ನವದೆಹಲಿ: ಓಪನ್ ಎಐನ ಕೃತಕ ಬುದ್ಧಿಮತ್ತೆ ಅಪ್ಲಿಕೇಶನ್ ಚಾಟ್ ಜಿಪಿಟಿಯ ಆದಾಯ ದಿನದಿಂದ ದಿನಕ್ಕೆ ಇಳಿಕೆಯಾಗುತ್ತಿದೆ. ಅಂದರೆ ಇದು ಹಣ ಪಾವತಿಸಿ ಚಾಟ್ ಬಾಟ್ ಅನ್ನು ಬಳಸಲು ಬಯಸುವವರ ಸಂಖ್ಯೆ ಮುಗಿಯುತ್ತಿದೆ ಎಂಬುದರ ಸೂಚನೆಯಾಗಿದೆ. ಮಾರುಕಟ್ಟೆ ವಿಶ್ಲೇಷಕ ಸಂಸ್ಥೆ ಆ್ಯಪ್ ಫಿಗರ್ಸ್ ಅಂಕಿಅಂಶಗಳ ಪ್ರಕಾರ, ಚಾಟ್ ಜಿಪಿಟಿ ಕಳೆದ ಎರಡು ತಿಂಗಳುಗಳಲ್ಲಿ ಶೇಕಡಾ 30 ಕ್ಕಿಂತ ಹೆಚ್ಚು ಆದಾಯದ ಬೆಳವಣಿಗೆಯನ್ನು ಕಾಣುತ್ತಿತ್ತು. ಆದರೆ ಈಗ ಆದಾಯ ಬೆಳವಣಿಗೆ ದರವು ಕೇವಲ 20 ಪ್ರತಿಶತದಷ್ಟಿದೆ (ಸೆಪ್ಟೆಂಬರ್ ವೇಳೆಗೆ).
ಚಾಟ್ ಜಿಪಿಟಿಯ ಆದಾಯ ಈಗಲೂ ಶೇಕಡಾ 20 ರಷ್ಟು ಬೆಳವಣಿಗೆಯಾಗುತ್ತಿರುವುದು ಅಚ್ಚರಿಯಾಗಿದೆ. ಆದರೆ ಹಿಂದಿನ ತಿಂಗಳುಗಳಲ್ಲಿ ಇದು ಶೇ 30ರಷ್ಟಿತ್ತು ಎಂಬುದು ಗಮನಾರ್ಹ ಎಂದು ವರದಿ ಹೇಳಿದೆ. ಹೊಸ ಆವೃತ್ತಿಯ ಚಾಟ್ ಜಿಪಿಟಿ + ಚಂದಾದಾರಿಕೆ ಸೇವೆಯನ್ನು ಪಡೆಯಲು ತಿಂಗಳಿಗೆ $ 19.99 ಡಾಲರ್ ಪಾವತಿಸಬೇಕಿದೆ. ಇದು ವೇಗದ ಪ್ರತಿಕ್ರಿಯೆ ಸಮಯ, ಹೊಸ ವೈಶಿಷ್ಟ್ಯಗಳು ಮತ್ತು ಅಪ್ಡೇಟ್ಗಳಿಗೆ ಆರಂಭಿಕ ಪ್ರವೇಶವನ್ನು ನೀಡುತ್ತದೆ.
"ನಮ್ಮ ಅಂದಾಜಿನ ಪ್ರಕಾರ ಚಾಟ್ ಜಿಪಿಟಿ ಸೆಪ್ಟೆಂಬರ್ನಲ್ಲಿ ಆಪ್ ಸ್ಟೋರ್ ಮತ್ತು ಗೂಗಲ್ ಪ್ಲೇನಿಂದ 3.2 ಮಿಲಿಯನ್ ಡಾಲರ್ ಗಳಿಸಿದೆ. ಅಂದರೆ ಆಪಲ್ ಮತ್ತು ಗೂಗಲ್ ತಮ್ಮ ಪಾಲು ಪಡೆದುಕೊಂಡ ನಂತರ ಇಷ್ಟು ಓಪನ್ಎಐಗೆ ಉಳಿಯುತ್ತಿದೆ ಎಂದರ್ಥ" ಎಂದು ಆ್ಯಪ್ ಫಿಗರ್ಸ್ ತನ್ನ ವರದಿಯಲ್ಲಿ ತಿಳಿಸಿದೆ. ಸೆಪ್ಟೆಂಬರ್ನಲ್ಲಿ ಸುಮಾರು 15.6 ಮಿಲಿಯನ್ ಜನರು ಓಪನ್ಎಐನ ಚಾಟ್ ಜಿಪಿಟಿ ಅಪ್ಲಿಕೇಶನ್ ಅನ್ನು ಡೌನ್ಲೋಡ್ ಮಾಡಿದ್ದಾರೆ.
