ದಾವಣಗೆರೆ: ಕಳಪೆ ರಸಗೊಬ್ಬರದಿಂದ ಸಾಕಷ್ಟು ರೈತರು ಮೋಸ ಹೋಗಿ ಲಕ್ಷಾಂತರ ರೂ. ಮೌಲ್ಯದ ಬೆಳೆ ಕಳೆದುಕೊಂಡಿರುವ ಅನೇಕ ಉದಾಹರಣೆಗಳಿವೆ. ಜಿಲ್ಲೆಯಲ್ಲೂ ಸಹ ಈ ರೀತಿಯ ಘಟನೆ ನಡೆದಿರುವ ಅನುಮಾನ ವ್ಯಕ್ತವಾಗಿದೆ.
ವಿವರ:
ಮೈಸೂರು ಮೂಲದ ಗೊಬ್ಬರದ ಕಂಪನಿಯೊಂದು ಇಂಡಿಯನ್ ಐಪಿಎಲ್ ಪೊಟ್ಯಾಷಿಯಂ ಎಂಬ ಹೆಸರಿನ ಗೊಬ್ಬರವನ್ನು ದಾವಣಗೆರೆಯ ವಿನೂತ ಅಗ್ರೋ ಏಜೆನ್ಸಿ ಮುಖೇನ ರೈತರಿಗೆ ಮಾರಾಟ ಮಾಡಲು ಯತ್ನಿಸಿದೆ. ಅಡಿಕೆ ಗಿಡಗಳಿಗೆ ಶೀತ ಹೆಚ್ಚಾಗಿದ್ದರಿಂದ ಈ ಗೊಬ್ಬರ ಖರೀದಿಸಲು ದಾವಣಗೆರೆ ತಾಲೂಕಿನ ಮೆಳ್ಳೆಕಟ್ಟೆಯ ರೈತ ಪರಮೇಶ್ವರಪ್ಪ ಮುಂದಾಗಿದ್ದಾರೆ. ಆದರೆ, ಅವರು ಖರೀದಿಗೂ ಮೊದಲು ಪರಿಶೀಲನೆ ನಡೆಸಿದಾಗ ಗೊಬ್ಬರ ಕಳಪೆಯಿಂದ ಕೂಡಿದೆ ಎಂದು ತಿಳಿದು ಬಂದಿದೆ. ಕೂಡಲೇ ಈ ವಿಚಾರವನ್ನು ಮೈಸೂರಿನಿಂದ ಗೊಬ್ಬರದ ಸಮೇತ ಬಂದಿದ್ದ ಲಾರಿಯನ್ನು ತಡೆದು ನಿಲ್ಲಿಸಿ, ಕೃಷಿ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದಾರೆ.
ಕೃಷಿ ಇಲಾಖೆ ಅಧಿಕಾರಿ ಹೇಳುವುದೇನು?
ಈ ಕುರಿತು ಪ್ರತಿಕ್ರಿಯೆ ನೀಡಿರುವ ಕೃಷಿ ಇಲಾಖೆ ಸಹಾಯಕ ನಿರ್ದೇಶಕ ಸುನೀಲ್, 'ನಮಗೆ ಈ ಕುರಿತು ರೈತರು ದೂರು ನೀಡಿದ್ದರು. ಈ ಹಿನ್ನೆಲೆಯಲ್ಲಿ ಸ್ಥಳಕ್ಕೆ ಬಂದು ಪರಿಶೀಲನೆ ನಡೆಸಿದಾಗ ಲಾರಿಯಲ್ಲಿ ಐಪಿಎಲ್ ಪೊಟ್ಯಾಸಿಯಮ್‌ ಗೊಬ್ಬರ ಇರುವುದು ಕಂಡುಬಂದಿದೆ. ಈ ಗೊಬ್ಬರ ಕಳೆಪೆಯಿಂದ ಕೂಡಿದೆ ಎಂಬ ಅನುಮಾನ ವ್ಯಕ್ತವಾಗಿದ್ದು, ಪರೀಕ್ಷೆಗಾಗಿ ಪ್ರಯೋಗಾಲಯಕ್ಕೆ ಕಳುಹಿಸುತ್ತೇವೆ. ಈ ವೇಳೆ ಗೊಬ್ಬರ ಕಳಪೆಯಿಂದ ಕೂಡಿರುವುದು ಕಂಡುಬಂದರೆ ಖಾಸಗಿ ಕಂಪನಿ ವಿರುದ್ಧ ಮುಂದಿನ ಕ್ರಮ ಕೈಗೊಳ್ಳುತ್ತೇವೆ' ಎಂದರು.
ದಾವಣಗೆರೆ ಗ್ರಾಮಾಂತರ ಠಾಣೆ ಪೊಲೀಸರು ಲಾರಿ ಹಾಗು ಗೊಬ್ಬರ ಸಮೇತ ಮೈಸೂರು ಮೂಲದ ಚಾಲಕನನ್ನು ವಶಕ್ಕೆ ಪಡೆದುಕೊಂಡಿದ್ದು, ಹೆಚ್ಚಿನ ತನಿಖೆ ನಡೆಸುತ್ತಿದ್ದಾರೆ.
