ಹೈದರಾಬಾದ್: ಕಾಲಿವುಡ್ ನಟ ಸೂರ್ಯ ಅವರು ಧರ್ಮಪತ್ನಿ ಹಾಗೂ ಮಕ್ಕಳೊಂದಿಗೆ ವಿದೇಶಿ ಪ್ರವಾಸದಲ್ಲಿದ್ದಾರೆ. ಪತ್ನಿ, ನಟಿ ಜ್ಯೋತಿಕಾ ಹಾಗೂ ತಮ್ಮ ಇಬ್ಬರು ಮುದ್ದು ಮಕ್ಕಳೊಂದಿಗೆ ಕೋಪನ್ ಹೇಗನ್ ಪ್ರವಾಸದಲ್ಲಿರುವ ಸೂರ್ಯ, ಕುಟುಂಬದವರೊಂದಿಗೆ ಸಖತ್ ಎಂಜಾಯ್ ಮಾಡುತ್ತಿದ್ದಾರೆ. ಜ್ಯೋತಿಕಾ ಅಲ್ಲಿನ ಕೆಲವು ಸುಂದರ ಫೋಟೋಗಳನ್ನು ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.
ಕೆಲವು ರೀಲ್ಗಳನ್ನು ಸಹ ಅವರು ಪೋಸ್ಟ್ ಮಾಡಿಕೊಂಡಿದ್ದಾರೆ. ತಮ್ಮ ಮಗನ ಹುಟ್ಟುಹಬ್ಬವನ್ನು ಆಚರಿಸುತ್ತಿರುವುದನ್ನು ಈ ವಿಶೇಷ ವಿಡಿಯೋದಲ್ಲಿ ನಾವು ಕಾಣಬಹುದು. ಕೋಪನ್ ಹೇಗನ್ನ ರುದ್ರರಮಣೀಯ ದೃಶ್ಯಾವಳಿಗಳನ್ನು ಸಹ ತಮ್ಮ ರೀಲ್ನಲ್ಲಿ ಅತ್ಯದ್ಬುತವಾಗಿ ಸೆರೆ ಹಿಡಿದಿದ್ದಕ್ಕೆ ನೆಟಿಜನ್ ಕೂಡ ಪುಳಕಿತರಾಗಿದ್ದಾರೆ.
ಚಿತ್ರಾಕರ್ಷಕದ ದೋಣಿಯನ್ನು ಏರಿದ ತಾರಾ ಕುಟುಂಬ, ಸುಂದರವಾದ ಸರೋವರದ ನಡುವೆ ಕೇಕ್ ಕತ್ತರಿಸುವ ಮೂಲಕ ತಮ್ಮ ಪುತ್ರನ ಹುಟ್ಟುಹಬ್ಬವನ್ನು ಖುಷಿ ಖುಷಿಯಾಗಿ ಆಚರಿಸಿದರು. ಈ ಹುಟ್ಟುಹಬ್ಬದ ಆಚರಣೆಗೂ ಮುನ್ನ ತಾರಾ ಜೋಡಿ ಫರೋ ದ್ವೀಪಗಳಿಗೆ ಭೇಟಿ ನೀಡಿತ್ತು. ಅಲ್ಲದೇ ಅಲ್ಲಿನ ವಿಡಿಯೋವನ್ನು ಸಹ ಜಾಲತಾಣದಲ್ಲಿ ಹಂಚಿಕೊಂಡಿದೆ. ಅದಕ್ಕೂ ಮುನ್ನ ಇನ್ಸ್ಟಾದಲ್ಲಿ ಪೋಸ್ಟ್ ಮಾಡಿಕೊಂಡಿದ್ದ ಈ ತಾರಾ ಜೋಡಿ, ನಮ್ಮ ಅಮುಲ್ಯವಾದ ಸಮಯ ಕಳೆಯಲು ನಮಗೆ ಇದು ಹೇಳಿ ಮಾಡಿಸಿದ ಸ್ಥಳ ಎಂದು ಹೇಳಿಕೊಂಡಿತ್ತು.
ಸದ್ಯ ಅವರು ಹಂಚಿಕೊಂಡಿರುವ ಕೋಪನ್ಹೇಗನ್ ವಿಡಿಯೋ ಮತ್ತು ಫೋಟೋ ಜಾಲತಾಣದಲ್ಲಿ ಜಾಗ ಪಡೆದಿವೆ. ತಮ್ಮ ನೆಚ್ಚಿನ ನಟನ ತುಂಬು ಕುಟುಂಬದ ಫೋಟೋ ಮತ್ತು ವಿಡಿಯೋ ನೋಡಿದ ನೆಟಿಜನ್ಗಳು, ತರಹೇವಾರು ಕಾಮೆಂಟ್ ಮಾಡುವ ಮೂಲಕ ತಾವೇ ಕೋಪನ್ ಹೇಗನ್ ಪ್ರವಾಸಕ್ಕೆ ತೆರಳಿದಷ್ಟು ಖುಷಿ ವ್ಯಕ್ತಪಡಿಸುತ್ತಿದ್ದಾರೆ.
