ನವದೆಹಲಿ: ಝೈಡಸ್ ಕ್ಯಾಡಿಲಾ(Zydus Cadila) ಕೊರೊನಾ ಲಸಿಕೆಯಾದ ZyCoV-D ಅಕ್ಟೋಬರ್ನ ಆರಂಭದಲ್ಲಿ ಎಲ್ಲರಿಗೂ ದೊರಕುವ ಸಾಧ್ಯತೆಯಿದೆ ಎಂದು ಉನ್ನತ ಮೂಲಗಳು ಮಾಧ್ಯಮ ಸಂಸ್ಥೆಗಳಿಗೆ ಶನಿವಾರ ಮಾಹಿತಿ ನೀಡಿವೆ. ಈ ಹಿಂದೆಯೇ ಅಂದರೆ, ಆಗಸ್ಟ್ 20ರಂದು ಝೈಡಸ್ ಕ್ಯಾಡಿಲಾ ವ್ಯಾಕ್ಸಿನ್ನ ತುರ್ತು ಬಳಕೆಗೆ ಭಾರತದಲ್ಲಿ ಅನುಮತಿ ನೀಡಲಾಗಿತ್ತು.
ZyCoV-D ವಿಶ್ವದ ಮೊದಲ ಡಿಎನ್ಎ ವ್ಯಾಕ್ಸಿನ್ ಆಗಿದ್ದು, ಮೂರು ಬಾರಿ ಲಸಿಕೆಯನ್ನು ಪಡೆಯಬೇಕಾಗುತ್ತದೆ. ಮೊದಲ ಲಸಿಕೆ ಪಡೆದ ನಂತರ 28 ದಿನ ಕಾಲ ಕಾಯುಬೇಕಾಗುತ್ತದೆ. ನಂತರ 56ನೇ ದಿನ ಮೂರನೇ ಬಾರಿಯ ಲಸಿಕೆ ಹಾಕಿಸಿಕೊಳ್ಳಬೇಕಾಗುತ್ತದೆ. ಈಗ ಸದ್ಯಕ್ಕೆ ಅನುಮತಿ ಪಡೆದ ಲಸಿಕೆಯನ್ನು 12 ವರ್ಷದಿಂದ 18 ವರ್ಷದೊಳಗಿನ ಮಕ್ಕಳಿಗೆ ಮಾತ್ರ ಹಾಕಲಾಗುತ್ತದೆ.
ZyCoV-D ಲಸಿಕೆಯನ್ನು ಮೂರು ಡೋಸ್ ಹಾಕಿದಾಗ ಅದು ವೈರಸ್ ವಿರುದ್ಧ ಪ್ರೋಟೀನ್ ಅನ್ನು ಮತ್ತು ರೋಗನಿರೋಧಕ ಶಕ್ತಿಯನ್ನು ಉಂಟುಮಾಡುತ್ತದೆ. ಲಸಿಕೆಯ ಪ್ಲಗ್-ಅಂಡ್-ಪ್ಲೇ ತಂತ್ರಜ್ಞಾನ ಪ್ಲಾಸ್ಮಿಡ್ ಡಿಎನ್ಎ ಪ್ಲಾಟ್‌ಫಾರ್ಮ್ ಅನ್ನು ಆಧರಿಸಿರುವುದರಿಂದ ವೈರಸ್‌ಗಳಲ್ಲಾಗುವ ರೂಪಾಂತರಗಳ ವಿರುದ್ಧ ಹೋರಾಡಲಿದೆ ಎಂದು ಝೈಡಸ್ ಕ್ಯಾಡಿಲಾ ಈ ಹಿಂದೆ ಸ್ಪಷ್ಟನೆ ನೀಡಿತ್ತು.
ಇತ್ತೀಚೆಗೆ ಮಾಧ್ಯಮಗಳಿಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ, ಝೈಡಸ್ ಸಮೂಹದ ವ್ಯವಸ್ಥಾಪಕ ನಿರ್ದೇಶಕ ಡಾ.ಶರ್ವಿಲ್ ಪಟೇಲ್ ಅವರು ಅಕ್ಟೋಬರ್ನಿಂದ ಲಸಿಕೆ ಪೂರೈಕೆಯಾಗಲಿದೆ ಎಂದಿದ್ದಾರೆ. ಅಕ್ಟೋಬರ್ನಿಂದ ಪ್ರತಿ ತಿಂಗಳು ಒಂದು ಕೋಟಿ ಲಸಿಕೆ ಉತ್ಪಾದನೆಗೆ ಕ್ರಮಕೈಗೊಳ್ಳಲಾಗುತ್ತದೆ ಎಂದು ಸ್ಪಷ್ಟನೆ ನೀಡಿದ್ದಾರೆ.
ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯದ ನೀಡಿರುವ ಮಾಹಿತಿಯಂತೆ ದೇಶದಲ್ಲಿ ಇದುವರೆಗೆ 73.73 ಕೋಟಿಗೂ ಹೆಚ್ಚು ಕೋವಿಡ್ ಲಸಿಕೆಯನ್ನು ನೀಡಲಾಗಿದೆ. ಶನಿವಾರ ಸಂಜೆ 7ಗಂಟೆಯವರೆಗೆ ಒಟ್ಟು 64,49,552 ಲಸಿಕೆ ಡೋಸ್‌ಗಳನ್ನು ನೀಡಲಾಗಿದೆ. ಈಗ ಪ್ರಸ್ತುತ ಕೋವಿಶೀಲ್ಡ್, ಕೋವಾಕ್ಸಿನ್ ಮತ್ತು ಸ್ಪುಟ್ನಿಕ್ ವಿ ಲಸಿಕೆಗಳನ್ನು 18 ವರ್ಷ ಮೇಲ್ಪಟ್ಟವರಿಗೆ ನೀಡಲಾಗುತ್ತಿದೆ.
ಇದನ್ನೂ ಓದಿ: ಮುತ್ತೂಟ್ ಫೈನಾನ್ಸ್ ಕಚೇರಿಯಲ್ಲಿ 12 ಕೆಜಿ ಚಿನ್ನ, 3 ಲಕ್ಷ ನಗದು ದರೋಡೆ
