ખરીફ ઋતુમાં 15મી ઓક્ટોબરથી 20મી નવેમ્બર દરમિયાન કમોસમી વરસાદ પડવાથી ખેડૂતોને ખેતીના પાકમાં નુકશાનને ધ્યાનમાં લઇ ખેડૂતોને રાજ્ય સરકાર દ્વારા SDRF અને રાજ્ય બજેટમાંથી કૃષિ સહાય પેકેજ આપવાની જાહેરાત કરવામાં આવી હતી.
જિલ્લામાં આવેલા તમામ તાલુકાના ખેડૂતોને કૃષિ સહાય ગુજરાત સરકાર દ્વારા આપવાનું જાહેર બહાર પાડવામાં આવ્યું હતું. જે અંતર્ગત હેક્ટર દીઠ 6,800 રૂપિયા સહાય વધુમાં વધુ બે હેક્ટર સુધી એટલે કે વધુમાં વધુ 13,600 રૂપિયા તેમજ ઓછામાં ઓછી ચાર હજાર રૂપિયા કૃષિ સહાય મહીસાગર જિલ્લાના ખેડૂતોને મળવા પાત્ર હતી અને આ કૃષિ સહાય મેળવવા જિલ્લાના ખેડૂતોને ઓનલાઇન અરજી 31મી ડિસેમ્બર સુધી કરવાની હતી.
જે અંતર્ગત મહીસાગર જિલ્લાના 59,944 ખેડૂતો દ્વારા સરકારની સહાય મેળવવા ઓનલાઇન અરજી કરી હતી અને જેમાંથી 36,419 ખેડૂતોને 23.59 કરોડ રૂપિયાની સહાય સરકાર દ્વારા તેમના બેન્ક ખાતામાં જમા કરી દેવામાં આવી છે અને બાકીના ખેડૂતોને ટૂંકા સમયમાં સહાય ચૂકવી દેવામાં આવશે. ખેડૂતોને સહાય મળતા ખેડૂતો સરકારનો આભાર વ્યક્ત કર્યો હતો.