ನವದೆಹಲಿ: ಪ್ರೇಯಸಿ ಮತ್ತೊಬ್ಬನ ಜತೆ ಡೇಟಿಂಗ್ ಹೋಗುತ್ತಿದ್ದಕ್ಕೆ ಕುಪಿತಗೊಂಡ ಪ್ರಿಯತಮ, ಯುವಕನಿಗೆ ಚಾಕುವಿನಿಂದ ಇರಿದು ಕೊಂದಿದ್ದಾನೆ.
ಅಂಬೇಡ್ಕರ್ ನಗರದಲ್ಲಿ ವಾಸಿಸುತ್ತಿದ್ದ ದೀಪಕ್ ಹಾಗೂ ಯುವತಿ ಮೂರು ವರ್ಷಗಳಿಂದ ಪ್ರೀತಿಸುತ್ತಿದ್ದರು. ಆದರೆ, ಇತ್ತೀಚೆಗೆ ಯುವತಿ ಯೋಗಿ ಎಂಬಾತನ ಸಹವಾಸ ಮಾಡಿದ್ದಕ್ಕೆ ದೀಪಕ್, ಪ್ರೇಯಸಿ ಕರೆಸಿ ಬುದ್ದಿಮಾತು ಹೇಳಿದ್ದ. ಆದರೂ, ಎಚ್ಚೆತ್ತುಕೊಳ್ಳಲಿಲ್ಲ.
ಈ ವಿಚಾರ ತಿಳಿದ ಯೋಗಿ ಹಾಗೂ ಅವನ ಸಹಚರರು ದೀಪಕ್ ಹತ್ಯೆಗೆ ಸಂಚು ರೂಪಿಸಿದರು. ವಿಷಯ ತಿಳಿದ ದೀಪಕ್ ಅಂಬೇಡ್ಕರ್ ನಗರ ತೊರೆದು ಬೇರೆಡೆ ವಾಸಿಸಲು ಶುರು ಮಾಡಿದ. ಎಷ್ಟು ದಿವಸ ಹೀಗೆ ಇರೋದು ಎಂದು ಯೋಚಿಸಿದ ದೀಪಕ್, ಯೋಗಿ ಸಹಚರ ಕುನಾಲ್ ಕೊಲೆಗೆ ಹೊಂಚು ಹಾಕಿ, ಆನ್ಲೈನ್ನಲ್ಲಿ ಬುಕ್ ಮಾಡಿ ಎರಡು ಚಾಕುಗಳನ್ನು ತರಿಸಿಕೊಂಡ. ಜೂನ್ 1 ರ ರಾತ್ರಿ ಕುನಾಲ್ ತನ್ನ ತಂದೆಯ ಜನ್ಮದಿನಕ್ಕೆ ಕೇಕ್ ತರಲು ಮದಂಗೀರ್ ಬಳಿಯ ಚೌಕ್ನಲ್ಲಿ ಹೋಗುತ್ತಿದ್ದಾಗ, ದೀಪಕ್ ಮತ್ತು ಸಹಚರರು ಅವನನ್ನು ಇರಿದು ಕೊಂದಿದ್ದಾರೆ.
ಕೂಡಲೇ ಸ್ಥಳಕ್ಕಾಗಮಿಸಿದ ಪೊಲೀಸರು ಸಮೀರ್ ಮತ್ತು ಸೊಹೈಲ್ ಎಂಬುವವರನ್ನು ಬಂಧಿಸಿದರು. ಆದರೆ, ದೀಪಕ್ ಮತ್ತು ಗೌರವ್ ತಲೆ ಮರೆಸಿಕೊಂಡಿದ್ದರು. ಬಳಿಕ ತೀವ್ರ ಶೋಧ ನಡೆಸಿದ ಖಾಕಿ ಪಡೆ, ಹಸ್ತಾಲ್ ಗ್ರಾಮದ ಬಳಿ ಆರೋಪಿಗ ಹೆಡೆಮುರಿ ಕಟ್ಟಿತು.
