ಮಂಗಳೂರು: ಮಹಿಳೆಯರನ್ನು ಕಾಡುವ ಸ್ತನ ಕ್ಯಾನ್ಸರ್, ಸೆರ್ವಿಕಲ್ ಕ್ಯಾನ್ಸರ್ ಸೇರಿದಂತೆ ಇನ್ನಿತರ ಕ್ಯಾನ್ಸರ್ ಮಹಾರೋಗವನ್ನು ಆರಂಭಿಕ ಹಂತದಲ್ಲಿಯೇ ಪತ್ತೆ ಹಚ್ಚುವ ಉದ್ದೇಶದಿಂದ ರೋಟರಿ ಕ್ಲಬ್ 1.25 ಕೋಟಿ ರೂ. ವೆಚ್ಚದ ಮೊಬೈಲ್ ಬಸ್ವೊಂದನ್ನು ಕೊಡುಗೆಯಾಗಿ ನೀಡಿದ್ದು, ಇಂದು ಈ ಮೊಬೈಲ್ ಬಸ್ಗೆ ಚಾಲನೆ ದೊರೆಯಲಿದೆ.
ರೋಟರಿ ಕ್ಲಬ್ ಮಂಗಳೂರು, ರೋಟರಿ ಕ್ಲಬ್ ಸಿಕಿಕಾನ್ ವ್ಯಾಲಿ (ಅಮೆರಿಕ), ರೋಟರಿ ಡಿಸ್ಟ್ರಿಕ್ಟ್ 6540 (ಅಮೆರಿಕ) ಹಾಗೂ ರೋಟರಿ ಡಿಸ್ಟ್ರಿಕ್ಟ್ (3181) ಈ ಕೊಡುಗೆಯನ್ನು ನೀಡಿದೆ. 'ಮಹಿಳಾ ಸ್ವಾಸ್ಥ್ಯಕ್ಕೆ ಮೊಬೈಲ್ ಕ್ಲಿನಿಕ್' ಎಂಬ ಸ್ಲೋಗನ್ ಅಡಿ ಈ ಬಸ್ ಕಾರ್ಯ ನಿರ್ವಹಿಸಲಿದೆ. 'ಮಹಿಳಾ ಆರೋಗ್ಯ ಸಂಚಾರಿ ಚಿಕಿತ್ಸಾ ಘಟಕ' ಎಂಬ ಈ ಬಸ್ ಅನ್ನು ನಗರದ ಪ್ರತಿಷ್ಠಿತ ಯೆನೆಪೊಯ ಆಸ್ಪತ್ರೆ ನಿರ್ವಹಿಸಲಿದೆ.
ಮೊಬೈಲ್ ಕ್ಲಿನಿಕ್ ಬಸ್ ಸ್ತನ ಕ್ಯಾನ್ಸರ್ ಪತ್ತೆಗಾಗಿ ಮ್ಯಾಮೊಗ್ರಾಫಿ ಮಷಿನ್, ಸೆರ್ವಿಕಲ್ ಕ್ಯಾನ್ಸರ್ ಪತ್ತೆಗಾಗಿ ಕೊಲ್ಪೊಸ್ಕೋಪಿ ಮಷಿನ್ ಮುಂತಾದ ಅತ್ಯಾಧುನಿಕ ವೈದ್ಯಕೀಯ ಚಿಕಿತ್ಸಕ ಘಟಕಗಳನ್ನು ಹೊಂದಿದೆ. ಜೊತೆಗೆ ಹೈಟೆಕ್ ಟಾಯ್ಲೆಟ್ ವ್ಯವಸ್ಥೆ ಕೂಡಾ ಒಳಗೊಂಡಿದೆ. ಅಲ್ಲದೇ ಮಹಿಳಾ ನುರಿತ ವೈದ್ಯರು ಹಾಗೂ ದಾದಿಯರನ್ನು ಒಳಗೊಂಡಿದೆ.
ಈ ಮೊಬೈಲ್ ಬಸ್ ಅನ್ನು ದ.ಕ.ಜಿಲ್ಲೆಗೆ ಕೊಡುಗೆಯಾಗಿ ನೀಡಲಾಗಿದೆ. ಜಿಲ್ಲೆಯ ಹಳ್ಳಿ ಹಳ್ಳಿಗೂ ತೆರಳುವ ಈ ಬಸ್, ಮಹಿಳೆಯರಿಗೆ ಮಾಡುವ ಎಲ್ಲ ತಪಾಸಣೆ ಹಾಗೂ ಚಿಕಿತ್ಸೆಗಳನ್ನು ಉಚಿತವಾಗಿ ನೀಡುತ್ತದೆ. ಬೆಂಗಳೂರಿನಲ್ಲಿ ಈ ರೀತಿಯ ಹೈಟೆಕ್ ಮೊಬೈಲ್ ಬಸ್ ಕಾರ್ಯನಿರ್ವಹಿಸುತ್ತಿದ್ದು, ಇದೀಗ ಮಂಗಳೂರಿನಲ್ಲಿ ಸಹ ಕಾರ್ಯಾಚರಿಸಲಿದೆ. ಬಡತನ ರೇಖೆಗಿಂತ ಕೆಳಮಟ್ಟದಲ್ಲಿರುವವರನ್ನು ಗುರಿಯಾಗಿಸಿಕೊಂಡು ಈ ಮೊಬೈಲ್ ಬಸ್ ಸೇವೆ ನೀಡಲಾಗಿದೆ.
ಕೆಲವೊಂದು ಮಹಿಳೆಯರು ಅಗತ್ಯ ವೈದ್ಯಕೀಯ ತಪಾಸಣೆಗೆ ಒಳಗಾಗಬೇಕಾಗುತ್ತದೆ. ಈ ರೀತಿಯಲ್ಲಿ ಮಹಿಳೆಯರ ಮನವೊಲಿಕೆ ಮಾಡಿ, ಅವರನ್ನು ಕೌನ್ಸಲಿಂಗ್ಗೆ ಒಳಪಡಿಸಲಾಗುತ್ತದೆ. ಬಳಿಕ ಯಾರಿಗೆ ತಪಾಸಣೆ ಅಗತ್ಯವಿದೆಯೋ ಅವರಿಗೆ ರಿಜಿಸ್ಟ್ರೇಷನ್ ಮಾಡಿಕೊಂಡು, ಮೊಬೈಲ್ ಬಸ್ ಮೂಲಕ ಉಚಿತವಾಗಿ ತಪಾಸಣೆ ಮಾಡಿಸಲಾಗುತ್ತದೆ. ಹೆಚ್ಚಿನ ಚಿಕಿತ್ಸೆಯ ಅಗತ್ಯವಿದ್ದವರಿಗೆ ಯೆನೆಪೊಯ ಆಸ್ಪತ್ರೆಯ ಮೂಲಕ ಚಿಕಿತ್ಸೆ ನೀಡುವ ವ್ಯವಸ್ಥೆ ಮಾಡಿಸಲಾಗುತ್ತದೆ.
