ಬಾಲಿವುಡ್ ಸೂಪರ್ ಸ್ಟಾರ್ ಶಾರುಖ್ ಖಾನ್ ಅವರ ಮುಂಬರುವ ಚಿತ್ರ ಜವಾನ್ ಶೂಟಿಂಗ್ ಕೊನೆಯ ಹಂತದಲ್ಲಿದೆ. ನಿರ್ದೇಶಕ ಅಟ್ಲೀ ಕುಮಾರ್ ನೇತೃತ್ವದ ಚಿತ್ರ ತಂಡವು ಇತ್ತೀಚೆಗೆ ಮುಂಬೈನಲ್ಲಿ ಒಂಬತ್ತು ದಿನಗಳ ಶೂಟಿಂಗ್ ಪೂರ್ಣಗೊಳಿಸಿದೆ. ತಮಿಳಿನ ಬಹು ಬೇಡಿಕೆ ನಟಿ ನಯನತಾರಾ ಮುಂಬೈನಲ್ಲಿ ನಡೆದ ಶೂಟಿಂಗ್ನಲ್ಲಿ ಭಾಗಿ ಆಗಿದ್ದರು.
ರಾಜಸ್ಥಾನದಲ್ಲಿ ಮುಂದಿನ ಶೂಟಿಂಗ್? ಮುಂಬೈನಲ್ಲಿ ನಡೆದ ಶೂಟಿಂಗ್ನಲ್ಲಿ ಚಿತ್ರ ತಂಡವು ಶಾರುಖ್ ಖಾನ್ ಮತ್ತು ನಯನತಾರಾ ಅವರನ್ನೊಳಗೊಂಡ ಕೆಲ ಪ್ರಮುಖ ದೃಶ್ಯಗಳನ್ನು ಸೆರೆ ಹಿಡಿದಿದೆ. ವರದಿಗಳ ಪ್ರಕಾರ, ಲೇಡಿ ಸೂಪರ್‌ಸ್ಟಾರ್ ಅವರು ಎಸ್ಆರ್ಕೆ ಅವರೊಂದಿಗಿನ ಕೆಲ ಸೀನ್ಗಳಲ್ಲಿ ಬಹಳ ಖುಷಿ ಪಟ್ಟು ಅಭಿನಯಿಸಿದ್ದಾರೆ. ಈ ದೃಶ್ಯಗಳು ಪ್ರೇಕ್ಷಕರ ಮನ ಮುಟ್ಟಲಿದೆ ಎಂಬುದು ಚಿತ್ರತಂಡದ ವಿಶ್ವಾಸ. ನಟಿ ನಯನತಾರಾ ತಮಿಳುನಾಡಿಗೆ ವಾಪಸ್ ಆಗಿದ್ದು, ಶೀಘ್ರದಲ್ಲೇ ರಾಜಸ್ಥಾನದ ಸೆಟ್‌ಗೆ ಮರಳಲಿದ್ದಾರೆ. ಮುಂದಿನ ಹಂತದ ಶೂಟಿಂಗ್ ಡೇಟ್ಸ್ ಅನ್ನು ಚಿತ್ರತಂಡ ಇನ್ನೂ ಬಹಿರಂಗಪಡಿಸಿಲ್ಲ. ಆದರೆ, ಶೀಘ್ರದಲ್ಲೇ ಜವಾನ್ ಚಿತ್ರೀಕರಣಕ್ಕಾಗಿ ಚಿತ್ರತಂಡ ರಾಜಸ್ಥಾನಕ್ಕೆ ಹೋಗಲಿದೆ ಎನ್ನುವ ಮಾಹಿತಿ ಇದೆ.
ಸೌತ್ ನಿರ್ದೇಶಕರೊಂದಿಗೆ ಎಸ್ಆರ್ಕೆ ಮೊದಲ ಸಿನಿಮಾ: 'ಜವಾನ್' ದಕ್ಷಿಣ ಮತ್ತು ಹಿಂದಿ ಚಿತ್ರರಂಗದ ದೊಡ್ಡ ಪ್ರತಿಭೆಗಳ ಸಿನಿಮಾ. ಎಸ್ಆರ್ಕೆ ಮತ್ತು ನಯನತಾರಾ ಜೊತೆಗೆ, ತಮಿಳಿನ ಸೂಪರ್ ಸ್ಟಾರ್ ವಿಜಯ್ ಸೇತುಪತಿ ಕೂಡ ಕಾಣಿಸಿಕೊಳ್ಳಲಿದ್ದಾರೆ. ಮೂರು ದಶಕಗಳ ವೃತ್ತಿಜೀವನದಲ್ಲಿ ಮೊದಲ ಬಾರಿಗೆ ದಕ್ಷಿಣ ಚಿತ್ರರಂಗದ ನಿರ್ದೇಶಕರ ಜೊತೆ ಕೈಜೋಡಿಸಿರುವುದರಿಂದ ಈ ಸಿನಿಮಾ ಶಾರುಖ್ ಖಾನ್ ಅವರಿಗೆ ಬಹಳ ವಿಶೇಷವಾಗಿದೆ. ನಿರ್ದೇಶಕ ಅಟ್ಲೀ ಕೂಡ ಎಸ್ಆರ್ಕೆ ಜೊತೆಗೆ ಸಿನಿಮಾ ಮಾಡುತ್ತಿರುವ ಬಗ್ಗೆ ಬಹಳ ಉತ್ಸಾಹ ವ್ಯಕ್ತಪಡಿಸಿದ್ದಾರೆ. ಹಿಂದೆಂದೂ ನೋಡಿರದ ಅವತಾರದಲ್ಲಿ ಸೂಪರ್‌ಸ್ಟಾರ್ ಶಾರುಖ್ ಖಾನ್ ಅವರನ್ನು ತೆರೆ ಮೇಲೆ ತರುವುದಾಗಿ ಹೇಳಿ ಕೊಂಡಿದ್ದಾರೆ.
