ಹೈದರಾಬಾದ್: ಐಪಿಎಲ್ ಹರಾಜಿನಲ್ಲಿ ಅತೀ ಹೆಚ್ಚು ಬೆಲೆಗೆ ಬಿಕರಿಯಾಗುವ ಆಟಗಾರರು ಟೂರ್ನಿಯಲ್ಲಿ ಉತ್ತಮ ಪ್ರದರ್ಶನ ನೀಡಲ್ಲ ಎನ್ನುವ ಮಾತಿದೆ. ಇದು ಈ ಆವೃತ್ತಿಯಲ್ಲೂ ಮತ್ತೆ ಸಾಬೀತಾಗಿದೆ.
ಕೋಟಿಗಟ್ಟಲೆ ಹಣ ನೀಡಿ ಫ್ರಾಂಚೈಸಿಗಳು ಖ್ಯಾತನಾಮರ ಜೊತೆಗೆ ಯುವ ಪ್ರತಿಭೆಗಳನ್ನು ಖರೀದಿ ಮಾಡಿದ್ದರು. ಆದರೆ ಇದೀಗ ಅಂತಹ ಆಟಗಾರರು ತಂಡದ ಹಾಗೂ ಫ್ರಾಂಚೈಸಿಗಳ ನಿರೀಕ್ಷೆಯನ್ನು ಹುಸಿ ಮಾಡಿದ್ದಾರೆ . ಅಂತಹ ಪ್ರಮುಖ ಐದು ಆಟಗಾರರ ಮಾಹಿತಿ ಇಲ್ಲಿದೆ..
ವರುಣ್ ಚಕ್ರವರ್ತಿ (ಪಂಜಾಬ್, 8.4 ಕೋಟಿ):
ಈ ಬಾರಿಯ ಬಿಡ್ಡಿಂಗ್ನಲ್ಲಿ ಎಲ್ಲ ತಂಡಗಳೂ ವರುಣ್ ಚಕ್ರವರ್ತಿಯನ್ನು ತಮ್ಮ ತಂಡಕ್ಕೆ ಸೇರಿಸಿಕೊಳ್ಳಲು ಸಾಕಷ್ಟು ಪ್ರಯತ್ನ ನಡೆಸಿದ್ದವು. ಕಾರಣ ವಿಭಿನ್ನ ಶೈಲಿಯ ಸ್ಪಿನ್. ಆದರೆ ಕೊನೆಗೆ ಈತ ಪಾಲಾಗಿದ್ದು ಪ್ರೀತಿ ಜಿಂಟಾ ಒಡೆತನದ ಕಿಂಗ್ಸ್ ಇಲೆವೆನ್ ಪಂಜಾಬ್.
ಕೇವಲ ಒಂದು ಪಂದ್ಯವನ್ನಾಡಿದ ವರುಣ್ ನಾಲ್ಕು ಓವರ್ ಕೋಟಾದಲ್ಲಿ 35 ರನ್ ಬಿಟ್ಟುಕೊಟ್ಟು ಒಂದು ವಿಕೆಟ್ ಕಿತ್ತಿದ್ದರು. ಬಳಿಕ ಗಾಯದ ಸಮಸ್ಯೆಯಿಂದ ಟೂರ್ನಿಯಿಂದ ಹೊರಬಿದ್ದರು.
ಹೆಚ್ಚಿನ ಓದಿಗಾಗಿ:
6 ಹೊಲಿಗೆ ಹಾಕುವಂತ ಗಾಯದ ನಡುವೆಯೂ ಕೊನೆಯ ಓವರ್ತನಕ ಬ್ಯಾಟಿಂಗ್ ನಡೆಸಿದ ವಾಟ್ಸನ್
ಕಾರ್ಲೋಸ್ ಬ್ರಾತ್ವೈಟ್(ಕೆಕೆಆರ್, 5 ಕೋಟಿ):
ಈ ಆವೃತ್ತಿಯಲ್ಲಿ ಪ್ಲೇ ಆಫ್ ಮಿಸ್ ಮಾಡಿಕೊಂಡ ಕೆಕೆಆರ್ ತಂಡದಲ್ಲಿದ್ದ ದುಬಾರಿ ಆಟಗಾರ ವೆಸ್ಟ್ ಇಂಡೀಸ್ನ ಕಾರ್ಲೋಸ್ ಬ್ರಾತ್ವೈಟ್ ಫ್ಲಾಪ್ ಶೋ ನಡೆಸಿದ್ದಾರೆ.
ಐದು ಕೋಟಿ ನೀಡಿ ಖರೀಸಿದ್ದರೂ ಬ್ರಾತ್ವೈಟ್ ಆಡಿದ್ದು ಕೇವಲ ಎರಡೇ ಪಂದ್ಯ..! ಆಡಿದ ಎರಡು ಮ್ಯಾಚ್ನಲ್ಲಿ ಕೇವಲ 11 ರನ್ ಗಳಿಸಿದ್ದಾರೆ. ಆದರೆ ಬೌಲಿಂಗ್ನಲ್ಲಿ ಯಾವುದೇ ಮ್ಯಾಜಿಕ್ ಮಾಡಲಿಲ್ಲ.
