સુરત: કોરોના વાયરસ રૂપી રાક્ષસ ફરી સક્રિય થઈ રહ્યો હોય એવું ચિત્ર સામે આવ્યું છે. જેમાં સુરતમાંથી આ વર્ષનો પહેલો કેસ સામે આવ્યો છે. જેમાં દર્દીનું મૃત્યું નીપજ્યું છે. બુધવારે સુરત શહેરમાં આ મહિલાનો કોરોનાનો રીપોર્ટ પોઝિટિવ આવ્યો હતો. એ પછી ગુરૂવારે આ મહિલા મૃત્યું પામી હતી. આ મહિલા સુરત શહેરના કાપોદ્રા વિસ્તારમાં રહે છે. જ્યારે તારીખ 4 માર્ચે એનામાં કોરોના વાયરસના લક્ષણ જોવા મળ્યા હતા. એકબાજું દેશમાં H3N2ના કેસ વધી રહ્યા છે. એવામાં ગુજરાતમાં કોરોના વાયરસે ડોકિયું કરી દીધું છે.
આ પણ વાંચો: Corona Death in Surat : સુરતમાં 2023માં કોરોનાના કારણે પ્રથમ મોત
મોટી આશંકા: આ મહિલાને કોરોનાની સાથે H3N2 વાયરસ હોવાની આશંકા વ્યક્ત થઈ રહી છે. જોકે, આ માટેના કેટલાક સેમ્પલ ગાંધીનગરની લેબમાં તપાસ હેતું મોકલી દેવામાં આવ્યા છે. જેના રીપોર્ટ પરથી મોતનું સાચું કારણ જાણવા મળશે.સુરત શહેરમાં છેલ્લા બે દિવસમાં એટલે કે શુક્રવાર (તા.10.03.2023) સુઘીમાં ત્રણ પોઝિટિવ કેસ સામે આવ્યા છે. જેમાંથી આ કેસમાં મૃત્યું થતા ફરી આરોગ્ય વિભાગની ચિંતામાં રાતોરાત વધારો થયો છે. આ મહિલાને છેલ્લા કેટલાક દિવસથી શરદી, ઉધરસ, તાવ હતા અને શ્વાસ લેવામાં મુશ્કેલી પડી રહી હતી. જ્યારે એમનો કોવિડ રીપોર્ટ કરવામાં આવ્યો ત્યારે પોઝિટિવ આવ્યો હતો.
રાજસ્થાન પ્રવાસ: આ સિવાય 52 વર્ષના એક મહિલા પોતાના સ્વજનોના પરિવારમાં લગ્ન હેતું રાજસ્થાન ગયા હતા. આ મહિલા તારીખ 3 માર્ચના રોજ સુરત પરત આવ્યા હતા. એ પછી અચાનક એની તબિયત લથડતા સુરતની સ્મીમેર હોસ્પિટલમાં એડમીટ કરાયા હતા. જેનો રીપોર્ટ પોઝિટિવ આવ્યો હતો. ગુજરાત રાજ્યની વાત કરવામાં આવે તો છેલ્લા 24 કલાકમાં 30 નવા કેસ કોરોના વાયરસના નોંધાયા હતા. જેમાંથી કુલ 6 દર્દીઓ કોરોનાને માત આપીને પોતાના ઘરે પરત ફર્યા હતા. જ્યારે બે દર્દીઓની સ્થિતિ ગંભીર હોવાનું જાણવા મળ્યું છે. આ બન્ને દર્દીઓની વેન્ટિલેટર પર સારવાર ચાલું છે.
આ પણ વાંચો: Viral Video: સરકારી બસના ડ્રાઈવરે માથાકુટ કરી, જાહેરમાં નાક પગે લગાવીને માફી માંગવી પડી
અમદાવાદ કેન્દ્ર: રાજ્યમાં સૌથી વધારે કોરોના વાયરસના કેસ અમદાવાદમાંથી નોંધાઈ રહ્યા હોવાનું સામે આવ્યું છે. શુક્રવારના એક રીપોર્ટ અનુસાર કુલ 70થી વધારે એક્ટિવ કેસ છે. અમદાવાદના પશ્ચિમ વિસ્તારમાં સૌથી વધારે કેસ હોવાનું રીપોર્ટમાં ઉલ્લેખીત છે. આ પશ્ચિમ વિસ્તારમાં જોધપુર, સેટેલાઈટ, થલતેજ, નવરંગપુરા, વાસણા, વસ્ત્રાપુર, શિવરંજની તથા પાલડી-ભઠ્ઠા વિસ્તારનો સમાવેશ થાય છે. H3N2નો કેસ પણ અમદાવાદથી નોંધાયો છે. વાયરલ ઈન્ફેક્શનના કેસ વધે છે એમાં કોરોનાનો કેસ સામે આવતા આરોગ્ય વિભાગની ટીમ દોડતી થઈ ગઈ છે.
