સુરત: શહેરના સુમુલ ડેરી રોડ પર રહેતા હોમ બેકર રોમા પટેલ અને તેના પરિવાર દ્વારા 2 ફૂટથી વધુની ઊંચાઈ ધરાવતી અને ચોકલેટમાંથી બનાવેલી ગણેશની પ્રતિમાનું સ્થાપન કરવામાં આવ્યું હતું. જ્યાં 10 દિવસ બાદ મંગળવારના રોજ અગિયારમાં દિવસે ઇકો ફ્રેન્ડલી ગણેશની પ્રતિમાનું વિસર્જન કરવામાં આવ્યું હતું. આ ગણેશની પ્રતિમા સંપૂર્ણ રીતે ચોકલેટમાંથી બનાવવામાં આવી હતી. દુધાભિષેક કરી પ્રતિમાનું ઘરમાં જ વિસર્જન કરવામાં આવ્યું હતું.
ગણેશની આ પ્રતિમાં દૂધમાં સંપૂર્ણ રીતે ભળી જતા પ્રસાદરૂપે અનાથ આશ્રમના બાળકોને પીરસવામાં આવ્યું છે. પર્યાવરણને થતાં નુકસાનને લઈ સુરતની હોમ બેકર રોમાં પટેલ દ્વારા આ ઉમદા પ્રયાસ કરવામાં આવ્યો હતો. જે ખૂબ જ બિરદાવવા લાયક પ્રયાસ માનવામાં આવી રહ્યો છે.
રોમા પટેલ અને તેના પરિવાર દ્વારા કુલ 60 લીટર દુધથી ગણેશની પ્રતિમાનો દુધાભિષેક કરવામાં આવ્યો હતો. ચોકલેટની આ ગણેશની પ્રતિમાંમાં એડીબલ કલરનો ઉપયોગ કરવામાં આવ્યો હતો. આ પ્રતિમાને 10 દિવસ સુધી પંખા નીચે મુકવામાં આવી હતી. જ્યાં પટેલ પરિવાર દ્વારા 10 દિવસ સુધી ભક્તિભાવપૂર્વક પૂજા અર્ચના કરી મંગળવાર એટલે અગિયારમાં દિવસે દુધાભિષેક કરી વિસર્જન કરવામાં આવ્યું હતું.
