ದರ್ಭಾಂಗ(ಬಿಹಾರ): ಫ್ರಾನ್ಸ್‌ನ ಕಾನ್ನಲ್ಲಿ ನಡೆಯುತ್ತಿರುವ 75 ನೇ ಚಲನಚಿತ್ರೋತ್ಸವದಲ್ಲಿ ಮೈಥಿಲಿ ಭಾಷೆಯ ಚಲನಚಿತ್ರ 'ಧುಯಿನ್' ತನ್ನ ಮಿಂಚು ಹರಿಸಲಿದೆ. ಬಿಹಾರ ಸೇರಿದಂತೆ ಮೈಥಿಲಿ ಮಾತನಾಡುವ ಜನರಿಗೆ ಇದು ಹೆಮ್ಮೆಯ ವಿಷಯವಾಗಿದೆ. ಅದೇ ಹೊತ್ತಿಗೆ ಮೈಥಿಲಿ ಚಿತ್ರದ ಆಯ್ಕೆಯಿಂದಾಗಿ ಇಲ್ಲಿನ ಚಿತ್ರರಸಿಕರಲ್ಲಿ ಹುಮ್ಮಸ್ಸು ಸಹ ಮೂಡಿದೆ. ಮೇ 26ರವರೆಗೆ ನಡೆಯಲಿರುವ ಚಿತ್ರೋತ್ಸವದಲ್ಲಿ ದೇಶ - ವಿದೇಶಗಳ ಹಲವು ಚಿತ್ರಗಳು ಆಯ್ಕೆಯಾಗಿವೆ.
ಕಾನ್ ಚಲನಚಿತ್ರೋತ್ಸವದಲ್ಲಿ ಭಾರತದ 6 ಸಿನಿಮಾಗಳ ಆಯ್ಕೆ: ಕಾನ್ ಚಲನಚಿತ್ರೋತ್ಸವ 2022 ರಲ್ಲಿ ಭಾರತದಿಂದ ಆರು ಚಲನಚಿತ್ರಗಳನ್ನು ಆಯ್ಕೆ ಮಾಡಲಾಗಿದೆ. ಇವುಗಳಲ್ಲಿ ರಾಕೆಟ್ರಿ - ದಿ ನಂಬಿ ಎಫೆಕ್ಟ್ (ಹಿಂದಿ, ಇಂಗ್ಲಿಷ್, ತಮಿಳು), ಗೋದಾವರಿ (ಮರಾಠಿ), ಆಲ್ಫಾ ಬೇಟಾ ಗಾಮಾ (ಹಿಂದಿ), ಬೂಂಬಾ ರೈಡ್ (ಮಿಶಿಂಗ್), ಧುನ್ (ಮೈಥಿಲಿ) ಮತ್ತು ನಿರಯೆ ತಥಕಲುಲ್ಲಾ ಮರಮ್ (ಮಲಯಾಳಂ) ಭಾಷೆಯ ಚಲನಚಿತ್ರಗಳು ಕಾನ್ಗೆ ಆಯ್ಕೆಗೊಂಡ ಸಿನಿಮಾಗಳಾಗಿವೆ.
ಮೈಥಿಲಿ ಚಿತ್ರದ ಕಥೆ ಏನು?: 'ಧುಯಿನ್ ಮೈಥಿಲಿ ಭಾಷೆಯಲ್ಲಿ ಮಾಡಿದ ಚಿತ್ರವಾಗಿದೆ. ಈ ಚಿತ್ರವನ್ನು ದರ್ಭಾಂಗಾ ನಿವಾಸಿ ಅಚಲ್ ಮಿಶ್ರಾ ನಿರ್ದೇಶಿಸಿದ್ದಾರೆ. ಬಿಹಾರದ ಸಣ್ಣ ಪಟ್ಟಣದಿಂದ ಮುಂಬೈನ ದೊಡ್ಡ ಚಿತ್ರರಂಗದತ್ತ ಸಾಗಲು ಬಯಸುವ ಮಹತ್ವಾಕಾಂಕ್ಷಿ ಕಲಾವಿದನನ್ನು ಈ ಚಿತ್ರದಲ್ಲಿ ತೋರಿಸಲಾಗಿದೆ. ರಂಗಮಂದಿರದ ವೇದಿಕೆಯಿಂದ ಹಿರಿತೆರೆಗೆ ನೇರವಾಗಿ ಜಿಗಿಯಲು ಯುವಕ ಹಂಬಲಿಸುವ ಹಾಗೂ ಆತನ ತುಡಿತವನ್ನು ಈ ಚಿತ್ರದಲ್ಲಿ ತೋರಿಸಲಾಗಿದೆ. ಇದಕ್ಕಾಗಿ ಆತ ಕಷ್ಟಪಡುವ ಸನ್ನಿವೇಶಗಳನ್ನು ಚಿತ್ರದಲ್ಲಿ ಮನೋಜ್ಞವಾಗಿ ಚಿತ್ರೀಕರಿಸಲಾಗಿದೆ.
ಕೊರೊನಾ ಸಂಕಷ್ಟದ ಚಿತ್ರಣ: ಕೊರೊನಾ ಸಮಯದಲ್ಲಿ ದೇಶಾದ್ಯಂತ ಲಾಕ್‌ಡೌನ್‌ನ ಹೇರಲಾಗಿತ್ತು. ಈ ಲಾಕ್ಡೌನ್ನಿಂದ ಉಂಟಾದ ಆರ್ಥಿಕ ಬಿಕ್ಕಟ್ಟಿನ ಸಮಯದಲ್ಲಿ ಜನರು ಅನುಭವಿಸಿದ ಸಂಕಷ್ಟಗಳನ್ನು ಅತ್ಯಂತ ಪರಿಣಾಮಕಾರಿಯಾಗಿ ತೆರೆಯ ಮೇಲೆ ತರಲಾಗಿದೆ. ಈ ವರ್ಷದ ಜನವರಿಯಲ್ಲಿ ಮುಂಬೈನಲ್ಲಿ ನಡೆದ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಈ ಚಿತ್ರ ಪ್ರದರ್ಶನಗೊಂಡಿದೆ.
ನಿರ್ದೇಶಕ ಅಚಲ್ ಮಿಶ್ರಾ ಚಿತ್ರವಿದು: ಅಭಿನವ್ ಝಾ, ವಿಜಯ್ ಕುಮಾರ್ ಸಾಹ್, ಪ್ರಶಾಂತ್ ರಾಣಾ ಮತ್ತು ಸತ್ಯೇಂದ್ರ ಝಾ ಚಿತ್ರದಲ್ಲಿ ಅತ್ಯುತ್ತಮ ನಟನೆ ಮೂಲಕ ಗಮನ ಸೆಳೆದಿದ್ದಾರೆ.
ಇದನ್ನು ಓದಿ:ಲಾಲ್ ಮಹಲ್ ನೃತ್ಯ ಪ್ರಕರಣ ; ನರ್ತಕಿ ವೈಷ್ಣವಿ ಪಾಟೀಲ್ ಸೇರಿ ಮೂವರ ವಿರುದ್ಧ ದೂರು ದಾಖಲು
