પાટણ: જિલ્લાના નગરપાલિકાના સભાખંડમાં મળેલી આજની સામાન્ય સભાની બેઠકમાં વિપક્ષના સભ્યોએ ભૂગર્ભ ગટરની ટેન્ડર પ્રક્રિયા(Tender Process of Underground Drainage) તથા શહેરના માર્ગો ઉપર 28 દિવસ પહેલા કરવામાં આવેલા પેચવર્કની કામગીરી બાબતે શાસક પક્ષ સામે ભ્રષ્ટાચારના આક્ષેપો કર્યા હતા. આ સાથે રૂપિયા 500 અને 2000ની નકલી નોટો સામાન્ય સભામાં ઉછાળી વિરોધ કરતા શાસક પક્ષના સભ્યો સભામાં થોડીવાર માટે સ્તબ્ધ થઈ ગયા હતા.
બિસ્માર માર્ગો, ભૂગર્ભ ગટર ઉભરાવાની સમસ્યાઓને લઈને શાસક પક્ષને ઘેરાયો - પાટણ નગરપાલિકાની સામાન્ય સભાની બેઠક નગરપાલિકા હોલમાં પ્રમુખ સ્મિતા પટેલના અધ્યક્ષ સ્થાને યોજાઈ હતી. જેમાં એજન્ડા ઉપરના 84 અને વધારાના 13 કામો મળી કુલ 97 કામો અંગે ચર્ચાઓ કરવામાં આવી હતી. શહેરના બિસ્માર બનેલા માર્ગો, ભૂગર્ભ ગટર ઉભરાવાની સમસ્યાઓને મુદ્દે વિપક્ષના સભ્યોએ શાસક પક્ષને ઘેર્યો હતો. તત્કાલીન ચીફ ઓફિસરે પગાર ચૂકવવામાં નાણાકીય છેતરપિંડી કરી હોય તેમના સામે પોલીસ ફરિયાદ કરવા શાસક અને વિપક્ષના સભ્યોએ રજૂઆત કરી હતી.
આ પણ વાંચો: ભારે વરસાદથી રસ્તાઓમાં પડેલા ખાડા રિપેર કરવા યુદ્ધના ધોરણે કામગીરી
અનક્વોલિફાઇડ એજન્સીને બારોબાર કોન્ટ્રાક્ટ - નગરપાલિકાની ભૂગર્ભ શાખામાં ચેરમેનને(Chairman in Underground Branch of Municipality) અંધારામાં રાખી તેમની સહી વગર જોહુકમીથી ટેન્ડર પાસ કરાવી અનક્વોલિફાઇડ એજન્સીને બારોબાર કોન્ટ્રાક્ટ(Contract to Unqualified Agency) આપવાના મુદ્દે તથા શહેરના બિસ્માર માર્ગોનું પેચ વર્કનું કામ 28 દિવસ પહેલા કરવામાં આવ્યું હતું. કોન્ટ્રાક્ટર દ્વારા નિષ્કાળજીથી કામ કરાતા વરસાદ પડતા જ માર્ગો ફરી ખાડા ખૈયાવાળાં બન્યા છે.
કોન્ટ્રાક્ટરને બ્લેક લિસ્ટ કરવાની જગ્યાએ ફરી કામ અપાય છે - આવા કોન્ટ્રાક્ટરને બ્લેક લિસ્ટમાં મુકવાની જગ્યાએ સત્તાધારી પક્ષના સભ્યોએ આ કોન્ટ્રાક્ટરને પુનઃ અગાઉનું કામ આપવાની તજવીજ હાથ ધરતા વિપક્ષના સભ્યોએ નગરપાલિકાની સામાન્ય સભામાં રૂપિયા 500 અને 2000ની ખોટી નોટો ઉછાળી શાસક પક્ષના સભ્યો સામે ભ્રષ્ટાચારનો આક્ષેપ કરી વિરોધ દર્શાવ્યો હતો.
ખોટી નોટો ઉછાળી ભારતીય ચલણનું અપમાન - નગરપાલિકાની સામાન્ય સભામાં વિપક્ષના સભ્યોએ ખોટી નોટો ઉછાળી ભ્રષ્ટાચારના આક્ષેપો કરવા બાબતે શાસક પક્ષના ઉપપ્રમુખ ધર્મેશ પ્રજાપતિએ જણાવ્યું હતું કે, વિપક્ષના સભ્યોએ જાહેરમાં ખોટી નોટો ઉછાળી ભારતીય ચલણનું અપમાન કર્યું છે. જે બાબતે તેઓ પર કાર્યવાહી કરાશે. આ ઉપરાંત વિપક્ષ દ્વારા કરવામાં આવેલા આક્ષેપોને તેઓ આજ દિન સુધી સાબિત કરી શક્યા નથી. તેમનું કામ આક્ષેપો કરવાનું છે અને સત્તાધારી પક્ષનું કામ વિકાસના કામો કરવાનું છે.
આ પણ વાંચો: બિસ્માર રોડરસ્તા મામલે HCની ગંભીર ટકોર પણ સરકાર પોતાની જ ધૂનમાં !
વિપક્ષનો મુદ્દો ટોપ ઓફ ધ ટાઉન બન્યો - પાટણ નગરપાલિકાના ઇતિહાસમાં પ્રથમ વખત જ સામાન્ય સભા દરમિયાન સભાગૃહમાં ભ્રષ્ટાચાર મામલે વિપક્ષે આક્રમણ વલણ અપનાવી નકલી નોટોનો ઉછળતા આ મુદ્દો શહેરમાં ટોક ઓફ ધ ટાઉન બન્યો છે.
