વેકેશનમાં દમણમાં ગુજરાતી સહિત અનેક વિદેશી પ્રવાસીઓનો પણ દબદબો રહેતો હોય છે. એમાંય સુરતીલાલાઓ અને અમદાવાદીઓ માટે વેકેશન દરમિયાન દમણ એ મહત્વનું પ્રવાસન સ્થળ છે. અહીં પ્રવાસે આવેલા પ્રવાસીઓએ દમણની સી ફૂડની વાનગીઓને ખૂબ વખાણી હતી. એ સાથે અન્ય વેજ વાનગીઓ પણ ટેસ્ટમાં બેસ્ટ હોવાનું જણાવ્યું હતું. દમણમાં જામપોર બીચ પર અને દેવકા બીચ પર 100થી વધારે ખાણીપીણીના સ્ટોલ આવેલા છે. આ સ્ટોલમાં વેજ સાથે નોનવેજ વાનગી મળી રહે છે.
બીચ પર એક તરફ ઘૂઘવતો સમુંદર હોય અને તેની ઠંડી હવા સાથે સી ફૂડની વાનગીઓની મોજ માણવા આવેલા પ્રવાસીઓએ વધુમાં જણાવ્યું હતું કે, 'દમણમાં સી ફૂડની વેરાયટીમાં ઝીંગા અને પાપલેટનો સ્વાદ અદ્ભુત છે. અમે અલગ અલગ સ્ટોલ પર સી ફૂડની અનેક અલગ વાનગીઓનો ટેસ્ટ કર્યો જે ખૂબ જ ટેસ્ટી હતી. આ સ્વાદ અને સોડમ અમારા માટે યાદગાર સંભારણું બનીને રહેશે.' તો સ્થાનિક વોટર સ્પોર્ટ્સ રાઈડિંગના માલિક પુનાભાઈએ જણાવ્યું હતું કે, ગુજરાત ડ્રાય સ્ટેટ હોવાથી સી ફુડ અને પીણાની મજા લેવા મોટી સંખ્યામાં લોકો આવે છે.
ઉલ્લેખનીય છે કે, દિવાળી, હોળી જેવા તહેવારો દરમિયાન 3-4 દિવસના મીની વેકેશનમાં અને 31 ડિસેમ્બરની ઉજવણી કરવા દમણ આવતા મોટાભાગના પ્રવાસીઓ ખુબ જ આનંદનો અનુભવ કરે છે. પરંતુ વેકેશન દરમિયાન પરિવાર સાથે આવતા પ્રવાસીઓના ધસારાને કારણે દરિયાકિનારે સ્ટોલ લગાવી સી ફૂડ તેમજ અન્ય ખાણીપીણીની વસ્તુઓનુ વેચાણ કરી ગુજરાન ચલાવતા સ્થાનિક ધંધાર્થીઓ માટે સળંગ એક મહિનો સારા ધંધાની સિઝન ગણાય છે.