ಯುಪಿಯಲ್ಲಿ ಮತ್ತೊಂದು ಹೀನ ಕೃತ್ಯ: ಕಲ್ಯಾಣ ಮಂಟಪದಲ್ಲಿ ನಡೀತು ಗ್ಯಾಂಗ್ ​ರೇಪ್​!

ಹಥ್ರಾಸ್​ ಪ್ರಕರಣ ಬಿಸಿಯಾಗಿರುವಾಗಲೇ ಉತ್ತರಪ್ರದೇಶದಲ್ಲಿ ಮತ್ತೊಂದು ಹೀನ ಕೃತ್ಯ ಬೆಳಕಿಗೆ ಬಂದಿದೆ. ಕಲ್ಯಾಣ ಮಂಟಪವೊಂದರಲ್ಲಿ ಮಹಿಳೆಯ ಮೇಲೆ ಅತ್ಯಾಚಾರ ನಡೆದಿರುವ ಘಟನೆ ಮಥುರಾದಲ್ಲಿ ನಡೆದಿದೆ.

ಮಥುರಾ: ರಸ್ತೆ ಬದಿಯ ಕಲ್ಯಾಣ ಮಂಟಪವೊಂದರಲ್ಲಿ 36 ವರ್ಷದ ಮಹಿಳೆ ಮೇಲೆ ಸಾಮೂಹಿಕ ಅತ್ಯಾಚಾರ ನಡೆದಿರುವ ಘಟನೆ ನಗರದ ಹೊರವಲಯದಲ್ಲಿ ನಡೆದಿದೆ.

ನಡೆದಿದ್ದೇನು?

ಕುಟುಂಬವೊಂದು ಭರತ್​ಪುರ್​ಗೆ ತೆರಳುತ್ತಿದ್ದಾಗ ಸುಮಾರು ರಾತ್ರಿ 9 ಗಂಟೆಗೆ ಮಥುರಾ ಹೊರವಲಯದಲ್ಲಿ ಕಾರು ಕೆಟ್ಟಿದೆ. ಕಾರು ಕೆಟ್ಟಿದ್ದರಿಂದ ಆ ಕುಟುಂಬ ಸಮೀಪದ ಸೈನಿ ಸೇವಾ ಸದನ್​ ಕಲ್ಯಾಣ ಮಂಟಪಕ್ಕೆ ತೆರಳಿ ಬಾಡಿಗೆಗೆ ರೂಂವೊಂದನ್ನು ಪಡೆದಿದೆ.

ಮಧ್ಯರಾತ್ರಿ ಮಹಿಳೆಗೆ ಬಾಯಾರಿಕೆ ಆಗಿದೆ. ನೀರು ಕುಡಿಯಲು ರೂಂನಿಂದ ಹೊರ ಬಂದಿದ್ದಾಳೆ. ಈ ವೇಳೆ ಕಲ್ಯಾಣ ಮಂಟಪದ ಕೆಲಸಗಾರರಿಬ್ಬರು ಆಕೆಯನ್ನು ಮಾಳಿಗೆ ಮೇಲೆ ಕರೆದೊಯ್ದು ಸಾಮೂಹಿಕ ಅತ್ಯಾಚಾರ ನಡೆಸಿದ್ದಾರೆ ಎನ್ನಲಾಗ್ತಿದೆ.

ಅತ್ಯಾಚಾರದ ಬಗ್ಗೆ ಕುಟುಂಬಸ್ಥರು ಮಥುರಾ ಹೈವೇ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಆರೋಪಿಯೊಬ್ಬನನ್ನು ಬಂಧಿಸಿದ್ದು, ಮತ್ತೊಬ್ಬ ಪರಾರಿಯಾಗಿದ್ದಾನೆ. ಆದಷ್ಟು ಬೇಗ ಆ ಆರೋಪಿಯನ್ನು ಸೆರೆ ಹಿಡಿಯಲಾಗುವುದೆಂದು ಹಿರಿಯ ಪೊಲೀಸ್​ ಅಧಿಕಾರಿ ಉದಯ್​ ಶಂಕರ್​ ಸಿಂಗ್​ ಹೇಳಿದ್ದಾರೆ.

ಈ ಘಟನೆ ಕುರಿತು ಪ್ರಕರಣ ದಾಖಲಾಗಿದ್ದು, ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.