ಬಾಲಿವುಡ್​​ನ ಬಹುನಿರೀಕ್ಷಿತ ಸಿನಿಮಾ ಪಠಾಣ್​ ಬಿಡುಗಡೆಗೆ ಕ್ಷಣಗಣನೆ ಆರಂಭವಾಗಿದೆ. ಬಾಯ್ಕಾಟ್​ ಪ್ರವೃತ್ತಿಗೆ ನಲುಗಿ ಹೋಗಿದ್ದ ಬಾಲಿವುಡ್​​ ಚೇತರಿಕೆ ಮಾರ್ಗದಲ್ಲಿದ್ದು, ಪಠಾಣ್​​ ಸಿನಿಮಾ ಭರ್ಜರಿ ಯಶಸ್ಸಿನ ಲಸಿಕೆ ಕೊಡುವ ಲಕ್ಷಣಗಳು ಕಾಣುತ್ತಿದೆ. ಬಾಲಿವುಡ್​ ಕಿಂಗ್​ ಖಾನ್​ ಶಾರುಖ್​ ಖಾನ್​, ಬಹು ಬೇಡಿಕೆ ನಟಿ ದೀಪಿಕಾ ಪಡುಕೋಣೆ, ಬಹುಬೇಡಿಕೆ ನಟ ಜಾನ್​ ಅಬ್ರಹಾಂ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ಈ ಸಿನಿಮಾ ನಾಳೆ (ಬುಧವಾರ, ಜನವರಿ 25) ಹಿಂದಿ, ತಮಿಳು, ತೆಲುಗು ಆವೃತ್ತಿಗಳಲ್ಲಿ ದೇಶಾದ್ಯಂತ ಬಿಡುಗಡೆ ಆಗಲಿದೆ. ಮುಂಗಡ ಟಿಕೆಟ್​ ಬುಕ್ಕಿಂಗ್ ಜೋರಾಗಿ ನಡೆದಿದ್ದು, ಮೊದಲ ದಿನಗಳಲ್ಲಿ ಗಲ್ಲಾ ಪೆಟ್ಟಿಗೆಯಲ್ಲಿ ಕೋಟಿ ಕೋಟಿ ಬಾಚುವ ಸೂಚನೆ ಕೊಟ್ಟಿದೆ ಪಠಾಣ್​ ಸಿನಿಮಾ.

ಪಠಾಣ್​ ಮುಂಗಡ ಟಿಕೆಟ್​​ ಬುಕ್ಕಿಂಗ್​ ದಾಖಲೆ: ಈ ಸಿನಿಮಾದ ಮುಂಗಡ ಟಿಕೆಟ್​​ ಬುಕ್ಕಿಂಗ್​ಗೆ ಸಿನಿಪ್ರಿಯರು ತೋರಿದ ಉತ್ಸಾಹ ನೋಡಿದರೆ, ಪಠಾಣ್​​ ಆರಂಭದ ದಿನಗಳಲ್ಲಿ ಬಾಕ್ಸ್ ಆಫೀಸ್‌ನಲ್ಲಿ 45 ರಿಂದ 50 ಕೋಟಿ ರೂಪಾಯಿಗಳ ವ್ಯವಹಾರ ನಡೆಸುತ್ತದೆ ಎಂದು ಸಿನಿಮಾ ಉದ್ಯಮ ತಜ್ಞರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. 2018ರ ಝೀರೋ ಸಿನಿಮಾ ನಂತರ ಶಾರುಖ್ ಖಾನ್​​ ಸಿನಿಮಾ ಲೋಕಕ್ಕೆ ಮರಳುತ್ತಿದ್ದು, ಅಭಿಮಾನಿಗಳು ಭಾರೀ ಕುತೂಹಲ ಇಟ್ಟುಕೊಂಡಿದ್ದಾರೆ. ಸಿನಿಮಾ ಗಣರಾಜ್ಯೋತ್ಸವದ ಒಂದು ದಿನ ಮೊದಲು ಅಂದರೆ ನಾಳೆ ಚಿತ್ರಮಂದಿರಗಳಲ್ಲಿ ಬಿಡುಗಡೆ ಆಗುತ್ತಿದೆ.

