ડાંગઃ કૉંગ્રેસ સમગ્ર દેશમાં લોકસભા ચૂંટણીની તડામાર તૈયારીઓ કરી રહી છે. ગુજરાતમાં કૉંગ્રેસે લોકસભા ચૂંટણીમાં સફળતા મેળવવા માટે કમર કસી છે. જે અંતર્ગત પક્ષે જિલ્લા સંગઠનમાં મોટા ફેરફાર કર્યા છે. કૉંગ્રેસ દ્વારા ગુજરાતમાં નવી ટીમ જાહેર કરવામાં આવી છે. જેમાં પૂર્વ ધારાસભ્યો સહિત દિગ્ગજ નેતાઓને 10 જિલ્લાની જવાબદારી સોંપવામાં આવી છે. ડાંગ જિલ્લા કૉંગ્રેસ સમિતિના પ્રમુખ તરીકે મુકેશ પટેલની વરણી કરવામાં આવી છે. મુકેશ પટેલની વરણી થયા બાદ કૉંગ્રેસના કાર્યકર્તાઓ ગેલમાં આવી ગયા છે.
નિષ્ઠાવાન કૉંગ્રેસીઃ મુકેશ પટેલએ ડાંગ જિલ્લામાં કૉંગ્રેસ વિચારધારા સાથે સંકળાયેલા અગ્રણી ગણાય છે. તેમણે ડાંગ જિલ્લામાં કૉંગ્રેસ સમિતિના મંત્રી તરીકે 3 વર્ષ, મહામંત્રી તરીકે 2 વર્ષ નિષ્ઠાપૂર્વક ફરજ બજાવી છે. મુકેશ પટેલે કાલીબેલ વિસ્તારમાં તેમણે કૉંગ્રેસ પક્ષ માટે બહુ કાર્ય કર્યુ છે. 2015માં જિલ્લા અને તાલુકા પંચાયતની ચૂંટણીમાં કૉંગ્રેસ તમામ બેઠકો જીતે તે માટે તેમણે મહત્વની ભૂમિકા ભજવી હતી. તેઓ નાનપણથી જ કૉંગ્રેસના પ્રચારમાં સક્રિય રીતે સંકળાયેલા છે. મુકેશ પટેલ પાર-તાપી નદીના જોડાણ યોજનાની વિરોધી ચળવળનો પ્રમુખ ચહેરો રહ્યા હતા. કેવડિયા બચાવ આંદોલન સમિતિના ડાંગ જિલ્લા પ્રમુખ તરીકે પણ રહી ચૂક્યા છે. તેઓ ડાંગના આદિવાસીઓમાં કૉંગ્રેસ સંગઠન માટે અગ્રેસર અને એક વફાદાર પાયાના કાર્યકર તરીકે ઓળખાતા યુવા નેતા છે.
ભાજપના કુશાસનમાંથી દેશને મુકત કરાવા કૉંગ્રેસે લડત શરુ કરી છે. આ લડતમાં મને ડાંગ જિલ્લા કૉંગ્રેસ સમિતિનો પ્રમુખ બનાવવા બદલ રાહુલ ગાંધી, સોનિયા ગાંધી, મલ્લિકાર્જુન ખડગે, શક્તિ સિંહ ગોહિલ અને અમિત ચાવડાનો ખૂબ ખૂબ આભારી છું. હું ડાંગના કાર્યકરો અને હોદ્દેદારો સાથે ખભેથી ખભો મિલાવીને કૉંગ્રેસ માટે લોકસભાની ચૂંટણીમાં કાર્ય કરીશ...મુકેશ પટેલ(પ્રમુખ, ડાંગ જિલ્લા કૉંગ્રેસ સમિતિ)
સમગ્ર પરિવાર કૉંગ્રેસીઃ મુકેશ પટેલના પિતા વર્ષ 1985થી 1990 દરમિયાન ગુજરાત વિધાનસભામાં કૉંગ્રેસના ધારાસભ્ય રહી ચૂક્યા હતા. ડાંગ પંચાયતમાં 17 વર્ષ સુધી તેઓ શૈક્ષણિક સમિતિના અધ્યક્ષ તરીકે સેવા આપી ચૂક્યા છે. મુકેશ પટેલના પત્ની 2015થી 2020 સુધી વઘઈ તાલુકા પંચાયતના સભ્ય અને કારોબારી સમિતિના અધ્યક્ષ રહી ચૂક્યા છે. અત્યારે તેમના પત્ની ડાંગ જિલ્લા પંચાયતના એકમાત્ર કૉંગ્રેસી સભ્ય છે. મુકેશ પટેલના ભાઈ સરવર ગ્રામ પંચાયતમાં સરપંચ તરીકે કાર્યરત છે. જેઓ પણ કૉંગ્રેસી વિચારધારાના સમર્થક છે.
