મુંબઈ: જેટ એરવેઝના સ્થાપક નરેશ ગોયલે તેમની વ્યક્તિગત લોનની ચૂકવણી કરવા માટે જાહેર ક્ષેત્રની બેંક લોનમાંથી આશરે 9.50 કરોડનો ગેરઉપયોગ કર્યો હોવાનો એન્ફોર્સમેન્ટ ડિરેક્ટોરેટ (ED) એ આરોપ લગાવ્યો છે. નરેશ ગોયલની શુક્રવારે મોડી રાત્રે ધરપકડ કરવામાં આવી હતી.
મની-લોન્ડરિંગના આરોપમાં ધરપકડ: સ્પેશિયલ પીએમએલએ કોર્ટ સમક્ષ નરેશ ગોયલને રજૂ કરતાં ઇડીએ જણાવ્યું હતું કે તેમની પુત્રી નમ્રતા ગોયલના પ્રોડક્શન હાઉસને પણ પગાર અને અન્ય પ્રતિબદ્ધતાઓ ચૂકવવા માટે જેટ એરવેઝના ખાતામાંથી પૈસા મળ્યા હતા. આ પહેલા શુક્રવારે ઈડીએ નરેશ ગોયલના ઘરે દરોડા પાડ્યા હતા. તેની પૂછપરછ માટે અટકાયત કરવામાં આવી હતી. મોડી રાત્રે તેની 2011 અને 2019 વચ્ચે 538 કરોડ રૂપિયાની કેનેરા બેંક લોન છેતરપિંડી કેસ સંબંધિત કથિત મની-લોન્ડરિંગના આરોપમાં ધરપકડ કરવામાં આવી હતી.
જુલાઈ 2021માં છેતરપિંડી જાહેર થઈ: કેનેરા બેંક સાથે કથિત છેતરપિંડીના સંદર્ભમાં નરેશ ગોયલ, તેમની પત્ની અનિતા અને અન્યો વિરુદ્ધ દાખલ કરવામાં આવેલી સેન્ટ્રલ બ્યુરો ઑફ ઇન્વેસ્ટિગેશન (CBI) એફઆઈઆરમાંથી મની-લોન્ડરિંગનો કેસ પ્રકાશમાં આવ્યો છે. કેનેરા બેંકે ફરિયાદ કરી હતી કે તેણે નરેશ ગોયલની જેટ એરવેઝને 849 કરોડની લોન અને ક્રેડિટ લિમિટ આપી હતી. જેમાંથી 538 કરોડથી વધુ રકમ બાકી હતી. જુલાઈ 2021માં તેને છેતરપિંડી જાહેર કરવામાં આવી હતી.
રોકાણનો ગેરઉપયોગ: તપાસમાં એ પણ બહાર આવ્યું છે કે નરેશ ગોયલ પરિવારના ખાનગી અને અંગત ખર્ચ અને કર્મચારીઓના પગાર એરલાઇનના ખાતામાંથી ચૂકવવામાં આવ્યા હતા. જેટ એરવેઝ લિમિટેડે જેટ લાઈટ મારફત લોન, એડવાન્સ અને રોકાણનો ગેરઉપયોગ કર્યો હતો. તમને જણાવી દઈએ કે એક સમયે જેટ એરવેઝે લગભગ 25 વર્ષ સુધી આકાશ પર રાજ કર્યું હતું. પરંતુ, નાણાકીય સમસ્યાઓ અને ભારે નુકસાનને કારણે જેટ એરવેઝ એપ્રિલ 2019 માં બંધ થઈ ગઈ હતી.
(IANS)
