ಬೆಂಗಳೂರು: ವೃಷಭಾವತಿ ವ್ಯಾಲಿಗೆ ನಸುಕಿನ ಜಾವ ಕೆಮಿಕಲ್ ನೀರು ಹರಿಸುತ್ತಿದ್ದ ಟ್ಯಾಂಕರ್ ಮತ್ತು ಚಾಲಕನನ್ನು ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿ (ಕೆಎಸ್ಪಿಸಿಬಿ) ಅಧಿಕಾರಿಗಳು ವಶಕ್ಕೆ ಪಡೆದಿದ್ದು, ಚಾಲಕನ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ.
ಕೃಷ್ಣ ಗಾರ್ಡನ್ ಹಾಗೂ ಕಾನ್ಕಾರ್ಡ್ ಬಡಾವಣೆಯ ನಿವಾಸಿಗಳು ವೃಷಭಾವತಿ ನದಿಗೆ ನಸುಕಿನ ಜಾವ ಕೈಗಾರಿಕೆಗಳಿಂದ ತಂದ ರಾಸಾಯನಿಕ ನೀರನ್ನು ಹರಿಸುತ್ತಾರೆ ಎಂದು ಕೆಎಸ್ಪಿಸಿಬಿಗೆ ದೂರು ಸಲ್ಲಿಸಿದ್ದರು. ಹೀಗಾಗಿ, ಕಾರ್ಯಾಚರಣೆ ಕೈಗೊಳ್ಳಲೆಂದೇ ಗಸ್ತು ತಿರುಗಲು ಮಾರ್ಷಲ್ಸ್ ಅನ್ನು ಕೆಎಸ್ಪಿಸಿಬಿ ನೇಮಿಸಿತು. ಈ ಮೂಲಕ ಘಟನೆ ಪತ್ತೆ ಹಚ್ಚಲಾಗಿದೆ.
ಈ ಬಗ್ಗೆ ಮಂಡಳಿಯ ಸದಸ್ಯ ಕಾರ್ಯದರ್ಶಿ ಶ್ರೀನಿವಾಸುಲು ಮಾತನಾಡಿ, ವ್ಯಾಲಿಗೆ ತ್ಯಾಜ್ಯ ನೀರು ಹರಿಸುವ ಬಗ್ಗೆ ದೂರು ಕೇಳಿಬಂದಿತ್ತು. ಈ ಬಗ್ಗೆ ತಂಡವೊಂದನ್ನು ರಚಿಸಿ, ಗಸ್ತು ವಾಹನ ನಿಯೋಜಿಸಲಾಗಿತ್ತು. ಮೂರ್ನಾಲ್ಕು ಕಡೆ ನಾಕಾಬಂದಿ ಹಾಕಿ ರಾತ್ರಿ ಕಾರ್ಯಾಚರಣೆ ನಡೆಸಿದಾಗ ನದಿಗೆ ತ್ಯಾಜ್ಯ ನೀರು ಹಾಕುತ್ತಿದ್ದದ್ದು ಪತ್ತೆಯಾಗಿದೆ. ಈ ವಾಹನ ಯಾವ ಕಾರ್ಖಾನೆಗೆ ಸೇರಿದ್ದು ಎಂಬುದರ ಕುರಿತು ತನಿಖೆ ನಡೆಯುತ್ತಿದೆ. ಪತ್ತೆಯಾದ ಬಳಿಕ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು ಎಂದರು.
