અમરેલી: જિલ્લામાં અવાર-નવાર અકસ્માતની ઘટનાઓ સામે આવી રહી છે. ત્યારે મોડી રાતે વધુ એક અકસ્માતની ઘટના સામે આવી છે. જેમાં લાપાળીયા ગામ નજીક પુરપાટ સ્પીડે આવી રહેલી ઇકો કાર રોંગ સાઈડમાં આવી જતા બાઈકને અડફેટે લીધી હતી. જેથી અકસ્માત સર્જાયો હતો. બાઈકમાં એક જ પરિવારના 5 લોકો સવાર હતા, જેમાં પરિવારની નજર સામે બાળકનું ઘટના સ્થળે મોત થયું છે. જ્યારે અન્ય લોકોને ઈજા પહોંચી છે.
સારવાર માટે ખસેડવામાં આવ્યા: આ અકસ્માતમાં ઈજાગ્રસ્તને મોડી રાતે અમરેલી હોસ્પિટલમાં સારવાર માટે ખસેડવામાં આવ્યા હતા. અમરેલી તાલુકા પોલીસ પણ અકસ્માતની ઘટનાને લઈ તપાસ હાથ ધરી છે. બાઇક સવાર પિતા સુનિલભાઈ મહેશભાઈ ડાવર,પત્ની લાલબાઈ સુનિલભાઈ ડાવર, શર્મિલા સુનિલભાઈ ડાવર આશરે 5 વર્ષ, આ તમામને નાની મોટી ઈજાઓ થઈ હતી. જ્યારે ત્રણ વર્ષીય રેશમ નામના બાળકને ગંભીર ઈજાઓ પહોંચતા તેનું મોત થયું છે. જ્યારે અન્ય એક બાળકનો આબાદ બચાવ થયો હતો. જેને કોઈ ઈજા પણ થઈ ન હતી. જોકે, અકસ્માતમાં એક બાળકનું મોત થતા પરિવારમાં શોકનો માહોલ છવાયો હતો.
5 લોકો રોડ પર ફંગોળાયા: મોડી રાતે બાઇક સવાર પરિવાર બોરાળાથી કેરાળા જઈ રહ્યો હતો. ત્યારે અમરેલીના લાપાળીયા ગામ નજીક પુરપાટ સ્પીડે આવી રહેલા ઇકો વાહને હડફેટે લેતા બાઈક સવાર 5 લોકો રોડ પર ફંગોળાયા હતા. જેના કારણે થોડીવાર માટે અફડા તફડી સર્જાઈ હતી. આ સમગ્ર અકસ્માતની ઘટનાને પગલે અમરેલી તાલુકા પોલીસ મથકે ગુનો નોંધવામાં આવ્યો છે. જેને પગલે પોલીસે ઇકો ચાલકને પકડવા માટેની કવાયત હાથ ધરી છે.