ಜನವರಿ 20ರಂದು (ಶುಕ್ರವಾರ) ಮುಂಗಡ ಟಿಕೆಟ್​​ ಬುಕ್ಕಿಂಗ್ ಪ್ರಕ್ರಿಯೆ ಆರಂಭವಾಯಿತು. ಚಿತ್ರವು ಭಾರತದಾದ್ಯಂತ 5,000 ಪರದೆಗಳಲ್ಲಿ ಬಿಡುಗಡೆಯಾಗಲಿದೆ. ಇದು ಶಾರುಖ್ ಖಾನ್ ಅವರ ಮೊದಲ ಆ್ಯಕ್ಷನ್​ ಚಿತ್ರವಾಗಿದ್ದು, ಬೆಳಗ್ಗೆ 6 ಗಂಟೆಗೆ ಪ್ರದರ್ಶನವಾಗಲಿದೆ. ಪಠಾಣ್ ಸಿನಿಮಾ ಬಾಲಿವುಡ್ ಅನ್ನು ಪುನರುಜ್ಜೀವನಗೊಳಿಸುತ್ತದೆ ಮತ್ತು ಸಿನಿಮಾ ಉದ್ಯಮಕ್ಕೆ ಅದ್ಭುತವಾದ 2023ರ ಆರಂಭ ಕೊಡಲಿದೆ ಎಂದು ಸಿನಿಮಾ ವ್ಯಾಪಾರ ತಜ್ಞ ತರಣ್ ಆದರ್ಶ್ ತಿಳಿಸಿದ್ದಾರೆ. ಬಾಲಿವುಡ್​ ಕೋವಿಡ್​​ ಸಮಯದಲ್ಲಿ ಮತ್ತು 2022ರಲ್ಲಿ ಹಿನ್ನೆಡೆ ಅನುಭವಿಸಿದ್ದು, 2023ರಲ್ಲಿ ಗೆಲ್ಲುವ ನಿರೀಕ್ಷೆ ಹೊಂದಿದೆ.

ಮಲ್ಟಿಪ್ಲೆಕ್ಸ್ ಥಿಯೇಟರ್​​ನಲ್ಲೂ ಹೆಚ್ಚಿನ ಟಿಕೆಟ್​ ಮಾರಾಟ: ಪಿವಿಆರ್​ ಲಿಮಿಟೆಡ್‌ನ ಜಂಟಿ ವ್ಯವಸ್ಥಾಪಕ ನಿರ್ದೇಶಕ ಸಂಜೀವ್ ಕುಮಾರ್ ಬಿಜ್ಲಿ ಮಾಹಿತಿ ನೀಡಿದ್ದು, ಭಾರತದಾದ್ಯಂತ ತಮ್ಮ 903 ಬ್ರ್ಯಾಂಚ್​(ಪಿವಿಆರ್​)ಗಳಲ್ಲಿ ಹೆಚ್ಚಿನ ಸಂಖ್ಯೆಯ ಟಿಕೆಟ್​ಗಳು ಮಾರಾಟ ಆಗಿವೆ ಎಂದು ಹೇಳಿದ್ದಾರೆ. ಪಠಾಣ್​ ಸಿನಿಮಾ ಪಿವಿಆರ್​ ಚಿತ್ರಮಂದಿರಗಳಲ್ಲಿ ಬೆಳಗ್ಗೆ 6 ಗಂಟೆಗೆ ಪ್ರದರ್ಶನಗೊಳ್ಳಿರುವ ಶಾರುಖ್​ ಅವರ ಮೊದಲ ಚಲನಚಿತ್ರವಾಗಿದ ಎಂದು ಬಿಜ್ಲಿ ತಮ್ಮ ತಿಳಿಸಿದ್ದಾರೆ.

1 ಮಿಲಿಯನ್‌ಗಿಂತಲೂ ಹೆಚ್ಚು ಟಿಕೆಟ್‌ ಬುಕ್: ಪ್ರಮುಖ ಟಿಕೆಟಿಂಗ್ ಪ್ಲಾಟ್‌ಫಾರ್ಮ್ ಬುಕ್‌ ಮೈ ಶೋ (ಬಿಎಂಎಸ್) ಮಾಹಿತಿ ಪ್ರಕಾರ, ಒಂದು ಮಿಲಿಯನ್‌ಗಿಂತಲೂ ಹೆಚ್ಚು ಟಿಕೆಟ್‌ಗಳನ್ನು ಬುಕ್ ಮಾಡಲಾಗಿದೆ. ಬಿಎಂಎಸ್​ನಲ್ಲಿ ಈವರೆಗೆ 3,500ಕ್ಕೂ ಹೆಚ್ಚು ಸ್ಕ್ರೀನ್‌ಗಳು (ಸಿನಿಮಾ ಥಿಯೇಟರ್ ಪರದೆ) ಲಭ್ಯವಿದ್ದು, ಪಠಾಣ್‌ ಸಿನಿಮಾಗಾಗಿ ಮುಂಗಡ ಟಿಕೆಟ್​​ ಮಾರಾಟವು ಹಂತ ಹಂತವಾಗಿ ತೆರೆದುಕೊಳ್ಳುತ್ತಿದೆ. ಅಲ್ಲದೇ ಮುಂಜಾನೆಯ ಶೋಗಳನ್ನು ತೆರೆಯಲು ಬೇಡಿಕೆ ಹೆಚ್ಚಳವಾಗಿದೆ.

