અમદાવાદ : શહેરમાં વધુ એક હત્યાનો બનાવ સામે આવ્યો છે, મહત્વનું છે કે છેલ્લા ત્રણ દિવસમાં બે હત્યાની ઘટનાઓ બનતા હાલ તો હત્યાનો સિલસિલો યથાવત જોવા મળ્યો છે. ત્યારે હાલમાં જ સોલામાં યુવતી સાથે વાત કરવા મામલે એક યુવકે અન્ય યુવકની હત્યા કરી હતી. તેવામાં વસ્ત્રાલ વિસ્તારમાં પતિએ પત્નીની હત્યા કરી હોવાની ઘટના સામે આવી છે. જોકે આ ઘટનામાં આરોપી પતિએ પત્નીની હત્યા કર્યા બાદ પત્નીની મૃત્યુને આત્મહત્યામાં ખપાવવાનો માટે માસ્ટર પ્લાન બનાવ્યો હતો, પરંતુ તે પ્લાન નિષ્ફળ નિવડતા તેને હવાલાતમાં જવાનો વારો આવ્યો છે.
શું હતો સમગ્ર મામલો : વસ્ત્રાલ રિંગરોડ પર આવેલા ગજાનંદ એપાર્ટમેન્ટમાં હત્યાની ઘટના સામે આવી છે. જેમાં પૂજા મહેરીયા નામની મહિલાની હત્યાનો બનાવ સામે આવ્યો છે. મૃતક પૂજા મહેરીયાના અગાઉ મહેસાણા ખાતે લગ્ન થયા હતા. લગ્નજીવનમાં તેને એક 12 વર્ષનો દીકરો છે. જોકે પતિ-પત્ની વચ્ચે મનમેળ ન રહેતા તેણે છૂટાછેડા લીધા હતા. જે બાદ મેહુલ મહેરીયા નામના યુવક સાથે બીજા લગ્ન કર્યા હતા, જે લગ્ન જીવનમાં તેને એક બે વર્ષનો દીકરો પણ છે. પરંતુ પૂજા મહેરિયાને પૂર્વ પતિ સાથે અવારનવાર વાતચીત થતી હોય જે બાબતને લઈને અવારનવાર પૂજાને પતિ સાથે બોલાચાલી અને ઝઘડો થતો હતો.
એક ઘૂંટડો ઝેરનો : પાંચમી માર્ચે પતિ-પત્ની વચ્ચે તે જ બાબતને લઈને ઝઘડો થતાં પૂજા મહેરીયાએ પોતાની પાસે રહેલી બોટલમાંથી એક ઘૂંટડો ઝેર પીને પતિ મેહુલ મહેરિયાને ફસાવી દેવાની ધમકી આપતા પતિ ઉશ્કેરાયો હતો. તેણે તે જ સમયે પત્નીને પતાવી નાખવાનો પ્લાન બનાવી દુપટ્ટાથી પત્ની પૂજા મહેરિયાને મોતને ઘાટ ઉતારી દીધી હતી.
આત્મહત્યામાં ખપાવવા માસ્ટર પ્લાન : હત્યા કર્યા બાદ આરોપીએ પત્નીના મૃત્યુ આત્મહત્યામાં ખપાવવા માટે ખાસ પ્લાન બનાવ્યો હતો. તે પોતાના બે વર્ષના દીકરાને લઈને ઘરમાં તાળું મારીને નશો કરવા માટે જતો રહ્યો હતો. બે કલાક બાદ પરત આવી ઘરમાં તાળું ખોલી અંદર જઈને પત્નીના ગળામાં દુપટ્ટો બાંધી તેમજ પંખાની નીચે ખુરશી અને ડબ્બો મૂકીને આસપાસના લોકોને એકઠા કર્યા હતા. પત્ની પૂજા મહેરીયાએ ઘરમાં આત્મહત્યા કરી લીધી હોય તે પ્રકારની જાહેરાત કરી હતી. જે બાદ રામોલ પોલીસને આ અંગે જાણ કરવામાં આવતા પોલીસે ઘટના સ્થળે પહોંચીને મૃતદેહને પીએમ માટે મોકલીને અકસ્માત મૃત્યુ દાખલ કરીને તપાસ શરૂ કરી હતી.
પત્નીના હત્યાનો ગુનો : રામોલ પોલીસને પહેલાથી જ આ ઘટનાને લઈને શંકા કુશંકાઓ હતી. જેથી પોલીસે મૃતક પૂજા મહેરિયાના પ્રાથમિક પીએમ રિપોર્ટમાં તપાસ કરતા તેમાં તેનું મૃત્યુ ગળા પર પ્રેશર આવવાથી થયું હોવાનો ખુલાસો થયો હતો. જેથી આત્મહત્યાની જાહેરાત કરનાર પતિને પોલીસ મથકે લાવીને યુક્તિ પ્રયુક્તિથી તેની પૂછપરછ કરતા અંતે તેણે પત્નીની હત્યાનો ગુનો કબુલ કર્યો હતો.
આ પણ વાંચો : Murder In Ahmedabad: સામાન્ય બાબતમાં એક યુવકની હત્યા કરનાર આરોપી ઝડપાયો
પત્ની માથાભારે : આરોપી પતિએ કબુલાત કરી હતી કે, તેને લગ્નના અઢી વર્ષ જેટલો સમય વીતી ગયો હોવા છતાં તેની પત્ની પૂજા માથાભારે હોય તે તેના પૂર્વ પતિ સાથે હજુ પણ ટેલીફોનિક વાતચીત કરતી હતી. જે બાબતને લઈને અવારનવાર બંને વચ્ચે ઝઘડા થતા હતા. ઘટનાના દિવસે પણ તે જ બાબતને લઈને ઝઘડો થતાં પત્નીએ ઝેર પીને પોતાને ફસાવવાનો પ્રયત્ન કર્યો હતો. જેના કારણે આવેશમાં આવીને તેણે આ હત્યાને અંજામ આપ્યો હતો.
આ પણ વાંચો : તમિલનાડુના વતની યુવકની ચાલતી ટ્રેનમાંથી ધક્કો મારીને હત્યા કરવાના કેસમાં ધરપકડ
હત્યારા પતિની ધરપકડ : હાલ તો આ સમગ્ર મામલે રામોલ પોલીસે હત્યારા પતિની ધરપકડ કરી વધુ તપાસ અને સાયન્ટિફિક પુરાવાઓ એકત્ર કરવાની તજવીજ હાથ ધરી છે. આરોપીને કોર્ટમાં રજૂ કરવાની પ્રક્રિયા શરૂ કરી છે. પકડાયેલો આરોપી કુરિયર કંપનીમાં ડ્રાઇવિંગનું કામ કરતો હોવાનું સામે આવ્યું છે. આ અંગે રામોલ પોલીસ સ્ટેશનના PI સી.આર. રાણાએ જણાવ્યું હતું કે, આરોપીએ પહેલા મૃતકના આત્મહત્યા અંગેની જાહેરાત કરતા પોલીસે મૃતક મહિલાનું હોસ્પિટલમાં પોસ્ટમોર્ટમ કરાવ્યું હતું. જેના પ્રાથમિક રિપોર્ટમાં જ ખુલાસાઓ થતા આરોપીની અટકાયત કરી પૂછપરછ કરતા તેણે ગુનાની કબૂલાત કરી છે. હાલ આરોપીને વધુ તપાસ કરવામાં આવી છે.