ಶಿವಂ ದುಬೆ(ಆರ್ಸಿಬಿ, 5 ಕೋಟಿ):
ಬಿಗ್ ಹಿಟ್ಟರ್ ಎಂದೇ ಕರೆಸಿಕೊಳ್ಳುವ ಶಿವಂ ದುಬೆ ಆರ್ಸಿಬಿ ತಂಡದಲ್ಲಿ ಯಾವುದೇ ಪರಿಣಾಮಕಾರಿ ಪ್ರದರ್ಶನ ನೀಡಲಿಲ್ಲ. ರಣಜಿಯಲ್ಲಿ ಒಂದೇ ಓವರ್ನಲ್ಲಿ ಐದು ಸಿಕ್ಸರ್ ಸಿಡಿಸಿ ಮಿಂಚಿದ್ದ ದುಬೆ ಐಪಿಎಲ್ನಲ್ಲಿ ತಂಡಕ್ಕೆ ನೆರವಾಗಲಿಲ್ಲ.
ನಾಲ್ಕು ಪಂದ್ಯವನ್ನಾಡಿದ ದುಬೆ ಒಟ್ಟಾರೆ 40 ರನ್ ಗಳಿಸಿ ನಿರಾಸೆ ಮೂಡಿಸಿದರು. ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಸಿಡಿಸಿದ 24 ರನ್ ದುಬೆ ಗರಿಷ್ಠ ಸ್ಕೋರ್.
ಹೆಚ್ಚಿನ ಓದಿಗಾಗಿ:
ವಿಶ್ವಕಪ್ನಲ್ಲಿ ವೇಗದ ಶತಕ ಹಾಗೂ ಅರ್ಧಶತಕ ಸಿಡಿಸಿದ ವೀರರು...
ಪ್ರಭ್ ಸಿಮ್ರನ್ ಸಿಂಗ್(ಪಂಜಾಬ್, 4.8 ಕೋಟಿ):
ಉತ್ತಮ ಮೊತ್ತಕ್ಕೆ ತಂಡ ಸೇರಿದ್ದರೂ ಪ್ರಭ್ಸಿಮ್ರನ್ ಸಿಂಗ್ ಆಡಿದ್ದು ಕೇವಲ ಒಂದು ಮ್ಯಾಚ್. 42 ಎಸೆತದಲ್ಲಿ 106 ರನ್ಗಳ ಅವಶ್ಯಕತೆ ಇದ್ದಾಗ ಮೈದಾನಕ್ಕಿಳಿದ ಪ್ರಭ್ಸಿಮ್ರನ್ ಸಿಂಗ್ 17 ಎಸೆತದಲ್ಲಿ 16 ರನ್ ಗಳಿಸಿ ನಿರಾಸೆ ಮೂಡಿಸಿದರು. ಆ ಬಳಿಕ ಯಾವುದೇ ಅವಕಾಶ ಪಡೆಯಲೇ ಇಲ್ಲ.
ಶಿಮ್ರನ್ ಹೇಟ್ಮಯರ್(ಆರ್ಸಿಬಿ, 4.2 ಕೋಟಿ):
ವಿಂಡೀಸ್ ಮತ್ತೊಬ್ಬ ಬಲಿಷ್ಠ ಬ್ಯಾಟ್ಸ್ಮನ್ ಶಿಮ್ರನ್ ಹೇಟ್ಮಯರ್ ಈ ಬಾರಿಯ ಹರಾಜಿನಲ್ಲಿ ಬೆಂಗಳೂರು ತಂಡಕ್ಕೆ ಸೇರ್ಪಡೆಯಾಗಿದ್ದರು. ಆರಂಭಿಕ ಪಂದ್ಯಗಳಲ್ಲಿ ನೀರಸ ಪ್ರದರ್ಶನ ತೋರಿದ ಪರಿಣಾಮ ನಂತರದಲ್ಲಿ ಬೆಂಚ್ ಕಾದಿದ್ದೇ ಹೆಚ್ಚು.
ಐದು ಪಂದ್ಯಗಳನ್ನಾಡಿದ ಹೇಟ್ಮಯರ್ 90 ರನ್ ಗಳಿಸಿದರು. ಕೊನೆಯ ಪಂದ್ಯದಲ್ಲಿ ಮಿಂಚಿದ್ದ ಕೆರೆಬಿಯನ್ ಆಟಗಾರ 75 ರನ್ ಸಿಡಿಸಿದ್ದರು. ಆದರೆ ಆ ವೇಳೆಗಾಗಲೇ ಆರ್ಸಿಬಿ ಫ್ಲೇ ಆಫ್ ರೇಸ್ನಿಂದ ಹೊರಬಿದ್ದಿತ್ತು.