ಕೆಜಿಎಫ್ ದಾಖಲೆ ಮುರಿಯಲಿದೆಯಾ ಪಠಾಣ್?! ಪ್ರಮುಖ ಮಲ್ಟಿಪ್ಲೆಕ್ಸ್ ಸರಣಿ INOX ಪಠಾಣ್ ಈ ಹಿಂದಿನ ಹಲವು ದಾಖಲೆಗಳನ್ನು ಮುರಿಯಲಿದೆ ಎಂಬ ನಂಬಿಕೆ ಹೊಂದಿದೆ. ಭಾರತದಾದ್ಯಂತ INOX ಅವರ 722 ಸ್ಕ್ರೀನ್‌ಗಳಿದ್ದು, ಚಿತ್ರದ ಟಿಕೆಟ್​ಗಳು ಉತ್ತಮ ಸಂಖ್ಯೆಯಲ್ಲಿ ಮಾರಾಟವಾಗುತ್ತಿದೆ. ಈ ಚಿತ್ರವು ಕೆಜಿಎಫ್ 2ನ ಮುಂಗಡ ಟಿಕೆಟ್​ ಬುಕ್ಕಿಂಗ್ ದಾಖಲೆಯನ್ನು ಮುರಿಯಲಿದೆ ಮತ್ತು 45 ರಿಂದ 50 ಕೋಟಿ ರೂಪಾಯಿಗಳ ವ್ಯಾಪಾರವನ್ನು ಮಾಡಲಿದೆ ಎಂದು ಮಲ್ಟಿಪ್ಲೆಕ್ಸ್ ಚೈನ್ INOXನ ಮುಖ್ಯ ಪ್ರೋಗ್ರಾಮಿಂಗ್ ಅಧಿಕಾರಿ ರಾಜೇಂದ್ರ ಸಿಂಗ್ ಜ್ಯಾಲ ಅವರು ಹೇಳಿದ್ದಾರೆ. ಕೆಜಿಎಫ್ 2 ಚಿತ್ರ ಮುಂಗಡ ಟಿಕೆಟ್​ ಬುಕ್ಕಿಂಗ್​ 20 ಕೋಟಿಗೂ ಅಧಿಕ ಕಲೆಕ್ಷನ್​ ಮಾಡಿತ್ತು.

ಸಿಂಗಲ್​​ ಸ್ಕ್ರೀನ್​ಗಳಲ್ಲೂ ಬಂಪರ್ ಮುಂಗಡ ಬುಕ್ಕಿಂಗ್​​: ಮಲ್ಟಿಪ್ಲೆಕ್ಸ್‌ ಮಾತ್ರವಲ್ಲ ಸಿಂಗಲ್ ಸ್ಕ್ರೀನ್ ಥಿಯೇಟರ್‌ಗಳಲ್ಲಿಯೂ ಬಂಪರ್ ಮುಂಗಡ ಬುಕ್ಕಿಂಗ್ ಆಗಿದೆ. ಮುಂಬೈನ ಜನಪ್ರಿಯ ಸಿಂಗಲ್ ಸ್ಕ್ರೀನ್ ಥಿಯೇಟರ್ ಗೈಟಿ, ಗ್ಯಾಲಕ್ಸಿ ಮತ್ತು ಮರಾಠ ಮಂದಿರ್​ಗಳಲ್ಲಿ ಶೇಕಡ 70 ರಿಂದ 80 ರಷ್ಟು ಟಿಕೆಟ್ ಬುಕ್​ ಅಗಿದೆ. ಮೊದಲ ಬಾರಿಗೆ ಇಡೀ ಥಿಯೇಟರ್ ಟಿಕೆಟ್​ಗಳನ್ನು ಎಸ್‌ಆರ್‌ಕೆ ಅಭಿಮಾನಿಗಳ ಕ್ಲಬ್‌ ಖರೀದಿಸಿದ್ದು, ಬೆಳಗ್ಗೆ 9ಕ್ಕೆ ಮಾರ್ನಿಂಗ್​ ಶೋ ಆಯೋಜಿಸಲಾಗಿದೆ.

ಇದನ್ನೂ ಓದಿ: ಪಠಾಣ್​ ಚಿತ್ರಕ್ಕೆ ಯಾವುದೇ ಅಡಚಣೆ ಆಗುವುದಿಲ್ಲ : ಸಿಎಂ ಶರ್ಮಾ ಅಭಯ

ಪಠಾಣ್‌ಗೆ ದಕ್ಷಿಣದಿಂದ ಬೆಂಬಲ: ದೇಶದ ದಕ್ಷಿಣ ಭಾಗಗಳಲ್ಲಿ ಮುಂಗಡ ಬುಕ್ಕಿಂಗ್‌ನಲ್ಲಿ ಪ್ರಗತಿ ಸಾಧಿಸಿರುವ ಬಾಲಿವುಡ್ ಚಲನಚಿತ್ರಗಳ ಪೈಕಿ ಪಠಾಣ್​ ಕೂಡ ಒಂದಾಗಿದೆ. ಇದುವರೆಗಿನ ಒಟ್ಟಾರೆ ಮುಂಗಡ ಟಿಕೆಟ್​​ ಮಾರಾಟದಲ್ಲಿ ಸುಮಾರು 30 ಪ್ರತಿಶತದಷ್ಟು ಕೊಡುಗೆ ಹೈದರಾಬಾದ್, ಚೆನ್ನೈ ಮತ್ತು ಬೆಂಗಳೂರಿನಿಂದ ಸಿಕ್ಕಿದೆ.