ಜೂನ್ನಲ್ಲಿ ಜವಾನ್ ಬಿಡುಗಡೆ: ನಿರ್ದೇಶಕ ಅಟ್ಲೀ ಕುಮಾರ್ ಅವರೇ ಬರೆದು ನಿರ್ದೇಶಿಸುತ್ತಿರುವ 'ಜವಾನ್' ಆ್ಯಕ್ಷನ್ ಥ್ರಿಲ್ಲರ್ ಚಿತ್ರ ಆಗಿದ್ದು, ಎಸ್ಆರ್ಕೆ ದ್ವಿಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಕಿಂಗ್ ಖಾನ್ ಅವರ ಫಸ್ಟ್ ಲುಕ್ ಅಭಿಮಾನಿಗಳ ಕುತೂಹಲವನ್ನು ಹೆಚ್ಚಿಸಿದೆ. ಜವಾನ್ ಚಿತ್ರ 2021ರ ಸೆಪ್ಟೆಂಬರ್ನಲ್ಲೇ ಕೆಲಸ ಆರಂಭಿಸಿದೆ. ಇದೇ ಜೂನ್ 2ರಂದು ತೆರೆಕಾಣಲು ಭರ್ಜರಿ ಸಿದ್ಧತೆ ನಡೆಯುತ್ತಿದೆ. ಹಿಂದಿ, ತಮಿಳು, ತೆಲುಗು, ಮಲಯಾಳಂ ಮತ್ತು ಕನ್ನಡದಲ್ಲಿ ಈ ಬಹುನಿರೀಕ್ಷಿತ ಚಿತ್ರ ಬಿಡುಗಡೆ ಆಗಲಿದೆ.
ಇದನ್ನೂ ಓದಿ: ಶಾರುಖ್ 'ಜವಾನ್' ಸಿನಿಮಾಗೆ ಸ್ಯಾಂಡಲ್ವುಡ್ ಹ್ಯಾಟ್ರಿಕ್ ಹೀರೋ ಎಂಟ್ರಿ?
ಜವಾನ್ ಸಿನಿಮಾದಲ್ಲಿ ಶಿವಣ್ಣ? ಸದ್ಯ ತಮ್ಮ 125ನೇ ಚಿತ್ರ ವೇದ ಸಕ್ಸಸ್ನಲ್ಲಿರುವ ಕರುನಾಡ ಚಕ್ರವರ್ತಿ ಶಿವ ರಾಜ್ಕುಮಾರ್ ಜವಾನ್ ಸಿನಿಮಾದಲ್ಲಿ ನಟಿಸಲಿದ್ದಾರೆ ಎಂದು ಹೇಳಲಾಗಿದೆ. ರಾಮ್ ಚರಣ್, ವಿಜಯ್ ಮತ್ತು ಶಿವ ರಾಜ್ಕುಮಾರ್ ಅವರನ್ನು ಜವಾನ್ ಚಿತ್ರತಂಡ ಸಂಪರ್ಕಿಸಿದೆ ಎನ್ನುವ ಮಾತುಗಳು ಕೇಳಿ ಬಂದಿವೆ. ಹ್ಯಾಟ್ರಿಕ್ ಹೀರೋ ಆಪ್ತ ಮೂಲಗಳು ಸಹ ಶಿವಣ್ಣ ಬಾಲಿವುಡ್ ಅಂಗಳಕ್ಕೆ ಕಾಲಿಡಲಿದ್ದಾರೆ ಎಂದಿವೆ. ಆದರೆ ಚಿತ್ರತಂಡದಿಂದ ಅಧಿಕೃತ ಮಾಹಿತಿ ಹೊರಬಿದ್ದಿಲ್ಲ.
ಇದನ್ನೂ ಓದಿ: ಕಾಡಿನಂಚಿನ ಜನರ ಸಮಸ್ಯೆ ಪರಿಹರಿಸುವಂತೆ ಸಿಎಂಗೆ ಮನವಿ ಪತ್ರ ಸಲ್ಲಿಸಿದ ರಿಷಬ್ ಶೆಟ್ಟಿ
