲಿ ಮಿಥೇನ್ ಅನಿಲದ ಸಾಂದ್ರತೆಯನ್ನು ಕಡಿಮೆ ಮಾಡಲು ಮತ್ತು ಹವಾಮಾನ ಬದಲಾವಣೆ ಮಿತಿಗೊಳಿಸುವ ಯಾವುದೇ ನಿರ್ಧಾರ ತಳೆಯಲು ಈ ಮಾಹಿತಿಯು ಉಪಯುಕ್ತವಾಗಲಿದೆ ಎಂದು ನಾಸಾ ಹೇಳಿದೆ. ತ್ಯಾಜ್ಯ ವಲಯದಿಂದ ಒಟ್ಟಾರೆ ಉತ್ಪತ್ತಿಯಾಗುವ ಮಿಥೇನ್ನಲ್ಲಿ ಮಾನವ ಉಂಟುಮಾಡುವ ಮಿಥೇನ್ ಹೊರಸೂಸುವಿಕೆಯ ಪ್ರಮಾಣ ಅಂದಾಜು ಶೇ 20 ರಷ್ಟಾಗಿದೆ.
ಇಂಗಾಲದ ಡೈಆಕ್ಸೈಡ್ಗಿಂತ 80 ಪಟ್ಟು ಅಧಿಕ: ವಾತಾವರಣದಲ್ಲಿನ ಶಾಖವನ್ನು ಹಿಡಿದಿಟ್ಟುಕೊಳ್ಳುವಲ್ಲಿ ಮಿಥೇನ್ ಇಂಗಾಲದ ಡೈಆಕ್ಸೈಡ್ಗಿಂತ 80 ಪಟ್ಟು ಹೆಚ್ಚು ಪ್ರಬಲವಾಗಿದೆ. ಜೆಪಿಎಲ್ ಮೀಥೇನ್ ಪಾಯಿಂಟ್-ಸೋರ್ಸ್ ಎಮಿಷನ್‌ಗಳ ಉತ್ತಮ-ಗುಣಮಟ್ಟದ ಅವಲೋಕನಗಳನ್ನು ಮಾಡಲು ವಾಯುಗಾಮಿ ಇಮೇಜಿಂಗ್ ಸ್ಪೆಕ್ಟ್ರೋಮೀಟರ್‌ಗಳನ್ನು ಬಳಸುವ ಒಂದು ದಶಕದ ಸುದೀರ್ಘ ದಾಖಲೆಯನ್ನು ನಾಸಾ ಹೊಂದಿದೆ ಎಂದು ಜೆಪಿಎಲ್‌ನಲ್ಲಿ ಇಎಂಐಟಿಯ ಪ್ರಧಾನ ತನಿಖಾಧಿಕಾರಿ ರಾಬರ್ಟ್ ಗ್ರೀನ್ ಹೇಳಿದ್ದಾರೆ.
ಕಾರ್ಬನ್ ಮ್ಯಾಪರ್ ಯೋಜನೆಯ ಮೊದಲ ವರ್ಷದ ನಂತರ, ಸಂಶೋಧಕರು ಕಾರ್ಬನ್ ಮ್ಯಾಪರ್ ಉಪಗ್ರಹ ಕಾರ್ಯಕ್ರಮದಲ್ಲಿ ಎರಡು ಉಪಗ್ರಹಗಳನ್ನು ಬಳಸಿಕೊಂಡು ಪ್ರಪಂಚದಾದ್ಯಂತ 10,000 ಕ್ಕೂ ಹೆಚ್ಚು ತ್ಯಾಜ್ಯ ಸಂಗ್ರಹಣಾ ಪ್ರದೇಶಗಳ ವ್ಯಾಪಕ ಸಮೀಕ್ಷೆಯನ್ನು ನಡೆಸಲಿದ್ದಾರೆ.
ಇದನ್ನೂ ಓದಿ: ನಾಸಾ ವಿಶ್ಲೇಷಣೆ..100+ ವರ್ಷಗಳವರೆಗೆ ಕ್ಷುದ್ರಗ್ರಹ ಅಪೋಫಿಸ್‌ನಿಂದ ಭೂಮಿ ಸುರಕ್ಷಿತ
