મોરબી : વાંકાનેર તાલુકાના જાલી ગામમાં એક ફૂલ દો માલી જેવી સ્થિતિ સર્જાઈ હતી. એક જ યુવતીને બે યુવાનો પ્રેમ કરતા હોય અને યુવતીને અન્ય પ્રેમી સાથેના સંબંધમાં યુવાન આડો આવતો હોવાથી અન્ય પ્રેમી સાથે મળીને પ્રેમિકાએ પ્રેમીને મોતને ઘાટ ઉતારી દીધો હતો. આ હત્યાના બનાવ મામલે પોલીસે ગુનો નોંધી આરોપી પ્રેમિકા સહિત 2 આરોપીઓને ઝડપી લઈને ધોરણસરની કાર્યવાહી હાથ ધરી છે.
પ્રેમિકાએ પ્રેમીનું કાસળ કાઢ્યું : બનાવની મળતી વિગત અનુસાર વાંકાનેર તાલુકાના જાલી ગામના રહેવાસી ચોથાભાઈ રૂપાભાઈ રંગપરા વાળાએ આરોપી ધનજી કાનાભાઈ માલકીયા અને અરૂણાબેન મનુભાઈ ગોરીયા વિરુદ્ધ પોલીસ ફરિયાદ નોંધાવી હતી. જેમાં જણાવ્યું હતું કે, ફરિયાદીના ભાઈ મૃતક પાંચાભાઈ રૂપાભાઈ રંગપરાને આરોપી અરૂણાબેન ગોરીયા સાથે અને આરોપી ધનજી માલકીયા સાથે પ્રેમ સંબંધ હતા. જેથી બંને આરોપીના પ્રેમ સંબંધમાં નડતરરુપ હોવાથી બંને ઈસમોએ ભેગા મળીને હત્યાનો પ્લાન બનાવ્યો હતો.
આરોપી મહિલા ઝબ્બે : બંને આરોપીઓએ યુવાનને ભુપતભાઈની વાડીએ બોલાવી ગળે ટુંપો દઈ હત્યા કરી હતી. આ મામલે પોલીસને જાણ કરવામાં આવી હતી. જેમાં પોલીસે ફરિયાદના આધારે ગુનો નોંધી તપાસ હાથ ધરી હતી. આ બનાવને પગલે વાંકાનેર સીટી પોલીસે હત્યાનો ગુનો નોંધી તપાસના ચક્રો ગતિમાન કર્યા હતા. જેમાં આરોપી ધનજી કાનાભાઈ માલકીયા અને અરૂણાબેન મનુભાઈ ગોરીયાને ઝડપી લઈને વધુ તપાસ ચલાવી છે.