ದಕ್ಷಿಣ ಭಾರತದಲ್ಲಿ ಅಪಾರ ಜನಪ್ರಿಯತೆ ಹೊಂದಿರುವ ನಟಿ ಜ್ಯೋತಿಕಾ ಸುಮಾರು 25 ವರ್ಷಗಳ ನಂತರ 'ಶ್ರೀ' ಎಂಬ ಚಿತ್ರದ ಮೂಲಕ ಬಾಲಿವುಡ್ ಚಿತ್ರರಂಗಕ್ಕೆ ಮರಳಿದ್ದಾರೆ. ಸದ್ಯ ಅವರು ಹೆಸರು ಇಡದ ಮತ್ತೊಂದು ಚಿತ್ರಕ್ಕೂ ಸಹಿ ಮಾಡಿದ್ದಾರಂತೆ. ಬಹಳ ವರ್ಷಗಳ ಕಾಲ ಬಾಲಿವುಡ್ನಿಂದ ದೂರ ಉಳಿದುಕೊಂಡಿದ್ದ ಜ್ಯೋತಿಕಾ ಈಗ ಮತ್ತೆ ಬಾಲಿವುಡ್ಗೆ ಬಂದಿರುವುದಕ್ಕೆ ಅಭಿಮಾನಿಗಳ ಮನದಲ್ಲಿ ನಿರೀಕ್ಷೆ ಮೂಡುವಂತಾಗಿದೆ.
ಅವರ ಮುಂದಿನ ಚಿತ್ರ ಹಾರರ್ ಸಿನಿಮಾ ಆಗಿರಲಿದ್ದು ಖ್ಯಾತ ನಟ ಅಜಯ್ ದೇವಗನ್ ಜೊತೆ ಕಾಣಿಸಿಕೊಳ್ಳಲಿದ್ದಾರಂತೆ. ಆರ್. ಮಾಧವನ್ ಕೂಡ ಚಿತ್ರದಲ್ಲಿ ನಟಿಸಲಿದ್ದಾರೆ. ಚಿತ್ರತಂಡದವರಿಂದಲೇ ಈ ಬಗ್ಗೆ ಅಧಿಕೃತ ಮಾಹಿತಿ ಹೊರಬಿದ್ದಿದೆ. ಜ್ಯೋತಿಕಾ ಇದೇ ಮೊದಲ ಬಾರಿಗೆ ಅಜಯ್ ದೇವಗನ್ ಅವರೊಂದಿಗೆ ಪರದೆ ಹಂಚಿಕೊಳ್ಳುತ್ತಿದ್ದಾರೆ. ಖ್ಯಾತ ನಿರ್ದೇಶಕ ವಿಕಾಸ್ ಬಹ್ಲ್ ಈ ಹಾರರ್ ಚಿತ್ರಕ್ಕೆ ಆ್ಯಕ್ಷನ್ -ಕಟ್ ಹೇಳಲಿದ್ದಾರೆ.
ಇನ್ನು ನಟ ಸೂರ್ಯ ಕೂಡ ಇತ್ತೀಚೆಗಷ್ಟೇ ಮುಂಬೈಗೆ ಶಿಫ್ಟ್ ಆಗಿದ್ದು, ಹಲವು ಚಿತ್ರಗಳನ್ನು ತಮ್ಮ ಕೈಯಲ್ಲಿಟ್ಟುಕೊಂಡಿದ್ದಾರೆ. ಇತ್ತೀಚೆಗೆ ತೆರೆಕಂಡ ಅವರ ನಟನೆಯ ‘ಸೂರರೈ ಪೋಟ್ರು’, ‘ಜೈ ಭೀಮ್’ ಸಿನಿಮಾಗಳಿಗೆ ಫ್ಯಾನ್ಸ್ ಫಿದಾ ಆಗಿದ್ದಾರೆ. ಕಮಲ್ ಹಾಸನ್ ನಟನೆಯ ‘ವಿಕ್ರಂ’ ಚಿತ್ರದಲ್ಲಿ ಕೊನೆ ಘಳಿಗೆಯಲ್ಲಿ ಬರುವ ಅವರ ರೋಲೆಕ್ಸ್ ಎಂಬ ಪಾತ್ರವಂತೂ ಟ್ರೆಂಡ್ ಸೃಷ್ಟಿ ಮಾಡಿದೆ. ಕಂಗುವ (Kanguva) ಎಂಬ ಹೊಸ ಚಿತ್ರ ಕೂಟ ಫೈನಲ್ ಮಾಡಲಾಗಿದೆ. ಯುವಿ ಕ್ರಿಯೇಷನ್ಸ್ ಮತ್ತು ಸ್ಟುಡಿಯೋ ಗ್ರೀನ್ ಜಂಟಿಯಾಗಿ ನಿರ್ಮಾಣ ಮಾಡುತ್ತಿರುವ ಕಂಗುವ ಸಿನಿಮಾದಲ್ಲಿ ನಟಿ ದಿಶಾ ಪಟಾನಿ ಕೂಡ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದು 3ಡಿಯಲ್ಲಿ 10 ಭಾಷೆಗಳಲ್ಲಿ ಬಿಡುಗಡೆ ಆಗಲಿದೆ.
ಇದನ್ನೂ ಓದಿ: ಅಬ್ಬಬ್ಬಾ, 10 ಭಾಷೆಗಳಲ್ಲಿ ನಿರ್ಮಾಣವಾಗಲಿದೆ ನಟ ಸೂರ್ಯ ಸಿನಿಮಾ: ಟೈಟಲ್ ಫಿಕ್ಸ್