ಓಪನ್ಎಐನ ಅಧಿಕೃತ ಚಾಟ್ ಜಿಪಿಟಿ ಅಪ್ಲಿಕೇಶನ್ ಮೇ ತಿಂಗಳಿನಿಂದ ಆಪ್ ಸ್ಟೋರ್ನಲ್ಲಿ ಮತ್ತು ಜುಲೈನಿಂದ ಗೂಗಲ್ ಪ್ಲೇ ನಲ್ಲಿ ಲಭ್ಯವಿದೆ. ಕೆಲ ಸಣ್ಣ ಬದಲಾವಣೆಗಳೊಂದಿಗೆ, ಓಪನ್ಎಐ ಪರಿವರ್ತನೆ ದರವನ್ನು ಸುಲಭವಾಗಿ ಹೆಚ್ಚಿಸಬಹುದು ಮತ್ತು ವೇಗದ ಆದಾಯ ಬೆಳವಣಿಗೆಯನ್ನು ಕಾಣಬಹುದು ಎಂದು ವರದಿ ಹೇಳಿದೆ. 2023 ರಲ್ಲಿ ತನ್ನ ಆದಾಯ 1 ಬಿಲಿಯನ್ ಡಾಲರ್ ತಲುಪುವ ನಿರೀಕ್ಷೆಯಿದೆ ಎಂದು ಓಪನ್ಎಐ ಕಳೆದ ತಿಂಗಳು ಹೇಳಿತ್ತು.
ಚಾಟ್ ಜಿಪಿಟಿಯ ನಿರ್ವಹಣೆ ವೆಚ್ಚವು ಕಂಪನಿಗೆ ಭರಿಸಲಾಗದಷ್ಟು ದುಬಾರಿಯಾಗಿದೆ. ಬರ್ನ್ಸ್ಟೀನ್ ವಿಶ್ಲೇಷಕ ಸ್ಟೇಸಿ ರಾಸ್ಗಾನ್ ಅವರ ವಿಶ್ಲೇಷಣೆಯ ಪ್ರಕಾರ, ಚಾಟ್ ಜಿಪಿಟಿಯಲ್ಲಿ ಪ್ರತಿಯೊಂದು ಸರ್ಚ್ನ ಫಲಿತಾಂಶ ನೀಡಲು ಸುಮಾರು 4 ಯುಎಸ್ ಸೆಂಟ್ಸ್ ವೆಚ್ಚವಾಗುತ್ತಿದೆ. ಚಾಟ್ ಜಿಪಿಟಿ ಸರ್ಚ್ ಪ್ರಮಾಣ ಗೂಗಲ್ ಸರ್ಚ್ನ ಗಾತ್ರದ ಹತ್ತನೇ ಒಂದು ಭಾಗಕ್ಕೆ ಬೆಳೆದರೆ, ಆರಂಭದಲ್ಲಿ ಕಂಪನಿಯು ಜಿಪಿಯುಗಳಿಗಾಗಿ ಸುಮಾರು $ 48.1 ಬಿಲಿಯನ್ ಮತ್ತು ಚಿಪ್ಗಳಿಗಾಗಿ ವರ್ಷಕ್ಕೆ ಸುಮಾರು $ 16 ಬಿಲಿಯನ್ ಹಣ ವ್ಯಯಿಸಬೇಕಾಗುತ್ತದೆ. ಸ್ಯಾಮ್ ಆಲ್ಟಮನ್ ನೇತೃತ್ವದ ಓಪನ್ಎಐ ಅಸ್ತಿತ್ವದಲ್ಲಿರುವ ಷೇರುಗಳ ಮಾರಾಟದ ಮೂಲಕ 80-90 ಬಿಲಿಯನ್ ಡಾಲರ್ನಷ್ಟು ಬಂಡವಾಳ ಸಂಗ್ರಹಿಸಲಿದೆ ಎಂದು ವರದಿಯಾಗಿದೆ.
ಇದನ್ನೂ ಓದಿ : ಇಸ್ರೇಲ್ ವೆಬ್ಸೈಟ್ಗಳ ಮೇಲೆ ಸೈಬರ್ ದಾಳಿ: ಹಲವಾರು ಪೋರ್ಟಲ್ಗಳು ಸ್ಥಗಿತ
