દમણગંગા નદીમાં ત્રણ વિદ્યાર્થીઓ ડૂબ્યાં, 2નો આબાદ બચાવ એક ગુમ

નદીમાંથી બે વિદ્યાર્થીઓને સ્થાનિકો દ્વારા બચાવવામાં આવ્યા હતા. પરંતુ ત્રીજા વિદ્યાર્થીની કોઈ ભાળ ન મળતા સ્થાનિકો સહિત ફાયરબ્રિગેડ દ્વારા શોધખોળ હાથ ધરવામા આવી છે. સ્કૂલમાંથી નીકળેલા વિદ્યાર્થીઓ ઘરે જવાની જગ્યાએ દમણ ગંગા નદીમાં ન્હાવા પડ્યાં હતાં. કાંઠેથી વિદ્યાર્થીઓના શૂઝ અને ડ્રેસ મળી આવ્યાં હતાં. હાલ એક વિદ્યાર્થીની શોધખોળ ચાલી રહી છે. સમગ્ર ઘટના અંગે વાલીઓને જાણ થતાં ત્રણેય વિદ્યાર્થીઓના માતા-પિતા દમણગંગા નદીના કિનારે પહોંચી ગયા હતાં.

આ અંગે ગુમ થયેલ સૌભાગ્ય નામના વિદ્યાર્થીના વાલીઓએ સ્કૂલની બેદરકારીનો આક્ષેપ કર્યો છે. જ્યારે શાળાના પ્રિન્સિપાલ રાજેશ્રી પટેલે જણાવ્યું હતું કે કુલ પાંચ વિદ્યાર્થીઓ જેમાં સત્યમ, અંકિત, દિપાંશું અને સૌભાગ્ય શાળાએ ગેટથી અંદર આવ્યા જ નથી. તેઓ છેલ્લા ઘણા સમયથી શાળાએ અનિયમિત હતા.જો કે હાલ તો દમણગંગા નદીના પ્રવાહમાં ડૂબી જનાર વિદ્યાર્થીની તરવૈયાઓ દ્વારા તપાસ હાથ ધરી છે. પરંતુ હજુ સુધી કોઈપણ જાણકારી મળી નથી. વિદ્યાર્થીની શોધખોળ માટે વાપી ફાયર, નોટિફાઇડ ફાયર, પોલીસ અને ચંદ્રપુરની તરવૈયા ટીમને પણ હોડી સાથે બોલાવી 11 વાગ્યાથી સતત સાંજ સુધી શોધખોળ કરી હતી. જેમાં વિદ્યાર્થીનો પત્તો નહીં મળતા હવે 24 કલાક બાદ વધુ શોધખોળ હાથ ધરશે.