ઇટીવી ભારત સાથેની ખાસ વાતચીતમાં સોમનાથ ટ્રસ્ટના ટ્રસ્ટી સેક્રેટરી પી.કે.લહેરીએ જણાવેલ કે, આ પ્લાઝાની અંદર સાત હજાર લોકોને સમાવાની ક્ષમતા હશે. તે સાથે જ અહીં શ્રદ્ધાળુઓને સામાન ઘર, જૂતા ઘર, મેડિકલ સુવિધાઓ, પ્રસાદ ઘર, અલ્પાહાર ગૃહ તથા સોવેનિયર શોપ બધું એક જગ્યાએ મળી રહેશે. તેની સાથે જ સોમનાથ ટ્રસ્ટ પાર્વતી માતાનું મંદિર બનાવી સોમનાથમાં શિવ સાથે શક્તિની ઉપાસનાનો સંગમ બનાવવા જઈ રહ્યું છે.
ત્યારે ઉલ્લેખનીય છે કે, સોમનાથના વિકાસ માટે માત્ર સોમનાથ ટ્રસ્ટ જ નહીં પરંતુ કેન્દ્ર સરકાર તેમજ ગુજરાત સરકાર પણ એટલો જ રસ દાખવી રહી છે. ગુજરાત સરકાર દ્વારા સોમનાથ પાસે જ એક અદ્યતન વીઆઈપી સર્કિટ હાઉસનું નિર્માણ થનાર છે. તેમજ કેન્દ્ર સરકારની પ્રસાદ યોજના અંતર્ગત સોમનાથમાં 15 કરોડ જેવી માતબર રકમનું યાત્રી સુવિધા ભવન બનાવાઈ રહ્યું છે. જેમાં યાત્રીઓ માટે કેફેટેરિયા, લાઈબ્રેરી, આરામગૃહ, લોંન્જ જેવી એરપોર્ટ કક્ષાની ઉચ્ચ ગુણવત્તા વાળી સુવિધાઓ આપવામાં આવશે.
તેની સાથે જ અહીં ગૃહપ્રધાન અમિત શાહના હસ્તે શિલાન્યાસ થયેલ વોકવેનો ડ્રિમ પ્રોજેક્ટ આકાર લેનાર છે. જે સોમનાથથી ગોલોકધામ સુધી માર્ગ જોડશે. જે સોમનાથ અને સમુદ્ર બન્નેની વચ્ચે થઈને જશે. જેમાં યાત્રીઓને તમામ સુવિધા પુરી પાડવામાં આવશે.
સોમનાથનું ટ્રસ્ટી મંડળ દેશનું સૌથી પ્રભાવશાળી મંડળ છે. સોમનાથ ટ્રસ્ટના અધ્યક્ષ કેશુભાઈ પટેલ છે. તેમજ આ ટ્રસ્ટના ટ્રસ્ટી વડાપ્રધાન નરેન્દ્ર મોદી, ગૃહપ્રધાન અમિત શાહ, તેમજ પૂર્વ નાયબ વડાપ્રધાન લાલકૃષ્ણ અડવાણી છે. આ ટ્રસ્ટના ટ્રસ્ટી સેક્રેટરી પી.કે લહેરી ગુજરાતના પૂર્વ મુખ્ય સચિવ રહ્યા છે. ત્યારે સોમનાથ ટ્રસ્ટ તેમજ કેન્દ્રસરકાર અને રાજ્યસરકાર સોમનાથને તેના સુવર્ણ યુગ ભણી દોરી જઇ રહી છે. એમ કહીએ તો જરા પણ અતિશયોક્તિ નહી લાગે.
