ಜೈಲರ್ ಯಶಸ್ಸಿನಲೆಯಲ್ಲಿರುವ ಭಾರತೀಯ ಚಿತ್ರರಂಗದ ಪ್ರಸಿದ್ಧ ನಟ ರಜನಿಕಾಂತ್ ಮುಖ್ಯಭೂಮಿಕೆಯ ಮುಂದಿನ ಬಹುನಿರೀಕ್ಷಿತ ಸಿನಿಮಾ 'ತಲೈವರ್ 170'. ಚಿತ್ರ ನಿರ್ಮಾಪಕರು ಕಳೆದ ಮೂರ್ನಾಲ್ಕು ದಿನಗಳಲ್ಲಿ ಚಿತ್ರದ ಪಾತ್ರವರ್ಗ ಮತ್ತು ಸಿಬ್ಬಂದಿ ಹೆಸರನ್ನು ಘೋಷಿಸಿದ್ದಾರೆ. ಟಿ.ಜೆ ಜ್ಞಾನವೆಲ್ ಆ್ಯಕ್ಷನ್ ಕಟ್ ಹೇಳಲಿರುವ ತಲೈವರ್ 170ಯ ಚಿತ್ರೀಕರಣ ಶುರುವಾಗಿದೆ. ಈ ಬಗ್ಗೆ ಸಾಮಾಜಿಕ ಮಾಧ್ಯಮದಲ್ಲಿಂದು ಚಿತ್ರತಂಡ ಘೋಷಿಸಿದೆ. ಕೇರಳದ ತಿರುವನಂತಪುರಂನಲ್ಲಿಂದು ಬಹುನಿರೀಕ್ಷಿತ ಸಿನಿಮಾ ಸೆಟ್ಟೇರಿದೆ.
ಲೈಕಾ ಪ್ರೊಡಕ್ಷನ್ಸ್ ಪೋಸ್ಟ್: ಬಹುನಿರೀಕ್ಷಿತ ಚಿತ್ರಕ್ಕೆ ಬಂಡವಾಳ ಹೂಡುತ್ತಿರುವ ದಕ್ಷಿಣ ಚಿತ್ರರಂಗದ ಖ್ಯಾತ ಚಲನಚಿತ್ರ ನಿರ್ಮಾಣ ಸಂಸ್ಥೆ ಲೈಕಾ ಪ್ರೊಡಕ್ಷನ್ಸ್ ಸಾಮಾಜಿಕ ಜಾಲತಾಣಗಳಲ್ಲಿ ಹಿರಿಯ ನಟ ರಜನಿಕಾಂತ್ ಅವರ ನೋಟವನ್ನು ಹಂಚಿಕೊಂಡಿದೆ. ಪೋಸ್ಟ್ ಶೇರ್ ಮಾಡಿರುವ ಲೈಕಾ ಪ್ರೊಡಕ್ಷನ್ಸ್, "ನಮ್ಮ ಸೂಪರ್ ಸ್ಟಾರ್ ರಜನಿಕಾಂತ್ ಮತ್ತು ತಲೈವರ್ 170 ಚಿತ್ರತಂಡದೊಂದಿಗೆ - ಲೈಟ್ಸ್, ಕ್ಯಾಮರಾ, ಕ್ಲ್ಯಾಪ್ ಆ್ಯಂಡ್ ಆ್ಯಕ್ಷನ್. ಚಿತ್ರೀಕರಣಕ್ಕೆ ಸಂಪೂರ್ಣ ತಂಡ ಸಜ್ಜಾಗಿದೆ. ತಲೈವರ್ 170 ರಸದೌತಣ ಸವಿಯಲು ನೀವೆಲ್ಲರೂ ಸಜ್ಜಾಗಿದ್ದೀರಿ ಎಂದು ಭಾವಿಸಿದ್ದೇವೆ. ಆ್ಯಕ್ಷನ್ಗೆ ಇದು ಸಮಯ. ಚಿತ್ರೀಕರಣ ಮುಂದುವರೆದಂತೆ ನಾವು ಹೆಚ್ಚಿನ ಅಪ್ಡೇಟ್ಸ್ಗಳೊಂದಿಗೆ ನಿಮ್ಮ ಬಳಿ ಬರಲಿದ್ದೇವೆ'' ಎಂದು ಬರೆದುಕೊಂಡಿದೆ.
