હીનાની હત્યાના આરોપી સચિનને લવાયો વડોદરા

• શિવાંશ કેસમાં સૌથી મોટો ખુલાસો
• શિવાંશના પિતા સચિને મહેંદીની ગળુ દબાવી કરી હતી હત્યા
• પોલીસ સચિનને લઈને પહોંચી મૃતક પ્રેમિકાના વડોદરાના નિવાસસ્થાને

વડોદરા: શિવાંશની માતા હિનાની હત્યાનો ઘટસ્ફોટ થતાં વડોદરાના બાપોદ વિસ્તારમાં આવેલા દર્શનમ ઓએસીસના જી-102 નંબરના ફ્લેટ પર પોલીસ અધિકારીઓએ ધામા નાંખ્યા છે. ફ્લેટના રસોડામાં સૂટકેશમાં હિનાનો દુર્ગંધ મારતો મૃતદેહ મળી આવ્યો હોવાની શંકા છે. હાલ પોલીસે આખા વિસ્તારમાં અવરજવર બંધ કરાવી છે.

સચિન કોટાથી ઝડપાયો

ગાંધીનગરનાં પેથાપુરમાં સ્વામિનારાયણ ગુરુકુળની ગૌ શાળાના દરવાજા પાસે શુક્રવારે રાત્રે અજાણ્યો શખ્સ 8 થી 10 મહિનાના બાળકને મૂકીને નાસી ગયો હતો. શંકાસ્પદ વાહનો અને મોબાઈલ નંબરો અંગે તપાસથી શરૂઆત બાદ પોલીસના પ્રયાસ આખરે સફળ થયા છે. 20 કલાકની મહેનત બાદ પોલીસે પિતા સચિન દિક્ષીતને શોધી કાઢ્યો છે. રાત્રે બાળક શિવાંશને તરછોડ્યા બાદ તે પોતાના પરિવાર સાથે કોટા નાસી ગયો હતો, જ્યાંથી તેને ઝડપી લેવાયો છે.

સચિને હિનાની ગળું દબાવીને હત્યા કરી હતી

સચિને તેની પ્રેમિકા સાથેના અનૈતિક સંબંધમાં બાળકને જન્મ આપ્યો હતો. સચિન હિના ઉર્ફે મહેંદીના પ્રેમમાં હતો અને વર્ષ 2019 થી બન્ને સાથે રહેતાં હતાં. એક કંપનીના શો-રૂમમાં બન્ને સંપર્કમાં આવ્યા હતા. બે મહિનાથી સચિને વડોદરામાં નોકરી લીધી હતી. સચિન પાંચ દિવસ વડોદરા અને બે દિવસ ગાંધીનગર રહેતો હતો. સચિન તેના વતન ઉત્તરપ્રદેશ જવાનો હતો. જે મુદ્દે હીનાએ સચિનને કહ્યું હતું કે, તું વતન ના જઈશ અને મારી સાથે જ રહે. આ મુદ્દે બન્ને વચ્ચે ઉગ્ર બોલાચાલી થઈ હતી અને ગુસ્સામાં આવેલા સચિને હિનાની ગળું દબાવીને હત્યા કરી હતી.