ગુવાહાટી : ઇન્ડિયન પ્રીમિયર લીગ (IPL) 2023 ની 11મી મેચમાં, રાજસ્થાન રોયલ્સે દિલ્હી કેપિટલ્સને 57 રનથી હરાવ્યું હતું. ગુવાહાટીના બરસાપારા ક્રિકેટ સ્ટેડિયમમાં દિલ્હી કેપિટલ્સે ટોસ જીતીને પ્રથમ બોલિંગ કરવાનો નિર્ણય કર્યો હતો. પ્રથમ બેટિંગ કરતા રાજસ્થાન રોયલ્સે દિલ્હીને 200 રનનો ટાર્ગેટ આપ્યો હતો, પરંતુ દિલ્હીની ટીમ 20 ઓવરમાં 9 વિકેટના નુકસાન પર 142 રન જ બનાવી શકી હતી.
રાજસ્થાન રોયલ્સે દિલ્હી કેપિટલ્સને 57 રનથી હરાવ્યું : દિલ્હી તરફથી કેપ્ટન વોર્નરે સૌથી વધુ 65 રન બનાવ્યા હતા. અગાઉ, જોસ બટલર (79) અને યશસ્વી જયસ્વાલ (60) પ્રથમ દાવના સર્વોચ્ચ સ્કોરર હતા કારણ કે રાજસ્થાન રોયલ્સે 20 ઓવરમાં 4 વિકેટ ગુમાવી દીધી હતી. બીજી તરફ દિલ્હી તરફથી મુકેશ કુમારે 2 જ્યારે કુલદીપ અને રોવમેન પોવેલને 1-1 વિકેટ મળી હતી.
રાજસ્થાનના હલ્લા બોલ : ઓપનર યશસ્વી જયસ્વાલ (60 રન) અને જોસ બટલરે (79 રન) શાનદાર લય ચાલુ રાખતા અડધી સદીની ઇનિંગ્સ રમી હતી. બંને વચ્ચે 51 બોલમાં 98 રનની ભાગીદારી નોંધાઈ હતી. જયસ્વાલે 31 બોલની ઈનિંગમાં 11 ચોગ્ગા અને એક છગ્ગો ફટકાર્યો હતો. આ દરમિયાન ખલીલ અહેમદ પણ મેચની પહેલી જ ઓવરમાં પાંચ ચોગ્ગા ફટકારી ચુક્યો હતો. જયસ્વાલે 25 બોલમાં ફિફ્ટી પૂરી કરી હતી. બટલરે 51 બોલમાં 11 ફોર અને 1 સિક્સર ફટકારી હતી. લાઈફલાઈનનો પૂરેપૂરો ફાયદો ઉઠાવતા શિમરોન હેટમાયરે છેલ્લે 21 બોલમાં એક ફોર અને બે સિક્સરની મદદથી અણનમ 39 રન બનાવ્યા હતા.
એકલા લડી રહ્યા ડેવિડ વોર્નર : દિલ્હી કેપિટલ્સે પહેલી જ ઓવરમાં બે વિકેટ ગુમાવી દીધી હતી. વિસ્ફોટક ઓપનર પૃથ્વી શૉ ત્રીજા બોલ પર ખાતું ખોલાવ્યા વગર જ આઉટ થઈ ગયો હતો. મનીષ પાંડે આવ્યો અને ગયો, તે ગોલ્ડન ડક બની ગયો. રિલે રુસો (14) અને લલિત યાદવ (38)ને બાદ કરતાં તમામ બેટ્સમેનોએ નિરાશ કર્યા હતા. ડેવિડ વોર્નર છેલ્લી ઓવરમાં 55 બોલમાં 65 રન બનાવીને આઉટ થયો હતો. દિલ્હીના આઠ બેટ્સમેન ડબલ ફિગર સુધી પણ પહોંચી શક્યા ન હતા. રાજસ્થાન તરફથી ટ્રેન્ટ બોલ્ટ અને યુઝવેન્દ્ર ચહલે ત્રણ-ત્રણ વિકેટ લીધી હતી. અશ્વિને બે શિકાર લીધા. એક વિકેટ સંદીપ શર્માની બેગમાં આવી.