ರಜನಿಕಾಂತ್ ಹೇಳಿಕೆ... ಮಂಗಳವಾರದಂದು ನಟ ರಜನಿಕಾಂತ್ ಅವರು ತಮ್ಮ 170ನೇ ಸಿನಿಮಾದ ಶೂಟಿಂಗ್ ಅನ್ನು ಪ್ರಾರಂಭಿಸುವ ಬಗ್ಗೆ ಉತ್ಸಾಹ ವ್ಯಕ್ತಪಡಿಸಿದರು. ಲೈಕಾ ಪ್ರೊಡಕ್ಷನ್ಸ್ ಮತ್ತು ಜ್ಞಾನವೆಲ್ ಕಾಂಬಿನೇಶನ್ನ ಈ ಪ್ರಾಜೆಕ್ಟ್ ಎಂಟರ್ಟೈನ್ಮೆಂಟ್ ಮತ್ತು ಸಾಮಾಜಿಕ ಸಂದೇಶದ ಮಿಶ್ರಣವಾಗಿ ಮೂಡಿ ಬರಲಿದೆ ಎಂದು ನಿರೀಕ್ಷಿಸಲಾಗಿದೆ. ಚಿತ್ರದ ಸುತ್ತ ಸಾಕಷ್ಟು ನಿರೀಕ್ಷೆಗಳಿದ್ದು , ಶೀರ್ಷಿಕೆ ಇನ್ನಷ್ಟೇ ಫೈನಲ್ ಆಗಬೇಕಿದೆ.
ಇದನ್ನೂ ಓದಿ: Thalaivar 170: ರಜನಿಕಾಂತ್ ಜೊತೆ ರಾಣಾ ದಗ್ಗುಬಾಟಿ ಸ್ಕ್ರೀನ್ ಶೇರ್ - 'ತಲೈವರ್ 170' ಮೇಲೆ ಹೆಚ್ಚಿದ ಕುತೂಹಲ
72ರ ಹರೆಯದ ರಜನಿಕಾಂತ್ ತಿರುವನಂತಪುರಕ್ಕೆ ಪ್ರಯಾಣ ಬೆಳೆಸುವ ಮುನ್ನ ಚೆನ್ನೈ ಏರ್ಪೋರ್ಟ್ನಲ್ಲಿ ಮಾಧ್ಯಮದ ಎದುರು ತಮ್ಮ ಉತ್ಸಾಹ ಹಾಗೂ ಸಂತಸ ಹಂಚಿಕೊಂಡರು. "ನಾನು ನನ್ನ 170ನೇ ಸಿನಿಮಾವನ್ನು ನಿರ್ದೇಶಕ ಜ್ಞಾನವೆಲ್ ಹಾಗೂ ಲೈಕಾ ಪ್ರೊಡಕ್ಷನ್ಸ್ ಜೊತೆ ಮಾಡುತ್ತಿದ್ದೇನೆ. ಇದು ಸಾಮಾಜಿಕ ಸಂದೇಶದೊಂದಿಗೆ, ಸಾಕಷ್ಟು ಮನರಂಜನೆ ನೀಡಲಿದೆ'' ಎಂದು ನಟ ತಮ್ಮ ವಿಶ್ವಾಸ ವ್ಯಕ್ತಪಡಿಸಿದರು. ನಟನ ಈ ಹೇಳಿಕೆ, ಉತ್ಸಾಹವು ಅಭಿಮಾನಿಗಳ ಕುತೂಹಲವನ್ನು ಮತ್ತಷ್ಟು ಹೆಚ್ಚಿಸಿದೆ. ಚಿತ್ರದ ಬಗ್ಗೆ ಹೆಚ್ಚಿನ ಅಪ್ಡೇಟ್ಸ್ ಗಾಗಿ ಅಭಿಮಾನಿಗಳು ಕುತೂಹಲದಿಂದ ಕಾಯುತ್ತಿದ್ದಾರೆ.
ಇದನ್ನೂ ಓದಿ: 'Thalaivar 170' ಶೂಟಿಂಗ್ಗಾಗಿ ಕೊಚ್ಚಿಗೆ ತೆರಳಿದ ರಜನಿ; ಚಿತ್ರತಂಡಕ್ಕೆ ಅಮಿತಾಭ್ ಬಚ್ಚನ್, ಫಹಾದ್ ಫಾಸಿಲ್ ಎಂಟ್ರಿ
ಚಿತ್ರತಂಡ ಹೀಗಿದೆ.... ಈ ತಮಿಳು ಚಿತ್ರಕ್ಕೆ ಅನಿರುಧ್ ರವಿಚಂದರ್ ಸಂಗೀತ ಸಂಯೋಜಿಸಲಿದ್ದಾರೆ. ಸುಬಾಸ್ಕರನ್ ಚಿತ್ರದ ನಿರ್ಮಾಣ ನೋಡಿಕೊಳ್ಳಲಿದ್ದಾರೆ. ಬಾಲಿವುಡ್ ಸೂಪರ್ ಸ್ಟಾರ್ ಅಮಿತಾಭ್ ಬಚ್ಚನ್, ಫಹಾದ್ ಫಾಸಿಲ್, ರಾಣಾ ದಗ್ಗುಬಾಟಿ ಅವರಂತಹ ಸ್ಟಾರ್ ನಟರು ರಜನಿಕಾಂತ್ ಜೊತೆ ಕಾಣಿಸಿಕೊಳ್ಳಲಿದ್ದಾರೆ. ರಿತಿಕಾ ಸಿಂಗ್, ಮಂಜು ವಾರಿಯರ್, ದುಶಾರಾ ವಿಜಯನ್ ಕೂಡ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
